Kantuik Gadang

Malam ko adolah hari terakhir si Buyuang jo kawan-kawan mangaji jus ama. Kalau lai katam nan sakali ko, malam bisuak lah bisa masuak ka Al Quran gadang. Nampak bana si Buyuang basumangaik mangaji malam ko, nyo dak nio kalah dari kawan-kawannyo doh. Anak-anak disuruah dek garin mahapa kaji dalam hati dulu, kalau lah hapa baru dibaco kareh-kareh. Sadang lasuah-lasuahnyo mahapa mangaji, tibo tibo tadanga bunyi,

“Tuuuuuuuuuuuuut”, malatuih kantuik nan dak siagak gadangnyo doh, apolai sado urang sadang khusuak mangaji tantu jaleh bana tadanga bunyinyo.

Si Buyuang nan takajuik mandanga bunyi kantuik tu, langsuang mancaliak ka arah si To’o. Tanpa ado nan mangumando sado urang mancaliak lo ka arah si To’o. Muko si To’o langsuang merah padam takah udang masak. Dak tantu a nan ka disabuiknyo doh. Sasaaik suasana dalam surau haniang sabana haniang saakan sado urang manyidang si To’o dalam bantuak tatapan diam urang sabalik. Suasana tu kudian dipacahan dek suaro garin,

“Indak bataratik ang ko doh To’o. Capek ang ambiak uduak ka bawah, tu baliak kamari manarimo hukuman. Kok indak, tau se lah ang akibaiknyo!”, suaro Buya tadanga baitu sanganyo.

Si To’o patuah sajo mandanga parintah garin dalam kabinguangannyo. Satibo di dalam surau, rambuik dan dakek talingonyo kanai jinjiang dek garin, sudah tu malakik urang salasai mangaji inyo disuruah tagak kaki itiak sambia mamacik talingo jo caro manyilangan tangan dimuko kawan-kawan sadonyo.

Lah salasai urang mangaji, salasai pulo hukuman si To’o. Anak-anak nan mangaji tadi lah bi pulang, tingga se di surau salain garin adolah si Buyuang, si Bigau jo si To’o. Katiko garin masuak ka dalam biliaknyo, tibo si Buyuang jo si Bigau mandakek i si To’o.

“Baa dek ang lapehan bana kantuik ang tadi tu To’o. Tahan gai lah sangenek, kalau balasuih kan dak ado nan tau tu doh!”, kecek si Bigau ka si To’o.

“Ma tau den tu. Aden lah binguang lo mah, tibo-tibo urang lah mancaliak jo ka den sadonyo!”, si To’o mambela diri sangenek.

“Maafan den yo To’o!”, tibo-tibo si Buyuang basuaro.

“Ang iyo lo Yuang. Kalau dak salah waang nan partamo mancaliak ka arah si To’o tadi dak!”, solo si Bigau.

“Batua. Tapi nan den mintak maafan bukan pakaro mancaliak tu!”

“Jadi apo?”, tanyo si Bigau.

“Sabananyo nan takantuik tadi tu waden!”

“Kalera ang mah. Dek gara-gara parangai ang, waden nan kanai hukum dek Buya. Tu baa kok ka waden ang mancaliak tadi?”, si To’o mulai marameh tangannyo bantuak ka maninju si Buyuang.

“Tadi tu kantuik den lah sasak bana. Den lah bausaho manahannyo supayo balasuih. Dek indak tahan kalua bunyi nan kareh. Dek takajuik mandanga bunyi nyo, den bamukasuik maandok an muko supayo jan ketahuan bana. Kironyo pas den malengah tu mungkin urang manyangko aden mancaliak urang nan takantuik!”, jawek si Buyuang agak takuik-takuik kok iyo kanai tinju nyo dek si To’o beko.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s