Sumbayang Bakana

Pagi ko si Buyuang  maambiak uduak untuak sumbayang subuah di batang aia di balakang surau. Ado rang gaek nan samo lo jo inyo sadang tagak bamanuang di tapi batang aia tu.

“Nah pak sumbayang subuah bajamaah wak disurau!”, kecek si Buyuang ka gaek tu.

“Aden lah sumbayang!”, jawek gaek tu singkek.

“Bilo lo apak sumbayang. Awak jo samo tibo di tapi batang aia ko. Aden maambiak uduak, apak masih tagak jo disiko lai”, tanyo si Buyuang jo binguangnyo.

“Dak nampak dek ang den sadang tagak ko!”

“Tu kalau tagak baa?”, batambah binguang si Buyuang jadinyo.

“Sumbayang ko cukuik dikana sajo, karano Tuhan tu sangaik dakek jo awak. Bahkan labiah dakek padi nadi wak surang-surang!”, kecek gaek ko manjalehan ka si Buyuang.

“Ma lo ado sumbayang nan takah itu tu pak!”

“Den jalehan bana dak ka mangarati gai ang doh. Isuak lah gadang ang, mangarati ang makasuik den ko mah!”

Pas salasai kumandang azan subuah, si Buyuang langsuang pai ka surau maninggaan gaek tu surang di tapi batang aia. Sasudah sumbayang subuah ditanyoan nyo lah ka garin dek si Buyuang ko pakaro kajadian di tapi batang aia tu.

“Buya, yo ado sumbayang bakana?”

“Dima lo tau ang sumbayang bakana tu tu Yuang?”, batanyo baliak garin ka si Buyuang.

“Tadi wakatu den maambiak uduak di tapi batang aia, ado pak gaek nan di kampuang subarang tu mah. Inyo sumbayang bakana disinan. Inyo bana nan manyabuikan ka den!”

“Dak ado nabi awak maajaan sumbayang takah itu tu doh Yuang. Kini mode ko selah, Buya agiah contoh ciek dih!”

“A tu Buya!”

“Lah tau Buyuang sia abak Buyuang nan sabana e?”

“Alun. Tu a hubungannyo jo sumbayang bakana Buya?”

“Tiok sabanta Buyuang batanyo ka amak sia abak Buyuang sabana e dak!”

“Iyo!”

“Tapi tetap dak tau kan!”

“Iyo!”

“Mode tu lo sumbayang ko. Sadang dikarajoan jo, alun tantu doa awak dikabuaan Tuhan lai apolai cuma dikana. Cubo Buyuang pikiaan, alah Buyuang mintak panjalehan ka amak, dak jo dijaweknyo doh dak. Apolai cuma Buyuang kana, tu tambah dak dijaweknyo tanyo Buyuang dek amak!”

Tamanuang si Buyuang mandanga panjalasan garin sabanta ko. Di inok-inok i nyo kato guru nyo tu. Tamakan deknyo panjalasan garin ko.

Bisuak paginyo basobok lo si Buyuang jo gaek kapatang. Masih samo jo kapatang gaek tu bamanuang di tapi batang aia. Tapi kini si Buyuang dak ado mangecek apo-apo ka gaek tu doh. Dek lamo bana kanai pandang agak mangarinyik dari si Buyuang, batanyo lah gaek ko,

“Manga ang mangarinyik ka den Yuang?

Si Buyuang dak manjawek tanyo gaek tu doh, malahan batambah karuik kaniangnyo mancaliak gaek tu.

“Batambah mangarinyik nan ka lai. Ang jawek dak tanyo den ko. Sakali lai den tanyo indak jo ang jawek, den ambuangan ang ka dalam batang aia ko! Baa ko mode tu bana caliak ang ka den?”

Dek takuik kanai ancam, iyo lah dijawek tanyo gaek ko,

“Apak mijak cik kabau!”, kecek si Buyuang agak katakuik an

“Baa dak ang agiah tau dari tadi!”

“Kan lah den agiah tau tu!”

“Bilo ang agiah tau?”

“Sabanta ko mah. Den kana!”.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s