Ubek Garin

Siang ko dak tadanga suaro garin surau azan patando wakatu luhua lah masuak. Si Buyuang agak heran juo, baa kok indak ado tadanga suaro azan dari surau. Dicigoknyo lah guru mangaji nyo ko ka ruangan ketek di balakang surau nan dijadian biliak dek garin ko.
“Assalamualaikum”, ditokok lah pintu biliak garin dek si Buyuang.
“Waalaikumsalam, sia tu? masuak lah, pintu dak bakunci doh!”, jawek garin.
“Sakik Buya? Dek dak ado tadanga suaro azan dek den, langsuang den cigok Buya kamari!”
“Agak mandangai badan saketek Yuang. Tapi dak baa gai ko doh, paliang beko sore lah elok lo liak mah. Kebetulan tadi Buya ado manjamua ubek di laman surau. Biasonyo kalau bangkik dangai ko, Buya minum ubek tu agak tigo kali. Sudah tu cegak. Lah lamo lo mah dak tibo panyakik takah ko. O iyo, ang cigok ubek nan tajamua tu ciek Yuang! Tadi dek agak lambok Buya jamua lu sabalun diminum!”
“Jadih Buya!”
“Kok lah masiak, ang bangkik jo sadonyo dih!”
“Adih!”, si Buyuang langsuang mangarajoan parintah nan disuruah gurunyo tu.
“Iko Buya, lah masiak sadonyo. Tapi baa kok dak lamak tu baunnyo ko?”
“Namonyo sajo ubek tantu iyo!”, jawek garin ko sambia manarimo ubek nan alah masiak tu.
Dak lamo sasudah minum ubek tu, iyo lah talok tagak dek garin ko. Diansua-ansuanyo mangarajoan karajo nan tabangkalai sajak pagi tadi. Tibo-tibo takajuik garin mancaliak masih ado juo ubek nan tajamua di laman surau. Di dakek i nyo, tanyato masih utuah sado ubek tu. Dak ado bakurang ciek juo doh. Langsuang lah dicarinyo si Buyuang,
“Oi Yuang, ubek a nan ang agiahan ka Buya tadi tu?”
“Ubek nan tajamua di laman surau nan Buya suruah tadi tu mah!”
“Dakek ma ang kamehan ubek tadi tu?”
“Disabalah padi nan tajamua di laman surau tu. Ado nampak di den saonggok ubek disinan”.
“Ondeh Yuang, iyo lah salah ang tu mah. Ubek nan Buya jamua ko indak disabalah padi nan tajamua tu doh. Caliak lah kamari Buya tunjuak an!”, di egangnyo tangan si Buyuang manunjuak an bahaso ubek tu masih tajamua.
“Caliak dek ang tu ha, masih tajamua elok juo ubek tu lai!”
“Iyo dak Buya. Tu nan den kamehan tadi tu apo tu yo?”, si Buyuang binguang lo jadinyo.
Dak jauah dari sinan mancogok amai-amai mangaka padi. Mancaliak garin jo si Buyuang manunjuak-nunjuak ka arah padi nan tajamua tu, di dakek i nyo lah urang baduo tu.
“Ado a tu Buya? Dek mancaliak-caliak jo kaarah waden dari tadi?”
“Iko Mai ha. Tadi den suruah si Buyuang mambangkik ubek nan den jamua ko. Tu lai dibangkiknyo, tapi indak nan den jamua ko nan dibangkinyo doh, nan dakek padi Amai tu nan dikamehannyo!”
“Dak ado rasonyo ubek nan tajamua dakek padi tu doh!”, jawek Amai ka garin
“Ado tadi Mai, disabalah padi tu bana den kamehan tadi ha!”, kecek si Buyuang mayakinan Amai ko.
Tadiam Amai ko sabanta mangana-ngana baliak kok ado nan salah.
“Nan den caliak dak ado apo-apo nan tajamua salain padi den tu doh. Tapi rasonyo ado suaro kambiang mambebek tadi. Tapi den alau dari jauah jo nyoh dak ado den cigok kamari doh!” jawek Amai ko.
Dak lamo sudah tu langsuang bagamuruah paruik garin.
“Wuueeek!”………………

Advertisements

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s