Penyek

Kale :”Apo nan ang danga tu Buik?”
Abuik :”Iko ha, pangajian ustad Abdul Somad!”
Kale :”Ooo ustad nan urang Pakanbaru tu mah yeh!”
Abuik :”Ha tuah, sadang naiak daun na baliau kini tu. Ceramah e lamak di danga, takah Zainuddin MZ dulu!”
Kale :”Iyo, den dapek kaba takah tu lo, tapi yo alun sempat mancaliak langsuang lai!”
Abuik :”Di yutub banyak ceramah e mah Le, kamai lah danga dek ang ko a!”
Kale :”Lai tau den mah. Kaba terbaru e, wee kanai pasamoan dek urang-urang liberal mah!”
Abuik :”Kanai pasamoan baa lo ko?”
Kale :”Tapi waang fans baliau, bato dak tau kaba terbaru e tu!”
Abuik :”Kasus nan ma tu, yo dak tau den doh!”
Kale :”Ado nyo nyabuik pesek mah!”
Abuik :”Oooo nan itu, lai tau den mah Le. Kecek den ado lo nan terbaru tu!”
Kale :”Jadi banyak juo nan manyalahan ustad ko mah Buik. Baa kok sampai ustad bisa mancacek ciptaan Tuhan!”
Abuik :”Paja nan manyalahan ko asa ka malantong je. Artis ko kan iyo penyek mah. Satiok wee malawak, penyek e tu nan dikamukoan e. Pendek e dek penyek e tu wee bapitih. Kini disabuik penyek bangih e. Kok mancuang e disabuik wajar e bangih tu!”
Kale :”Hhahaha, iyo lo dek ang tu mah Buik. Tapi manuruik den yo takanai ustad ko sakali ko mah. Walaupun baa bana lah parangai si penyek ko, kok dapek jan dicacek lo e!”
Abuik :”Lah sapatuik e wee di cacek Le. Agamo dilecehan e mah. Bantuak main-main je dek e bajilbab tu, padohal wajib hukum e dek kaum hawa tu mah!”
Kale :”Batua, lai tau lo den tu nyoh, tapi kan bisa dikecekan jo bahaso nan labiha haluih!”
Abuik :”Dak namuah urang nan mahino agamo ko dihaluihan bahaso doh Le. Lah patuik dikasaan tu mah, kok dak maingkek-ingkek parangai e ko!”
Kale :”Tasarah dek ang lah Buik, iko kan pandapek den!”
Abuik :”Kok didiaman jo taruih, kasudahan e anak-anak wak nan padusi bisa maniru bisuak tu Le!”
Kale :”Iyo, lai tau den tu mah!”
Abuik :”Lai tau ang tu mah, tapi baa kok ang bela juo si penyek tu!”
Kale :”Bukan mambela, cuma manyabuik baa kok dak jo caro aluih ustad ko maingekan paja tu. Tapi lah itu lo adaik awak manusia ko mah Buik. Manusia ko basipaik khilaf, pasti ado salah e. Disiko lo den caliak ustad ko khilaf e. Kok bana je taruih, wee dak nabi Muhammad doh. Tantu bisa panatik lo urang dek e ko tu!”
Abuik :”Iyo, dak. Banyak ustad nan takah tu dak. Aa gym ado lo takanai e, bahkan Zainuddin MZ bana dulu ado lo mah!”
Kale :”Itu tando manusiawi tu Buik. Jan pulo dijadihan itu untuak alaik mambae ustad-ustad ko. Ustad atau ulama ko adolah pawaris nabi, jan sakali-sakali kito paolok-olok baliau. Katulahan beko!”
Abuik :”Sasuai wak tu Le!”
Kale :”Jadi a pengajian Ustad Abdul Somad nan ang danga tu tu Buik?”
Abuik :”Waang maajak den maota je mah, dak tasimakan dek den lai doh ha!”

Advertisements

Kurisi Angek Papa

Abuik :”Bakujuik juo Papa jadi e Le!”
Kale :”Sia mananam angin inyo manuai badai!”
Abuik :”Batua, tapi dek sabalum e payah bana ko di tangkok a!”
Kale :”Bukan payah, tapi licin!”
Abuik :”Samo je dang tu nyeh!”
Kale :”Dima lo samo dang tu Buik. Kalau payah ko dak tasingguang senek alah e wee doh, tapi kalau licin ko lah dapek lapeh liak!”
Abuik :”Sakuati ang lah, nan jaleh lah di dalam kini tu!”
Kale :”Kini iyo, sia tau bisuak ko lapeh liak!”
Abuik :”Tapi raso den sakali ko dak ka lapeh gai ko doh!”
Kale :”Eh, lah santiang lo ang jadi pengamat politik kini yeh!”
Abuik :”Tapaso namoe ko, sado berita itu je isie kadipangaan lai. Tabaok rendong a nan ka indak dek e!”
Kale :”Baliak cito tadi liak, baa dek yakin bana ang sakali ko Papa dak ka lapeh!”
Abuik :”Ha iko pertanyaan rancak ko Le. Manuruik waden, banyak nan bamuluik manih ka Papa ko. Dimuko Papa wee bantuak sajalan, dibalakang manikam gaya e!”
Kale :”Eh lain lo tembak e dek ang ko yo Buik!”
Abuik :”Baa ka indak dek ang Le. Papa ko maninggaan kurisi duo, sebagai ketua DPR jo ketua Golkar. Dak barang angek dek ang ko Le!”
Kale :”Iyo…iyo…iyo… Waden dak ado gai tapikia kasinan sabalun e tu doh Buik!”
Abuik :”Disinan busuak urang-urang tu manuruik den Le. Sabana e wee nio bana ko ka jadi ketua DPR jo ketua Golkar. Diagiah bola taconcong supayo Papa ko di dalam!”
Kale :”Bola taconcong baa lo ko?”
Abuik :”Cubo lah pikia dek ang, skenario a pulo nan maantak tiang listrik tu tu. Sudah tu purak-purak sakik utak. Kan bagagarah namoe dang tu!”
Kale :”Tu tu!”
Abuik :”Tu mah, katiko di pindahan ka RSCM, sanang lah KPK manangkok lai. Bantuak manta lauak ka kuciang!”
Kale :”Tapi kan KPK takicuah mah. Iko lo partamo e sejarah KPK dak bisa manangkok tersangka di rumah e nyoh mah!”
Abuik :”Den raso disinan main e urang-urang nan nio kurisi ampuak tu Le. Dibujuak e Papa ko maikuik ide e, padohal manta Papa ka pinjaro tu mah!”
Kale :”Aaa nyo babeda lo caro pikia ang yo Buik. Tapi masuak aka juo tu, sabab taun bisuak pilkada tu pilpres lo lai. Mungkin-mungkin jo sado kemungkinan tu nyeh!”
Abuik :”Tu makoe busuak gaya urang tu cek den. Salagi ado celah, dipasoan e masuak taruih!”
Kale :”Paniang den mandanga e mah Buik, ancak pai mangopi wak nah!”
Abuik :”Cocok, kan lah di dalam den tu dak?”
Kale :”Kalamak diang jo namoe tu. BSBS….!”
Abuik :”BSBS ko a ko?”
Kale :”Bayia surang surang!”

Pasa Aua Tabaka

Abuik :”Lah dapek kaba ang pasa Aua tabaka Le?”
Kale :”Alah, ado kawan nan mangabaan den tadi pagi. Kadai e tabaka, dak ado nan bisa disalamaikan doh!”
Abuik :”Baa dek tabaka panjang jo pasa di Bukiktenggi ko ko Le? Lai dak basingajo tu?”
Kale :”Basingajo atau indak e ma tantu dek den, ang tanyo nah ka polisi, baa kecek e hasia investigasi e tu!”
Abuik :”Baa dek sarengeh tu jawek ang tu Le!”
Kale :”Bukan sarengeh, waang tu nan indak-indak je nan ang tanyoan. Lah ka jalaih je den dak tau jawek e tu ang tanyo juo. Mah awak samo-samo dirantau!”
Abuik :”Tapi kecek ang tadi ang dapek kaba dari kawan ang langsuang, sia tau ado ang tanyo gai ka wee apo panyabab e!”
Kale :”Yo itu lo nan ka dipikiaan e tu mah, sadang isi kadai e je habih!”
Abuik :”Dak lasauk ngecek jo ang lai doh Le!”
Kale :”Tu manga jo ang tanyo ka den kok dak lasauk!”
Abuik :”Dek a ang ko Le? Sereang jo jawek ang!”
Kale :”Dak ado dekdek a e doh!”
Abuik :”Antalah e waang dak mode ko doh, titibo lah panyarengeh jo!”
Kale :”Jadi baa nek e nyeh?”
Abuik :”Lah minum kopi gai ang jak tadi ko Le!”
Kale :”Yo lai ka ang bayiaan minum den? Jan asa mambasoan je!”
Abuik :”Dak nio ang dak anti lah, bialah den mangopi je surang!”
Kale :”Pek lah kok iyo!”
Abuik :”Kan lamak tu a, ko indak baro je isi kapalo tu!”
Kale :”Salain kadai kawan den, kadai etek den kanai lo Buik. Wee talambek tau, lah abih baru dikabaan urang. Tu manalepon den lo e tadi!”
Abuik :”Oooo lah jalaih dek den ujuang e tu mah. Patuiklah kah ko ang jadi e yeh!”
Kale :”Kan lai jalaih dek ang tu nyeh, jan ditanyo juo lai!”
Abuik :”Tapi den ado dapek kaba bahaso pasa di Bukik ko sangajo dibaka!”
Kale :”Dima lo ang dapek kaba kah tu tu?”
Abuik :”Cubo lah ang pikia, dalam bulan ko juo lah duo pasa tabaka. Pasa gadang-gadang sadoe tu a. Apolai pasa Aua ko, lah internasional main e tu mah Le. Sampai urang Malaysia gai balanjo sinan mah!”
Kale :”Iyo, lai tau den!”
Abuik :”Sinan latak ganjia e Le. Tu kaba nan den danga ado Taipan kayo rayo nan ka mambali lahan di Bukik ko. Ka dibangun e mol. Mako e pasa tradisional ko dihabisi lu!”
Kale :”Kecek ang sagampang tu je urusan e!”
Abuik :”Yo itu nan ka den tanyoan ka ang tadi tu mah, tapi waang dek sadang suntuak lo tu dak sero jadi e lai doh!”
Kale :”Tarok lah iyo bana ado Taipan nan nio mambangun mol, manga Bukik ko nan dipiliah e? Ancak lah Pakanbaru lai. Salain labiah rami dakek lo ka Singapur jo Malaysia lai. Bukik ko ancak e memang untuak pariwisata nyoh tamasuak wisata kuliner!”
Abuik :”O yo yeh!”
Kale :”Tu makoe jan asa manarimo kaba buruang juo!”
Abuik :”Minum lah kopi ang ko lu ha, dingin dak lamak beko lai!”
Kale :”Dih!”
Abuik :”Tapi kok dak disingajo, baa dek baturuik-turik je pasa tabaka di Bukik ko dang Le?”
Kale :”Namoe je musibah, ma bisa dietong jo caro matematik!”
Abuik :”Yo dak amuah diskusi jo ang kini ko doh Le. Kok lah abih kopi ang, den bayia lai ha!”

Apo Salah Den, Kecek Tiang Listrik

Kale :”Yo sabana panjang drama Papa ko mpak dek den Buik!”
Abuik :”Tantu iyo nyeh Le, namoe je drama. Kok data je caritoe tantu bosan urang!”
Kale :”Tapi nan kini ko yo di lua dugaan urang banyak mah Buik. Urang yo banyak nan menduga Papa ko masuak mah sakik tapi dak jo caro balantak ko doh!”
Abuik :”Itu tando ebat sutradara e tu Le. Dak diduga penonton alur e doh!”
Kale :”Tapi itu kok iyo drama eh, kok sabana balantak baa kikiro ang tu Buik!”
Abuik :”Antahlah tu Le, ragu den iko dak baseting!”
Kale :”Itulah dek akibaik acok baduto. Kok batua bana lah balantak tu, urang dak picayo doh!”
Abuik :”Baa dek bapikia lo waang iko kejadian nan sabanae Le?”
Kale :”Waden bausaho indak buruak sangko mah Buik. Manga wak mancimeeh urang, lapeh pahalo awak ka wee ko!”
Abuik :”Dima lo mancimeeh e Le. Iko dek gagara parangai e juo ko. Dak takana dek ang lai, tiko nyo sakik patang ko. Tiko nyo manang di pengadilan, langsuang cegak e. Bisuak e langsung wee nan mamimpin sidang. Kan kasa main e tu!”
Kale :”Wee dek ketua DPR tantu iyo wee lo nan mamimpin siding nyeh Buik!”
Abuik :”Kan itulah. Padohal kok aluih main e tiko tu, mungkin kejadian nan kini dak ka dicimeehan urang tu doh!”
Kale :”Iko permainan tingkek tinggi ko mah Buik, dak ka tamakan gai dek utak awak rakyaik badari ko ko doh!”
Abuik :”Waang dalang lo komah Le. Kana lo permainan urang tu nan dituruikan. Awak ko cuma menikmati je nyeh Le. Samakin banyak trik samakin lasuah maikuti carito drama ko!”
Kale :”Itu nan den camehan sanae mah Buik. Ka dibaok kama nogari ko ko! Sadoe babuekan dramae. Awak nan rakyaik badarai ko galak takekeh manonton drama, samantaro iduik samakin susah. Sado harago naiak, galeh lah cando iduik sagan mati dak namuah!”
Abuik :”Iyo lo dak Le. Kecek e kanyang wak dek drama ko ko ndak!”
Kale :”Itu makoe, sadiah den maagak-agak e. Pado dasar e waden ko dak paduli gai jo masalah politik nogari ko kodoh. Tapi kamanga wak lai, sado berita lah itu jo isie. Mau tak mau tabaok rendong wak dek e!”
Abuik :”Baa dek jadi sadih ko ota wak ko Le. Malaih den malanjuikan e mah!”
Kale :”Sadiah lah nasib tiang listrik tu lai Buik. Apo salah den kecek tiang ko!”
Abuik :”Kanciang ang mah, sangko den lah iyo lo serius tadi tu!”

Laki Bini (22)

Bini :”Da, caliak tu Da a, gadih Dayak tu maonggak-onggak kamai Da!”
Laki :”Ko patando baiak ko mah Piak. Lai indak baganyi e dek kejadian patang tu doh!”
Bini :”Alun tau lai Da, sia tau pai manta kabaji wee kamai!”
Laki :”Wakau ko baburuak sangko juo ka urang, tantu iyo langang kadai wak ko nyeh!”
Bini :”Upiak lo nan Uda bangihan. Iko demi kadai awak juo ko Da. Kok kanai kabaji kadai ko, apo kecek awak ka kawan mamak beko lai. Wee lah bahabih-habih untuak manolong awak!”
Laki :”Eh, iyo kamai e mah Piak a. Sambuiklah e tu Piak a, bali a e tu!”
Bini :”Uda jelah nan kamuko, beko takah patang ko lo dak dih e balanjo dek Upiak nan dimuko!”
Laki :”Lai dak cimburu lo kau waden kamuko?”
Bini :”Cimburu dek a lu Upiak Da, kok takuik iyo!”
Gadih Dayak :”Uda, tolong bungkusin nasi rendang 10 bungkus ya!”
Laki :”Baik nona. Sayurnya lengkap nona?”
Gadih Dayak :”Iya Uda, jangan lupa kuahnya banyakin ya!”
Tibo-tibo tatagun si Buyuang mancaliak samba randang. Sambia maangguak e ka gadih Dayak ko, diosong e tenong nan baisi randang tu ka lakang.
Laki :”Sebentar ya nona!”
Gadih Dayak :”Iya Uda!”
Laki :”Piak…Piak kamai lah!”
Bini :”Ado a Da?”
Laki :”Iyo juo kecek kau nyeh Piak. Gadih Dayak tu mintak bungkuihan nasi randang. Pas den ka manyanduak samba, kiroe lah gaca randang wak ko sadoe a. Iyo manta kabaji we kamai, baa caro e lai ko?”
Bini :”Nggggggg anu mah Da…mmmmm!”
Laki :”Anu a kecek kau koa!”
Bini :”Upiak mintak maaf yo Da. Kecek an jo ka gadih Dayak tu samba randang alun masak lai!”
Laki :”Alun masak baa pulo kecek kau ko a? Sajalaih tu wee mancaliak ado randang ko!”
Bini :”Tadi tu tatunggang aia dek Upiak ka dalam samba randang tu mah Da, makoe gaca e!”
Laki :”Eeeee yayai yeh, baa dak mangecek kau tadi. Ko hantok je, tu a nan ka den jawek ka pelanggan lai ko!”
Bini :”Hmmmmm… Upiak takuik Da. Beko meha lo Uda!”
Laki :”Dek kau aniang ko je nan tambah meha den jadi e mah!”
Bini :”Maafan Upiak yo Da!”
Laki :”Kini ko tangguang jawab kau. Turuik gadih Dayak tu dek kau, tasarah apo nan ka kau jawek!”
Bini :”Upiak takuik Da!”
Laki :”Dak mau tau den!”
Ditabeh e mararau dek si Upiak ko sajadi-jadie.

Ba Dama Togok Jo Lah Sudah Kolai

Kale :”Nelpon sia ang tu Buik?”
Abuik :”Amak den di kampuang, adiak gaek padusi!”
Kale :”Eh ado a tu? Jarang-jarang waang nalepon amak ang tu nyeh dak!”
Abuik :”A juo lai kok dak mangadu. Batua kecek ang tu, salamo ko jarang den nelpon amak ko. Tapi tadi tu wee ma miskol den. Tu cameh lo den dek e, takuik kok ado apo-apo di kampuang!”
Kale :”Mangadu dek a?”
Abuik :”Pakaro iduik ko juo. Iduik sarik, awaklah tambah tuo juo. Salamo ko masih talok manyupah ka sawah, kini badan lah tuo juo dak takao lai doh!”
Kale :”Ooo mantun, lah sapatuik e lo tu ma hang tolong Buik!”
Abuik :”Batua, tapi iduik den disiko pas-pasan lo Le. Kan ang tau nyeh mah!”
Kale :”Indak kayu janjang dikapiang tu mah Buik!”
Abuik :”Dak pek aka lai. Urang di kampuang tau e awak sanang. Barasaki di rantau!”
Kale :”Waden ado lo kah tu mah. Bulan patang apak den mintak dibantu lo. Sabaleh duobaleh wak tu nyeh!”
Abuik :”Apolai kini ko tadanga kaba listrik ka naiak lo liak!”
Kale :”Sasek ang tu mah Buik, dak naiak doh tapi penyederhanaan daya. Listrik nan disubsidi daya e bajian 900 tu nan indak subsidi bajadian 4400. Beda tu mah Buik!”
Abuik :”Yo itu, kan barek wak mambayia dang tu Le. Bayia baban e labiah maha tu mah. Samo jo naiak tu nyeh!”
Kale :”Kecek urang PLN jo pak mentri tarif e dak naiak doh, Cuma daya e jo nan barubah nyoh!”
Abuik :”Urang nan basikola nan mangarati panjalasan takah tu nyoh Le. Amak den nan dikampuang tu ma lo ka ngarati e tu. Apolai kok tibo lo isuak urang PLN manuka meteran e dari 450 manjadi 900. Manyonggeang wee ka langik tu mah. Wayooooiiii baa kecek den lai ko, kama ka dicarian pitih pambayia lampu lai ko. Pasti jo itu kecek e mah Le!”
Kale :”Iyo lo kecek ang tu mah Buik. Urang basikola bisa dipahaman pengertian penyerdehanaan daya ko. Amak-amak wak dikampuang dima lo tau e tu. Yo batambah susah juo iduik tu mah!”
Abuik :”Patang ko subsidi BBM nan bakurangan, kini PLN lo lai.”
Kale :”Piliah juo lah pakdhe tu, kini tangguangan lah akibaik e!”
Abuik :”Kanciang dek ang, bilo lo den miliah e, waang antah tu!”
Kale :”Waden dak sato miliah doh, golput istilah keren e!”
Abuik :”Disinan salah ang Le. Gagara banyak nan golput tu makoe manang pakdhe ko!”
Kale :”Lamak je ang sabuik den salah. Susuko den lah dak sato miliah!”
Abuik :”Tu kok dak miliah ang, subsidi BBM jo Listrik dak sato ang manangguang e doh!”
Kale :”Iyo lo dak!”
Abuik :”Kini a juo lai, nasi lah jadi bubua. Waden ka tambah panik, alun mikia iduik disiko urang dikampuang lah maeseh lo!”
Kale :”Jan diupej juo iduik ko Buik, dak basyukur namoe tu!”
Abuik :”Waden dak maupek doh, tapi malapehan uweh-uweh!”
Kale :”Bisuak ko kok manalepon juo amak ang tu, caritoan je baa kondisi ang sabana e disiko!”
Abuik :”Kok dapek jan tau e nasib den disiko Le, tambah taibo ati e ko. Anak e nan diarok dirantau, malaraik lo iduik e!”
Kale :”Kok bitu, tambah gigiah ang karajo nek e nyoh Buik!”
Abuik :”Jan bacacaruik jo ang Le. Kini ko paliang tambah dicakian iduik disiko ko lai nyeh!”
Kale :”Dicakiak baa lo ko Buik?”
Abuik :”Misal e pakai dama togok gai sudah ko lai!”
Kale :”Kecek ang dak jo minyak dama togok tu tu? Kama kadicari minyak tanah disiko ko ko. Salain sarik mandapekan e haragoe maha lo, batetele je ang mah Buik!”

Pelatih Timnas U-19 Kanai Pecat?

Abuik :”Le, kabae yo kanai pecat da In?”
Kale :”Da In ma ko Buik?”
Abuik :”Indra Syafri!”
Kale :”Kalau nan den danga dak kanai pecat doh tapi kontrak e nan indak dipapanjang!”
Abuik :”Samo je dang tu nyeh!”
Kale :”Dima latak samo e dek ang. Kanai pecat ko alun abih kontrak lai banci urang ka awak, dibarantian e. Samantaro kalau kontrak abih ko, yo sampai sinan lo pajanjian samulo!”
Abuik :”Sakuati ang lah Le. Nan jalaih da In ko dak dipakai lai!”
Kale :”Iyo Buik. Heran lo den mah. Sapayah tu e mancari bibit kuliliang Indonesia. Lah jadi tim ko dicampakan urang je e lai!”
Abuik :”Lai dak gagara kalah dek Malaysia patang tu tu Le?”
Kale :”A lo lai kok dak dek itu!”
Abuik :”Sabana e main patang tu kan dak pangaruah gai doh mah. Awak lah otomatis lolos ka putaran final!”
Kale :”Kok dak tere caro pikia PSSI tu dak PSSI namoe tu doh Buik!”
Abuik :”Itulah Le, yo damam PSSI ko ko mah. Manuruik den da In ko sangajo nyo maanfaatan kualifikasi patang tu untuak mauji ma susunan pemain nan paliang ancak. Wajar je di cubo-cubo sado formasi supayo di ajang sabanae rancak tim ko!”
Kale :”Itu kan kecek waang Buik, nan kecek urang PSSI dak mode tu. Kalah pecat abih pakaro!”
Abuik :”Kan iyo dipecat tu a, baa indak kecek ang tadi!”
Kale :”Eh iyo lo yeh. Kalah kontrak dak dipapanjang!”
Abuik :”Eee karapai dek ang Le. Sakuati dek ang jo lah mangecek!”
Kale :”Inti e banyak urang nan kecewa dek keputusan PSSI ko mah!”
Abuik :”Atau ado lo nan nio batenggek dak. Lah jalaih tim ko nampak rancak e, dibuang da In kolai. Naiak oportunis Bombay lai!”
Kale :”Bisa jadi juo tu Buik. Tapi baa ka baa, anak-anak U-19 ko lah ado hubungan emosi jo da In. Kok diambiak bana dek urang lain, tantu beda sacaro emosi!”
Abuik :”Kok takah tu sampai kiamaik dak ka maju-maju sepakbola awak ko ko doh!”
Kale :”Tu mah bukti e sampai kini tetap juo andia!”
Abuik :”Takana dek den Le, Simin Padang kan sadang payah lo kini mah. Kok da In ko jo malatiah Simin Padang baa manuruik ang?”
Kale :”Simin ko lah ampo ko mah. Musim bisuak main di liga 2, tantu dak amuah da In ko doh!”
Abuik :”Alun lai Le, tingga ciek main lai. Panantuan tacampak dari liga 1 atau indak!”
Kale :”Lah jalaih tacampak tu mah. A juo lai!”
Abuik :”Kini baandai-andai je wak lu. Simin ko tetap di liga 1, da In ko jadian palatiah e lai!”
Kale :”Ancak juo tu mah Buik, tapi dak baun tunjuak den doh!”
Abuik :”Baa dek mantun?”
Kale :”Manajemen Simin ko kajai balapik. Sabaleh duobaleh sanae pola pikia e jo PSSI!”
Abuik :”Kok mantun yo sansai mah Le. Dak ado nan ka ditonton taun bisuak lai ko doh!”
Kale :”Si Bolang je tonton lai. Sanang ati mancaliak e!”
Abuik :”Ha tuah!”