Sunaik Rasu

Salapeh sumbayang Isya, garin maagiah undangan untuak urang kampuang lewaik anak-anak nan mangaji di surau,
“Paratian kasadonyo, agiahan undangan ko ka urang tuo kalian yo. Bisuak kito ado acara sunaik rasu massal nan di adoan dek kakak-kakak mahasiswa dari kota nan ka bakemah bakti di kampuang awak ko. Gratis. Untuak kalian anak laki-laki nan alun basunaik wajib tibo bisuak pagi jam lapan yo. Jan sampai dak tibo lo”, kecek garin ka murik-muriknyo.
“Suanik rasu tu a tu Buya?”, tanyo salah saurang murik.
“Sunaik rasu tu mamotong dagiang sangenek di ujuang buruang kalian. Iko adolah parintah agamo, hukum nyo wajib bagi nan laki-laki. Jan cameh lo kalian, indak sakik gai doh”.
“A gunonyo tu Buya?”, tanyo paja tadi tu liak.
Garin tadiam sabanta. Baliau binguang lo baa caro manjalehan ka anak-anak ko.
“Dagiang nan ka dibuang tu adolah sarang panyakik. Jadi itu makonyo disaik sangenek, bia awak tahinda dari sagalo panyakik”, jawek garin manjalehan.
Bisuak harinyo iyolah bakumpua sakalian anak laki-laki nan ka basunaik rasu ko. Ado sekitar limo balehan urang nan mancogok. Acara ko disambuik jo sanang ati dek warga kampuang, tapi ado ciek nan paliang katakutan. Iyo lah si Buyuang urangnyo. Pagi-pagi bana sabalum acara dimulai inyo lah mahilang antah kama. Sabalun acara ampia salasai, garin tasadar bahaso inyo dak mancaliak batang iduang si Buyuang.
“Gau, kama si Buyuang? Dari tadi Buya paratian nyo dak ado doh!”, tanyo garin ka kawan si Buyang.
“Indak tau den doh Buya. Sajak pagi nyo lah dak ado di surau ko doh!”, jawek si Bigau.
Ruponyo dek saking takuiknyo, si Buyuang mahandok dibaliak samak di balakang surau. Pas anak nan terakhir salasai basunaik, tadanga urang mamakiak dari dalam samak.
“Tolooong, toloooong!”
Garin nan mandanga suaro tu bagageh mancigok ka dalam samak.
“Eh, waang mah Yuang. Disiko ang mahandok kironyo mah yo. Dek a ang mamakiak?” tanyo garin ka si Buyuang.
“Buruang den Buya. Gata-gata sangaik rasonyo. Den caliak merah, bangkak lo tu lai”, kecek si Buyuang ka garin sambia manangih.
“Ha..ha..ha.. Iko nan namonyo kanai tungau tu tu Yuang. Panyakik namonyo ko. Lai takana kecek Buya samalam lai?”
“Tu baa caronyo ko lai Buya?”
“Babahayo kalau dak dibuang komah Yuang. Yo basunaik ubek nyo tu nyoh” jawek garin maraso dapek angin.
Buyuang maangguak sambia masih agak takuik-takuik.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s