Baruak Gadang

Si Buyuang nan kebetulan sadang dirumah di suruah dek amaknyo mancari tukang baruak,

“Yuang ang japuik mak Usuih lah. Kecek an Amak ka mamanjek kambie! Bisuak hari balai ko ha, buliah bisa lo dibaok kambie tu ka balai!”

Iyolah pai si Buyuang mancari mak Usuih tukang panjek baruak nan terkenal di Kampuang tu. Sasampai ditampek mak Usuih, nampak baliau sadang mangopi lamak sambia maagiah makan baruak kasayangan nyo tu.

“Mak, Mak Usuih, amak den manyarayo mamak mamanjek kambie!”

“Jadih, pulang lah ang lu. Salasai den mangopi langsuang den ka tampek amak ang ko!”, jawek Mak Usuih sambia manonoh kopinyo.

Dak lamo si Buyuang tibo di rumah, Mak Usuih lah nampak lo mancogok dibaliak kelok nan dak jauah dari rumah nyo tu doh.  Sasudah salasai baretong jo si Romlah, Mak Usuih langsuang ka palak nan dibalakang rumah untuak manurunan kambie sasuai jo pitunjuak nan punyo palak.

Mancaliak baruak gadang punyo Mak Usuih nan kancang mamanjek kambie tacangang si Buyuang dibueknyo.

“Santiang baruak Mak mah. Cigin lari e kateh!”

“Lah itu karajo e tantu iyo mangarati baruak ko. Awak tingga mamarintah se lai, langsuang dikarajoannyo mah!”, baleh Mak Usuih.

Sadang lamak di ateh batang kambie tu, tibo-tibo mancibia-cibia baruak gadang ko. Di endek-endek e palapah kambie tampek nyo bapijak.

“Manga baruak tu tu mak?”, tanyo si Buyuang

“Tando protes nyo tu Yuang. Baruak ko kalau dak sanang yo mode itu, dicibiaan e awak!”

Maangguak-anguak lah si Buyuang mandanga panjasan Mak Usuih ko. Alun salasai mak Usuih manurunan karambie tu, si Buyuang lah pai se maninggaan baliau. Nan namonyo anak-anak tantu pangananyo main sajo. Dicari-carinyo lah kawan nan bisa diajak main. Tibo dimuko  lapau tampek biaso Si Atai bakoa, tatagun langkahnyo sabanta. Dicaliaknyo si Atai sadang mete-mete dak katantuan. Dituruiknyo lah si Atai ko,

“Dek a Om mete-mete jo nampak di den!”, sapo si Buyuang mamulai kecek.

“Paniang den mancaliak induak samang den di kantua. Dak ado nan bana karajo den nampak dek nyo doh. Salah sado e jo.!”, batambah basisunguik si Atai dek disapo si Buyuang mode tu.

“Kecek an lah ka induak samang Om tu. Disiko ma tadanga dek e!”, sakali ko pandai lo si Buyuang maagiah nasehat.

“Ma talok dek den Yuang. Inyo induak samang, waden ko anak buah nyoh, kanai pecat den nan kala i tu nyoh!”, agak malunak suaro si Atai sangenek.

“Kalah lo Om dek baruak gadang Mak Usuih tu!”

“Makasuik ang baa ko Yuang?”, tanyo si Atai penasaran

“Tadi baruak Mak Usuih mamanjek kambie amak den. Ado nan dak katuju dek e, langsuang dicibiaannyo Mak Usuih. Di endek e sado palapah kambia. Mak Usuih tu induak samang nyo lo tumah. Dak ado gai kanai pecat baruak gadang tu doh!”, jawek si Buyuang.

Langsuang tadiam si Atai mandanga panjalasan si Buyuang ko.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s