Maunyian Durian

Lah saminggu lo musim durian tibo, tapi si Buyuang alun juo mangicok buah kesukaannyo tu lai doh. Takana dek nyo keluarga si To’o punyo batang durian di rimbo takuruang. Sagan pai surang ka rumah si To’o, diajak lah si Bigau dek si Buyuang ko maaka i si To’o supayo dapek durian perai.

“Eh, ado a ko kalian baduo kamari? Jarang-jarang ko nyoh!”, tanyo si To’o ka kawannyo nan baduo tu.

“Si Buyuang taragak makan durian To’o!”, jawek si Bigau.

“Waang kan iyo lo nio mah Gau!”, si Buyuang mambela diri snek.

“Oooo, itu. Aman tu, kebetulan beko malam den ka maunyian durian di rimbo takuruang mah. Rencana den pai jo uda den, tapi kalau ang lai namuah mangawanan den beko malam ancak bana. Den kecek an se ka uda den beko, ancak nah rami-rami wak ka rimbo!”

“Lai dak berang lo uda ang tu beko tu To’o?”, tanyo si Buyuang.

“Indak gai doh. Ciek lai kalau ang ikuik, kan ado nan ka disuruah-surah uda den beko salain aden tu!”, jawek si To’o mayakinan kawan nyo ko.

Sekitar jam sambilan malam lah tibo si Buyuang jo si Bigau di rumah si To’o. Dak saba pareman nan baduo ko pai maunyian durian, karano salain bisa dapek makan durian perai pengalaman nan mode ko jarang lo di dapek. Untuak maunyian durian ruponyo dak paralu capek-capek bana pai ka rimbo doh, karano durian ko acok jatuah salapeh jam duo baleh malam. Lah labiah sapuluah minik dari jam duo baleh malam baru rombongan si To’o barangkek ka rimbo takuruang nan dak talalu jauah dari rumahnyo doh, paliang sekitar satangah jam bajalan kaki sampai di lokasi nan dituju. Satibo di rumpun durian, uda si To’o langsuang manyuruah pareman batigo tu manyisia katigo batang durian nan ado disinan siapo tau lah ado atau alun buah durian nan jatuah.

“Jan lamo-lamo bana di kalian di bawah batang durian tu dak! Beko kok ado buahnyo nan jatuah kanai kalian ko!”, kecek uda si To’o sambia maiduik an api unggun di muko pondok.

Sekitar sapuluah minik mamareso, lai juo barasaki pareman tu. Dapek juo duo buah durian walaupun ketek-ketek.

“Kalian lapoh se lah durian tu. si Buyuang lah maeleh aia liua nyo tu a!”, kecek uda si To’o.

Tanpa baso basi durian nan duo tu dikubak dek si Buyuang jo si Bigau sambia bacirabuik maabihannyo.

“Ang dak sato ko To’o!”, kecek si Bigau

“Abihan selah dek ang baduo tu, aden lah acok makan durian ko mah!”, baleh si To’o.

Lah labiah sajam maunyian durian, lun jo ado durian nan jatuah lai. Sambia mailangan kantuak uda si To’o bacarito kasinan kamari supayo adiak-adiak nan sato maunyian tu indak lo takuik dek suasana rimbo nan kalam ko. Dak lamo sudah tu, si Buyuang mangode si To’o

“Jauah banda dari siko To’o?”, tanyo si Buyuang.

“Manga ang ka banda?”

“Aden sak ook a! Alah mamilin-milin bana raso e!”

“Itulah ang, cangok bana jo durian!”, solo si Bigau.

“To’o ang antaan si Buyang ka banda lah. Capek snek, beko tacuru lo dakek siko, marasai wak dek baun e ko!”, kecek uda si To’o mamarintahan adiaknyo tu.

Iyo lah diantaan dek si To’o si Buyuang ko ka banda nan indak talalu jauah dari pondok tu doh.

“Yuang, den tungguan ang disiko yo. Ang jalan jo lah ka banda surang, sangenek lai dimuko tu banda mah!”, kecek si To’o ka si Buyuang.

“Jadih!”, jawek si Buyuang sambia agak balari dek lah sasak bana, sampai-sampai lupo nyo maminjam senter dari si To’o.

Sampai jam tigo malam dek alun juo ado nan jatuah durian tu, takalok lah pareman nan batigo tu. Tingga se uda si To’o nan tajago surang lai. Barulah manjalang subuah jatuah durian sekitar anam buah nan lai gadang-gadang ukurannyo. Sampai matohari mulai tabik ciek tambahan durian dari nan anam tadi tu nyoh.

“Oi, jago lah kalian. Babaliak wak lai, matohari lah tinggi ko a!”, kecek uda si To’o manjagoan pareman nan batigo tu.

Sanang bana hati si Buyuang jo si Bigau, lai manjinjiang durian pulang dari rimbo. Di tangah jalan mereka basalisiah jo tek Iyok, nan indak lain masih dunsanak juo dek si To’o.

“Kama Tek?”, tanyo si To’o.

“Mancari sabuik untuak ka mamasak!”, jawek tek Iyok.

“Di pondok masih ado sabuik mah Tek, ambiak se lah bara etek paralu!”, kecek uda si To’o.

Sasampai di rumah si To’o, kironyo mereka ko lah disambuik dek katan angek nan dibuek an dek amak si To’o.

“Lai barasaki kalian mah, iko katan amak buek an a. Makan lah bara talok!”, kecek amak si To’o ka si Buyuang jo si Bigau.

Yobana lapeh salero si Buyuang jo si Bigau, sampai-sampai  dak talok tagak lai dek kakanyangan. Lamo juo jadihnyo pareman nan baduo ko dirumah si To’o untuak manganduaan urek paruiknyo. Dak lamo sudah tu nampak tek Iyok bajalan tasasak karumah si To’o.

“Sia nan Punyo karajo ko?”, langsuang tek Iyok maadok an sabuik karambia nan diguluang baliak dek tek Iyok ko, seakan-akan masih bantuak karambia nan alun basulo. Dijawek lah sabuik tu dek uda si To’o sambia mambukak guluangannyo.

“Oooondehhh. Apo nan ang buek ko Yuang!”, sasak angok uda si To’o deknyo karano pas di bukak sabuik tu, mangapuok baun nan indak basiagak dari cirik nan ado di dalamnyo.

“I..ii..iyo, malam tu lah sasak bana. Den disuruahnyo dek si To’o ka banda surang. Keceknyo banda dak jauah lai doh, tapi dak basobok dek den banda tu doh, karano kalam bana. Tibo-tibo tasipak dek den sabuik karambia, tu den panca an jo disinan lai!”, jawek si Buyuang agak takuik-takuik.

“Tu dak cebok gai ang tu doh?” tanyo si To’o penasaran.

“Alah, pagi wakatu wak ka pulang den kajaan tadi!”

Langsuang tajiloek si To’o jo si Bigau mandanga jawek si Buyuang tu.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s