PKI (Pakak Ka Ikua)

Kale :”Manga ang manggarutok tu tu Buik?”
Abuik :”Cubolah ang danga tu ha, lah ado lo PKI baliak!”
Kale :”Ado PKI baa lo kecek ang ko Buik a?”
Abuik :”Tu ha, rami-rami urang demo manuntuik supayo diskusi bertema PKI di bubaran!”
Kale :”Elok-elok ang mangecek Buik. Jan asa ang sabuik jo acara diskusi urang tu acara PKI!”
Abuik :”Ondeeeee Le, takicuah di nan tarang waang ko mah. Sajalaih tu demo kapatang tu manantang bangkik PKI ko baliak, ajuo nan ka di patagak lai tu!”
Kale :”Kan lah nyo konfirmasi mah Buik, bahaso acara tu dak ado sangkuik pauik e jo PKI doh!”
Abuik :”Dima lo ado maliang mangaku Le, panuah nah pinjaro nyeh!”
Kale :”Sipaik nan mode ko nan harus hati-hati wak Buik. Jan dek asa tuduah jo, jatuah pitanah jadie ko!”
Abuik :”Waden iyo indak lo mancaliak bana acara tu doh Le. Tapi dari pemberitaan tu kan jaleh tu. Dima lo sabanyak tu urang nan demo babuek pitanah!”
Kale :”Dunia a kini ko ko Buik. Sagalo e bisa dibuek mah!”
Abuik :”Jadi manuruik waang indak acara PKI tu doh?”
Kale :”Dak do den nyabuik mode tu doh, cuma jan sato-sato lo basorak hal nan alun jaleh. Takuik pitanah beko!”
Abuik :”Dek waang mungkin alun jalaih, nan dek den lah jalaih. Iko bantuak kebangkitan PKI!”
Kale :”Waden indak lo setuju PKI ko bangkik doh Buik, tapi den dak namuah capek-capek manyabuik urang PKI doh. Iko hal sensitif, manyungkuik hiduik urang. Bisa kanai bunuah urang dek gara-gara kanai pitanah tu tu mah!”
Abuik :”Okelah kok mode tu, tapi cubo ang paratian bana urang-urang nan diskusi tu. Partamo nyo sabuik dirie korban orde lamo jo orde baru. Tu pilem PKI tu pembohongan publik. Dak juo jalaih tu lai?”
Kale :”Naaah itu nan mambuek alun jalaih Buik. Sia nan korban, urang e je dak tantu doh. Namoe sia, abak e sia, induak e sia, dima umah e, dima kampuang e….!”
Abuik :”Oooo kok sampai mode tu paniang nah wak nyeh Le!”
Kale :”Itu makoe jan asa tuduah PKI jo urang ko lu. Telusuri bana urang nan mangecek ko dulu. Jan dek gagara ikuik diskusi lah jadi PKI jo sakali!”
Abuik :”Oyo, ado ciek lai. Panglima TNI manyuruah nonton pilem G 30S/PKI ado nan eboh, baa manuruik ang tu?”
Kale :”Bisa jadi wee takuik nonton pilem tu!”
Abuik :”Takuik kanai tuduah PKI?”
Kale :”Indak, takuik dek pilem tu banyak pembunuhan sadis!”
Abuik :”Nan waang baa, lai amuah ang nonton pilem tu?”
Kale :”Lai. Alo salah e!”
Abuik :”Tu baa kok ang tagak an bana urang-urang nan diskusi tu?”
Kale :”Eeee yayai yeh. Pi lah den sabuik tadi mah, waden dak nio sato-sato takuik beko jadi pitanah. PKI waang ko mah. Pakak Ka Ikua!”

Advertisements

Laki Bini (15)

Laki :”Piak….Piak…Caliak ko a!”
Bini :”A tu Da?”
Laki :”Caliak koa, a namoe ko?”
Bini :”Dima dapek dek Uda HP ancak ko ko Da?”
Laki :”Di umpun kambia tadi mah!”
Bini :”Sia punyo Da?”
Laki :”Itu nan ka den tanyoan ka wakau ko mah!”
Bini :”Ma tantu dek Upiak, dak Upiak gai nan manyobokan doh mah!”
Laki :”Iyo tau den, tapi HP ko kan mati mah. Cubo kau iduikan, sia tau ado potoe di HP ko buliah tau wak sia nan punyo e!”
Bini :”Di umpun kambia dima tadi dapek dek Uda ko?”
Laki :”Di palak si Kudun!”
Bini :”Si Kudun tu punyo dak?”
Laki :”Lah den tanyoan ka Kudun tu tadi, dak wee nan punyo cek e doh!”
Bini :”Co Upiak caliak Da!”
Laki :”Lai ado potoe Piak?”
Bini :”Iko abih batrai namoe ko Da, di cas amuah lu komah!”
Malakik HP panuah taisi, Si Buyuang maisi kampuang tangah lo lu. Sudah tu baruak e lo nan diagiah e makan.
Bini :”Da…Da, dak ado poto urang punyoe doh Da. Lah Upiak usai-usai ko ha!”
Laki :”Tu baa caro e den mambaliakan HP tu lai tu yeh!”
Bini :”Iko nan namoe rasaki ko Da. Ambiak je lah lai, kan dak tau sia rang punyoe doh mah!”
Laki :”Dak doh Piak. Badoso tu, lai tantu dek kau!”
Bini :”Tu ka dipangaan lai, urang punyoe dak tantu doh mah. Salah lo namoe tu?”
Laki :”Baa dak ka salah, dak punyo awak tu baambiak je!”
Bini :”Manga lo Upiak nan maambiak. Uda tadi nan mambaok pulang mah. Uda nan ka badoso tu nyeh!”
Laki :”Waden baok pulang pi mintak tolong ka wakau mah. Mancaliak isi HP ko sia nan punyo!”
Bini :”Pado paniang-paniang na Uda, malakik sobok sia nan punyo wak pakai jo lu Da!”
Laki :”Wakau nan arok jo HP ko mpak e mah!”
Bini :”Bukan mode tu da. Danga dek Uda dih. Iko HP canggih ko Da, bisa banyak manolong Uda ko!”
Laki :”Manolong baa lo kecek kau koa?”
Bini :”Misal e dak Da. Uda mintak buekan ka urang konter nan dipasa tu aplikasi ‘panjek baruak’. Kalau ado aplikasi tu, uda tingga mancaliak di HP ko jo lai sia nan mamasan baruak ka Uda. Dak paralu lo Uda maelo baruak sapanjang kampuang doh, maabihan minyak jo namoe tu Da!”
Laki :”Aplikasi panjek baruak baa lo kecek kau ko Piak a!”
Bini :”Takah ojek onlen tu Da ha. Caliak lah tukang ojek tu kini, dak paralu gai bamanuang manunggu doh. Tingga cigok di HP, sobok sia nan nio maojek mah!”
Laki :”Paniang kau komah Piak. Sia pulo lah nan ka mamasan baruak pakai aplikasi kecek kau tadi ko koha!”
Bini :”Eeeee uda ko dak gaul ko doh. Upiak tunjuakan nan rancak supayo imaik minyak jo tanago!”
Laki :”Baok kamai HP tulah. Kok masih kau pacik jo HP tu batambah batetele carito kau ko!”
Bini :”Langsuang baok ka konter dipasa yo Da. Mintak buekan aplikasi Panjek Baruak tu dih!”
Laki :”Den cari sia nan punyo HP ko, ka den pulangan!”
Bini :”Ondeeehhh Da, sayang bana tu mah Da. Malakik urang punyoe sobok je nyeh Da, wak pakai santa lu!”
Laki :”Doaan jolah rasaki den lai balabiah. Jan HP iko lo nan kau harok!”
Bini :”Jadi ka Uda baliaan Upiak HP takah tu tu Da?”
Laki :”Baok kamai HP tu ha, karajoan jo lah apo karajo kau Piak!”

Laki Bini (14)

Bini :”Da, ado nan nio Upiak kecekan ka Uda ciek!”
Laki :”Apo tu Piak?”
Bini :”Kamai lah Uda mandakek, sagan wak tadanga dek urang!”
Laki :”Takah barasio lo mah yeh!”
Bini :”Mode ko mah Da. Kok maangkek anak wak baa nyeh Da?”
Laki :”Maangkek anak? Mukasuik kau baa ko Piak?”
Bini :”Untuak mamanciang Da. Upiak ado mandanga kaba bahaso salah satu caro untuak mandapekan anak adolah dipanciang Da!”
Laki :”Wakau ko ado-ado je. Kecek kau lauak pakai bapanciang-panciang lo!”
Bini :”Molah dicubo juo Da, kan dak ado salah e doh mah!”
Laki :”Wakau den ajak pai bauruik dak amuah. Tu kini ka maangkek anak lo. Kau cubo lah pai bauruik lu, sia tau amuah sudah tu!”
Bini :”Uda ko baa ko. Lah sacanggih ko jaman, masih pai bauruik jo pangana e!”
Laki :”Yo den ajak na kau pai barubek ka dotor indak juo kau amuah doh. Nan partamo ongkoih e maha. Nan kaduo kau takuik mancaliak suntik!”
Bini :”Dek maha tu mako e Upiak dak amuah Da!”
Laki :”Bado na ka maha e, den usahoan asa wak lai dapek katurunan!”
Bini :”Jadi dak setuju Uda wak maangkek anak doh?”
Laki :”Indak!”
Bini :”Apo alasan Uda dak amuah maangkek anak?”
Laki :”Jadi cakak jo beko tu nyeh!’
Bini :”Dima lo jadi cakak e?”
Laki :”Waden ko dak sahari duo ari tau jo wakau doh Piak!”
Bini :”Memang baa Upiak Da?”
Laki :”Wakau pancimburu sangaik!”
Bini :”Tu alo hubungan Upiak pancimburu jo maangkek anak?”
Laki :”Cubolah kau cari di kampuang ko sia nan baranak ketek? Salain si Kacumuih dak ado doh!”
Bini :”Oooo iyo cari pakaro Uda namoe ko mah. Upiak dak ado manyabuik anak si kacumuih tu nan ka wak ambiak doh. Iko pangana buruak Uda je nyeh ko!”
Laki :”Dak tu a, iyo je kecek den nyeh!”
Bini :”Jan macam-macam Uda jo si Kacumuih tu Da! Kan dak harus dari kampuang awak je anak nan ka diangkek tu doh!”
Laki :”Bilo lo den macam-macam. Sajalaih tu waden dak setuju maangkek anak, wakau nan mamintak tadi yeh!”
Bini :”Uda panjawek. Uda dak sayang jo Upiak doh. Upiak banciiiiiiiiiii caliak Uda!”
Laki :”Kok banci kau caliak den, jan tarimo pitih lanjo dari den!”
Bini :”Udaaaaaaaaa….. jaeeeeekkkk….!”

Basawah di Kampuang Lai

Abuik :”Le, Den pikia-pikia ancak den pulang kampuang jo lah lai!”
Kale :”Baa dek tibo-tibo takana pulang kampuang lo ang Buik?”
Abuik :”Dak main manggaleh pulsa kolai doh Le. Dak baujuang lai doh!”
Kale :”Kok dak baujuang manggaleh pulsa, tuka padok lai!”
Abuik :”Dak ado nan nampak doh Le. Urang panggaleh bi mangaluah sadoe!”
Kale :”Batua Buik, tapi awak ko dak buliah manyarah jo keadaan doh Buik!”
Abuik :”Tu mah lah den cubo batahan, utang nan banyak nyeh Le. Pitih masuak dak juo ado doh. Ancak den baliak ka kampuang lai. Indak ado na bapitih, nan jaleh makan dak bautang!”
Kale :”Tu a padok ang di kampuang Buik?”
Abuik :”Sesuai jo arahan pak Presiden, batani!”
Kale :”Eeee cimporong anyuik dek ang Buik. Rang gaek wak bapuluah taun karajo tani ko. Kan samo-samo nampak dek wak nasib e nyeh mah. Untuak manyakolaan awak je dak talok dek e doh!”
Abuik :”Dak mancaliak tepi gai ang ko Le. Kecek Presiden anak-anak tamatan kuliah pertanian dak ado nan namuah jadi petani doh. Bakaja-kaja karajo di bank wee sadoe!”
Kale :”Dalang ang Buik. Kok dak nio jadi petani manga dipiliah e sakola tani!”
Abuik :”Manga lo aden nan dalang, Presiden ang tu nah nan dalang, wee nan manyabuik mah!”
Kale :”Itu tu wee maangiah sumangaik tu Buik, supayo pertanian awak ko labiah maju!”
Abuik :”Kecek ang andia na nan maaratian kecek urang ko!”
Kale :”Adih nah kok bitu. Kok iyo kareh ati ang batani di kampuang, dima ang ka batani? Sawah tak ado, ladang tak punyo!”
Abuik :”Kan bisa manyupah di sawah urang mah Le!”
Kale :”Eeee yayai yeh. Cito ambuih-ambuih namo e tu!”
Abuik :”Dima lo cito ambuih-ambuih e?”
Kale :”Manyupah tu samo jo jadi buruh waang namoe tu. Dak petani nan disabuik Presiden tu tu doh!”
Abuik :”Sakuati ang lah manyabuik apo Le. Nan jaleh suok den jo anak bini den dak kalakang doh!”
Kale :”Tu pulang kampuang tu kecek ang gampang. Lai ado pitih ang?”
Abuik :”Tu makoe den mangecek ka waang. Kok lai bisa den manyambuik. Lakik den tibo di kampuang nyoh Le, tu den ganti liak ko!”
Kale :”Kanciang ang namoe tu mah. Sagarobak tundo ang pulang kampuang dima lo ado den pitih tu ha!”
Abuik :”Baa lah kaka den ko yeh. Dak tantu den kama ka mangadu lai doh ha!”
Kale :”Kok kareh juo ang ka manyupah nyoh, manga pulang kampuang na nek e. Disiko jelah. Sambuah sawah di jawa ko. Ciek lai, dak tau urang kampuang wak jadi buruh doh!”
Abuik :”Cubo lah ang tunjuakan sawah sia nan paralu urang ko, bia den turuik!”
Kale :”Sasak ciik ko ma lo tantu dek den. Di danga-danga lo lu nyeh!”
Abuik :”Yo bacacaruik den dek ang ko nyoh Le. Kecek den lah iyo lo ado tu, kiroe baru ka mancari lo lu!”
Kale :”Yo dari pado ang pulang. Kanai mental anak bini ang ko. Urang dikampuang manyangko waang lah sukses. Tibo-tibo jatuah tapai baok keluarga. Lah taba muko anak bini ang manahan cimeeh urang kampuang!”
Abuik :”Lai tapikia lo dek den tu mah Le, tapi baa lai dihadok i je tu nyeh!”
Kale :”Pikia-pikia bana lah dulu!”
Abuik :”Lah sakik kapalo den, ang surah juo bapikia!”
Kale :”Mode ko jo lah a, bisuak den kawanan ang ka arah kateh tu ha. Sia tau ado nan manyayo waang manyupah kasawah e!”
Abuik :”Di ateh tu pi lah samo-samo wak danga mah. Urang-urang cino pandatang galok nan baladang sinan mah!”
Kale :”Oyo yeh, sambuah e sinan dak!”
Abuik :”Jadi nasib den ko baa ko?”
Kale :”Dak itu doh, wak bae lah makan lu lah. Beko lo wak pikiaan nasib ang tu!”
Abuik :”Dih pek lah!”

Laki Bini (13)

Laki :”Piak, daun apo namoe dateh meja makan ko ko?”
Bini :”Itu lalap namoe tu Da!”
Laki :”A pulo lah lalap ko koha. Nan indak-indak jo karajo kau ko mah Piak!”
Bini :”Eeee uda kolai. Lalap ko sayuran segar ko Da!”
Laki :”Jan waden lo nan kau kicuah lai!”
Bini :”Uda ko diagiah tau dak picayo e doh. Cubo lah Uda caliak urang Sunda tu ha. Rancak-rancak kulik e, itu dek suko makan lalap ko ko Da!”
Laki :”Manga lo dek itu tu. Nan jalaih waden ko dak urang Sunda doh, jan kau samoan je salero urang sadoe!”
Bini :”Kalau pangaruah e rancak ka dea ditiru nyeh Da!”
Laki :”Jan batetele je kau lai Piak. Sadang baruak den je dak nio makan makanan matah ko kodoh. Andia lo den pado baruak tu!”
Bini :”Manga lo ka baruak lari e tu Da!”
Laki :”Jan banyak carito kau lai ha. Anjakan lah rumpuik ko koa, patah salero makan den dek e!”
Bini :”Makoe da, jan puta-puta jariang ka jariang makan Uda. Cubo lo iko lai!”
Laki :”Kau anjak an atau indak ko?”
Bini :”Bia Upiak nan makan beko Da. Jan marabo jo Uda sakali!”
Laki :”Tarabo a nan ka indak den dek e. Disuruah buek dendeng lambok, rumpuik nan kau agiah den!”
Bini :”Uda dek emosi sakali je, bukak nah sungkuik tu Da. Ado dendeng lambok tu tumah!”
Laki :”Lah patah salero den!”
Bini :”Tu dendeng ko Upiak abihan jo lai?”
Laki :”Sakuati kau lah Piak!”
Bini :”Tu kama lo Uda lai?”
Laki :”Pado makan rumpuik den, ancak makanan baruak nan den makan lai!”
Bini :”Dendeng tu dak untuak baruak tu doh Da!”
Laki :”Kecek sia tu untuak baruak?”
Bini :”Baa Uda sanae ko, paniang Upiak ha!”
Laki :”Labiah paniang lah den lai. Sagalo rumpuik, kolak, tantaha je nan kau buek!”
Bini :”Tinggaan dendeang tu untuak Upiak gak ciek Da. Kecek Da dak ka makan doh, pi dendeang disantuang e jo!”

Laki Bini (12)

Laki :”Piak ko pitih balanjo ha, buek dendeng lambok beko dih!”
Bini :”Ma sampai ko da? Dagiang je sakilo labiah satuih. Alun bahan nan lain e lai!”
Laki :”Sia nyuruah kau bali dagiang sakilo. Nan den suruah buek samba beko dagiang lambok. Bara sadang e je lah pitih tu!”
Bini :”Bado na lah ka dapek dek pitih satuih ko!”
Laki :”Ado je jawek kau mah. Makan di lua den, kau eboh. Den suruah buek samba kau maleh!”
Bini :”Cubolah makan dumah si Kacumuih tu, kok dak parang dunia beko!”
Laki :”Itu makoe den suruah kau buek samba!”
Bini :”Adih nah, bara cukuik e je nyeh lah!”
Laki :”Tantu iyo bara cukuik e je nyeh. Batea-tea jo kau ko mah!”
Bini :”O iyo Da, takana dek Upiak kok dak maelo baruak Uda baa kikiro? Dicubo lo padok nan lain!”
Laki :”Itu nan nampak dek den padok kini ko nyeh. A kikiro nan nampak dek kau padok nan lai barayia nyeh?”
Bini :”Ma ojek onlen tu Da ha. Upiak danga-danga banyak lo nan barasaki maojek tu kini!”
Laki :”Mangucauk lah kau ko Piak. Jo onda buruak ko den maojek, dima lo namuah urang!”
Bini :”Di tuka tambahan onda nan kini ko Da. Ambiak onda baru!”
Laki :”Mangecek yo lasuah Piak. Kok dak tacarian ansuran e baa? Di elo dek urang sorum onda ko liak. Sikua capang sikua capeh jadi e. Onda lamo dak ado nan baru ilang lo!”
Bini :”Itu kan contoh e je nyeh Da. Pado bacakak jo wak taruih pakaro pitih balanjo ko ha!”
Laki :”Wakau nan cari cakak nyeh. Den agiah pitih dak cukuik gai kecek kau. Bini dak tau basyukur kau komah!”
Bini :”Dak tu a, lah mulai lo Uda liak!”
Laki :”Karajoan jo lah apo nan den suruah. Den pai ciek lu. Si Bigau manyayo den tadi ha. Ado sibu kambia nan kaditurunan beko tu mah!”
Bini :”Woih, banyak tu Da!”
Laki :”Tu makoe, doaan laki tu kalau wee bakureh!”
Bini :”Lai Upiak doaan nyeh Da!”
Laki :”Lah den pai lai!”
Bini :”Baruak Uda lai baagiah makan gai tadi tu? Barek karajoe beko tu mah!”
Laki :”Alah, lapuak lapak makan e tadi!”
Bini :”Bilo lo Uda agiah makan baruak tu? To dak nampak dek Upiak doh!”
Laki :”Kama incek mato kau tu. Cigok nah sungkuik tu, lah abih samba nan kau buek patang!”
Bini :”Mukasuik Uda baa ko?”
Laki :”Lamak sangaik dek baruak kolak tempe nan kau buek patang. Abih dek e sadoe!”
Bini :”Wayoooooiiiiiiik Daaaaa, dak untuak baruak Upiak buek tu doh Da!”
Laki :”Pado sakik jo ati kai samba tak abih, tu makoe den agiahan ka baruak!”
Bini :”Pai lah Uda lai ha, mambalak je nampak dek Upiak!”

Laki Bini (11)

Laki :”Apo nan kau buek ko Piak?”
Bini :”Iko Upiak baraja dari gugel mah Da!”
Laki :”Wayoik, lah canggih lo kau kini yeh. Pakai gugel gai ka mamasak. Lah dak ado masakan awak nan ka kau masak lai?”
Bini :”Dak mode tu lo doh Da. Ituang-ituang tuka salero mah Da!”
Laki :”Buliah tuka salero Piak, tapi nan sasuai jo lidah den!”
Bini :”Uda cubo lah dulu, lamak ko mah Da!”
Laki :”Lamak laki induak kau!”
Bini :”Kan mintuo Uda tu mah!”
Laki :”Eeee cimporong bilau yeh. Mukasuik den, dima lo kau baraja makan kolak jo nasi ko ko?”
Bini :”Kolak baa pulo kecek uda ko?”
Laki :”Kan iyo kolak ko. Kolak tempe!”
Bini :”Tu makoe, gaul Da…gaul…!”
Laki :”Apo lah kecek kau ko a!”
Bini :”Iko namoe tempe bacem Da!”
Laki :”Jan aden lo nan kau kicuah. Nan itam ko baagiah saka kan?”
Bini :”Iyo da!”
Laki :”Tu makoe kolak tempe den sabuik!”
Bini :”Cubo lah dulu Da. Ketagihan Uda beko dek e tu mah!”
Laki :”Bialah indak makan den pado makan nasi jo kolak ko!”
Bini :”Uda dak maharagoi karajo bini doh mah. Lah payah Upiak mamasak spesial untuak Uda. Jan kan Uda makan, malah Uda cimeehan!”
Laki :”Lah dak ado masakan awak nan bisa dimakan lai, mako makanan jawa paniang tu lo nan kau masak?”
Bini :”Kok dak nio Uda dak usah dimakan, tapi jan mancacek tu Da. Sakik ati Upiak dek e Da!”
Laki :”Labiha sakik lah ati den lai. Latiah-latiah pulang karajo bukannyo dapek makan, malah patah salero den jadi e!”
Bini :”Kini a nio Uda nyeh, bialah Upiak masakan sabanta!”
Laki :”Talaik kau mah Piak, bialah den makan di lua je!”
Bini :”Imaik-imaik pitih Da, jan diporohan lo di lapau nasi!”
Laki :”Kecek sia den makan ka lapau nasi. Tadi si Kacumuih mambasoan den makan dumah e. Ancak den turuik e lai!”
Bini :”APOOOOOOOOOO… cubolah Uda makan sinan kok dak Upiak sunaik Uda sakali lai!”