Maadu Ayam

Tanah lapang nan indak jauah dari batang aia kampuang tangah tu nampak urang rami-rami disinan. Si Buyuang nan mancaliak urang rami ko langsuang mandudu kasinan. Ruponyo urang sadang maadu ayam. Diantaro urang rami tu, manyalek si To’o jo udanyo lah mamacik ayam jantan gadang lo saikua.

“Sato lo ang maadu ayam To’o?” tanyo si Buyuang ka kawan nyo tu.

”Rugi kalau dak sato Yuang. Hadiahnyo gadang, sia nan manang dapek pitih sajuta!”

“Sajuta ko bara ko To’o?”

“Pokok e banyak lah. Kalau ang balian pitih sajuta tu ka karupuak, panuah biliak kantua amak ang deknyo  mah!”

“Oooo, iyo banyak mah yo. Baa caronyo supayo bisa dapek pitih sabanyak tu tu!”, tambah penasaran si Buyuang jadinyo.

“Nampak dek ang, ayam jantan gadang nan di pacik dek apak nan pakai baju itam tu a!”

“Lai. Tu baa?”

“Kalau bisa wak mangalahan ayam baliau tu duo kali, langsuang pitih sajuta tu jadi punyo awak. Makonyo den sato lo, sia tau den bisa manang!”

Mandanga panjalasan si To’o tu, bamanuang si Buyuang ko sabanta. Dak lamo sudah tu lah mailang sajo si Buyuang ko antah kama. Kiro-kiro satangah jam sudah tu lah babaliak lo si Buyuang ko liak, tapi kini nyo lah mambaok lo ayam jantan saikua.

“Den sato lo ciek To’o. Baa ayam ang tadi lai manang?”, kecek si Buyuang.

“Manangguangan nyoh. Caliak lah dek ang tu a, bantuak kanai akuak ayam den dek kalah santa ko!”

“Den sato lo ciek lu!”

“Dima dapek ayam dek ang Yuang?”, tanyo si To’o.

“Antok se lah ang. Kok manang beko den agiah ang pitih tu senek!”

“Tunggu lu, jan main masuak se dulu, bayia insetnyo 30 ribu piah lu!”

“Den dak ado pitih sabanyak tu doh To’o, baa caronyo lai tu?”

“Aden ado pitih ko ha, tapi kalau manang ayam ang saparo hadiahnyo untuak den dih!”,  tasenggeang manih si To’o manawaran jalan kalua untuak si Buyuang.

Tadiam si Buyuang sabanta, raso kanai karajoan dek kawannyo ko lai lo. Tapi ka dipangaan lai, dek indak bapitih tapaso satuju jo tawaran si To’o ko.

“Jadih nah, den satuju. Bayia lah lai, buliah wak caliak lo kepoh ayam den ko ha!”

Ronde partamo iyo manang ayam si Buyuang ko, tapi ronde kaduo kalah. Di ronde katigo basijadi ayam ko baradu, saliang malukoi. Tapi malang susuah ayam jantan punyo  apak nan babaju itam tu masuak kanai mato ayam si Buyuang. Nene ayam si Buyuang dibueknyo, langsuang disemba ayam ko dek si Buyuang.

“Alah tu pak, kalah ayam den!”, kecek si Buyuang sambia mamacik ayam nan lah takulai ampia mati tu.

“Dabiah se lah ayam ang tu lai Yuang, pado mati beko duo kali bana wak rugi!”, kecek si To’o.

Iyo lah didangaan nyo dek si Buyuang pandapek kawan nyo tu. Sasudah badabiah ayam tu, dibaok pulang dek si Buyuang.

“Mak tolong gulai an ayam ko ciek!”, mulai lah si Buyuang mambujuak rang gaeknyo tu.

“Dima dapek ayam dek ang tu Yuang?”, tanyo si Romlah heran.

“Iko ayam aduan nan kalah tadi ko mah, pado mati tu di dabiahnyo dek uda si To’o tadi. Nan jaleh ayam amak aman, dak saikua pun nan ilang doh!”

Lai tanang si Romlah mandanga jawek dari si Buyuang. Lah masak gulai ayam tu, disuruah lah si Buyuang dek amak nyo tu maantaan gulai ko ka garin di surau.

“Buya, iko ado gulai ayam. Amak den tadi manyuruah kamari maanta untuak Buya!”

“Ondeh, mokasi banyak Yuang. Pas lo jam makan siang kini mah. Imbau  si Bigau di bawah lah, makan samo-samo wak!”, kecek garin ko mamarintahan anak asuahnyo ko.

Balanjuang juo murid jo guru tu jadinyo. Sadang lamak makan, batanyo si Buyuang ka gurunyo ko.

“Buya, lai buliah makan ayam bakeh kalah aduan?”

“Jadi iko ayam aduan nan kalah ko?”, tahanti makan garin tu sasaaik.

“Iyo, tapi tadi lai badabiah sasuai parintah agamo Buya!”, kileh si Buyuang.

“Ooo, baitu. Memang makannyo dak badoso wak doh, tapi maadu ayam tu dilarang bana dek agamo mah Yuang. Samo jo manyiso binatang tu. Jadi maadu ayam ang tadi Yuang?”

“Sakali ko baru Buya, ciek lai den dak lo tau itu pabuatan doso doh!”

“Bisuak ko jan diulang jo lai dak, mudah-mudahan dek waang indak tau ko, lai diampuni Tuhan doso ang!”, diulang suok dek Buya ko manaruihan makannyo liak.

“Amin. Iyo Buya dak den ulang sudah ko lai doh!”

“Tu lai dak berang amak ang, mancaliak ayamnyo kalah ang adu?”

“Apo lo nan ka diberangannyo, dak ayam nyo nan den adu doh!”

“Tu ayam sia nan ang adu tu?”

“Ado nampak dek den tadi ayam jantan gadang di laman surau ko, itu nan den baok!”

“Apo kecek ang Yuang!! Patuik lah den cari-cari dak nampak ayam jantan den ko dari tadi doh!”, mangamuak gadang garin ko, sambia manjinjiang rambuk dakek talingo si Buyuang.

Advertisements

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s