Lauak Baniaik

Siang tu si Buyuang asik bagaluik jo kawan-kawan samo gadang di batang aia. Salasai main kaja-kajaan tu mandi-mandi sambia main parang-parangan dalam aia. Lah panek lo mereka ko bamain, tabik pangana si Buyuang untuak mamanciang di batang aia tu. Kawan-kawannyo nan lain dak namuah sato mamanciang doh.
“Yuang dak buliah mamapeh di batang aia ko doh! Lauak e baniaik tu mah”, kecek kawan-kawan si Buyuang.
“Ang takuik tu iyo”, jawek si Buyuang sambia taruih mamanciang di batang aia tu.
Tinggalah si Buyuang sorang se di batang aia mamanciang lai. Dak lamo siap tu tibo garin surau manyasek si Buyuang ko.
“Oi Yuang, alah mamapeh tu. Dak tau ang lauak di batang aia tu baniaik mah!”
“Kalau baniaik a salah e Buya?”
“Lauak baniaik ko kalau dimakan buncik paruik dek e!”, jawek garin manjalehan ka si Buyuang.
“Baa kok harus baniaik an lo Buya, kan lauak e gadang-gadang tu ha!”, tanyo si Buyuang.
“Sangajo dek urang tuo-tuo awak di kampuang ko di niaik an supayo lauak di batang aia ko dak abih. Kalau dak dibuek caro mode ko, sagadang kalingkiang lauak lah ditangkok urang tu mah. Tapi jan rusuah lo ang Yuang, bulan carai bisuak ko babukak niaik lauak ko mah. Bisa balanjuang wak dek e tu mah!”.
Si Buyuang maanguak-angguak sambia mangamehan panciang nyo. Lauak nan alah dapek, di lapehan nyo liak. Mancaliak si Buyuang lai mangarati jo panjalehannyo, Buya pai maninggaan si Buyuang untuak maasak jawi nan di paduoan urang ka baliau. Dak lamo sudah tu, nampak dek si Buyuang induak-induak nan nio manyubarang batang aia sambia muntah-muntah.
“Dek a muntah-muntah Tek?”, tanyo si Buyuang.
“Biaso lah panyakik induak-induak kalau sadang buncik ko!”, jawek baliau.
“Itulah Etek, sajaleh tu dak buliah makan lauak baniaik, etek makan juo. Tu mah buncik Etek dek e!”, kecek si Buyuang ka induak-induak ko.
Takah patuih tongga tangah hari, langsuang kanai sarengeh si Buyuang dek induak-induak tu.
“Eeeehh, ketek ang baru lah kurang aja yo. Sia nan maaja an ang takah tu tu?”
“Buya manyabuik ka den tadi!”, jawek si Buyuang jo binguangnyo.

3 Comments

  1. Ambo mintak tolong bana,lanjuik kan carito si bungsu ko bagian 86 sampai tamat.trm ksh yo da.

    • Sanak CA, sampai kini yo alun basobok samo kito sambungan carito ko lai doh… yo mintak maaf bana kito ka sanak ko mah….

  2. da cunop , ambo pernah baco buku ko . sampai serie 10 nyo . di da cunop sampai seri bara da ?


Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s