Bisa Baranang

Malam minggu biasonyo anak-anak kampuang tangah ko main sampai laruik malam. Mode tu lo malam minggu kini ko, si Buyuang lah siap-siap main samo-samo. Kini ko karak-karak ko ka main semba lakon. Biasonyo si Buyuang bakalawanan jo si Bigau kalau main semba lakon ko komah, tapi kini nyo bamandan malawan partai si To’o. Giliran partamo kalompok si Buyuang nan manjago kandang, kalompok si To’o nan manjadi bandik nan harus ditangkok sadonyo. Kalau lah dapek sado lawan, baganti nan jadi lakon nyo, baitu sataruihnyo sampai karak-karak ko panek.

Kutiko si Buyuang nan manjadi bandik, inyo mahandok sasarik mungkin supayo jan kanai tangkok. Kalau kalompok si To’o lengah, kawan-kawan si Buyuang nan kanai tangkok tu bisa dilapehan sacapeknyo. Sakali ko si Buyuang mamanjek batang jambu nan cukuik gadang, sahinggo sakileh dak nampak gai ado urang di ateh batang tu doh, apolai ditambah hari malam lo. ‘Pinjaro’ tampek kawan-kawannyo nan kanai tangkok dak bara jauah dari batang jambu tu doh. Kebetulan si Bigau lah tatangkok. Sakuaik tanago si Buyuang bausaho supayo si Bigau lapeh.

Saking sumangaiknyo mamanjek, inyo lupo bahaso tadi sore hari hujan. Batang kayu nan banyak lumuik tu sangaik licin, tibo-tibo..

“Buukkk”, tadanga bunyi cubadak jatuah.

“Aduuuuuuuah”, tadanga sakareh-kareh antah si Buyuang mararau tajatuah dari batang jambu. Katiko ditolong dek si Bigau, ado darah nan mangucua dari kapalo balakang si Buyuang nan kebetulan taantuak batu. Mancaliak darah tu si Buyuang langsuang pingsan.

Dek karano hari malam, rumah sakik jauah tapaso si Buyuang di baok ka tampek mantari Muih nan rumahnyo lai dak jauah bana dari kampuang tangah tu doh.

Bisuak paginyo si Buyuang lah sadar. Dicaliaknyo sakuliliang rami urang maunyiannyo. Ado kawan-kawan nan samo main semba lakon, ado garin dan dak tingga amaknyo si Romlah.

“Ka malawan jo ang ka amak lai Yuang. Lah amak tagahan jan mamanjek –manjek juo, dak ang dangaan kecek amak ang ko doh. Ko mah kini jadi e, bajaik kapalo ang!”, sambia berang aia mato si Romlah kalua juo. Mandanga kapalonyo bajaik, tabik lah tangih si Buyuang ko.

“Antok lah ang Yuang, dak baa gai kapalo ang kodoh. Memang bajaik kapalo ang, tapi dak babahayo bana doh!”, Mantari bausaho mananangan si Buyuang.

“Etek jan lo rusuah, dak baa gai doh. Paliang istirahat duo hari lah bisa si Buyuang ko mode samulo mah!”, kecek mantari Muih ka si Romlah.

“Yo bana tu Mantari?”

“Iyo. Anak laki-laki ko biaso se lasak nyoh. Tapi ingek sabalun masiak jaik kapalonyo, jan sampai kanai aia dak, beko mudo luko tu liak!”

“Bara hari lo mako ka masiak tu pak Mantari?”, tanyo si Buyuang

“Sabanta tu nyoh. Ado nan tigo hari, ado nan ampek hari paliang lamo saminggu. Sudah tu lah dak baa kanai aia tu doh. Manga kanai aia baranang gai lah bisa tu mah!”, jawek Mantari ko manggadangan ati si Buyuang.

“Yo bana bisa den baranang tu pak Mantari?”, tanyo si Buyuang panasaran.

“Iyo, dak bagarah gai ambo doh, tapi iyo saraiknyo masiak an lukonyo lu!”

“Ondeeh. Mokasi banyak pak Mantari. Mokasi banyak!”, diciumnyo acok-acok tangan Mantari ko dek si Buyuang.

Agak tabinguang-binguang Mantari ko mancaliak parangai si Buyuang,

“Biaso se tu nyoh Yuang. Dak mode tu bana lo ang paralu mintak tarimo kasih ka ambo doh!”

“Yobana sanang hati den kini pak Mantari. Dak paralu den baraja panek-panek lai doh!”

“Makasuik dak paralu baraja ko apo ko?”, tanyo Mantari kaheranan

“Lah lamo den baraja baranang mah pak Mantari, tapi indak juo amuah bisa baranang doh. Kecek pak Mantari tadi kalau luko den lah masiak den langsuang bisa baranang. Tantu iyo sanang bana ati den!”…

Tahantok Mantari sabanta mandanga kecek si Buyuang tu sambia mamikia-mikia dima rasonyo kalimaiknyo nan salah tadi tu.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s