Padukun

Ado duo urang padusi lewaik di muko surau, bantuaknyo surang induak surang anak, saroman urang kabinguangan mancari alamaik. Si Buyuang nan kebetulan sadang duduak di laman surau manyasek urang nan baduo tu.

“Mancari sia Nde?”

“Eh, iko ha, kami mancari rumah dukun Piri. Lai tau ananda rumah baliau dak?”, baleh padusi nan labiah tuo.

“Lai Nde, tapi jauah dari siko lai. Rumahnyo di kaki Gunuang nan di muko wak kini ko ha. Kalau bajalan kiro-kiro sajam lai lah. O iyo namo den Buyuang indak ananda doh!”

“Oh iyo Yuang, bari maaf kami. Kiro-kiro namuah dak Buyuang maanta kami ka rumah dukun Piri tu?”

“Baa yo…!!”

“Baa yo, baa mukasuik Buyuang ko!”, kabinguangan lo padusi tu mandanga jawek si Buyuang.

“Ooooo, rumahnyo dek jauah tu ha. Baa ancak yo..!”

“Ooo mangarati Ande lai. Aman tu Yuang, ado uang jalan Buyuang beko tu!”

Mandanga ado uang jalan tu, langsuang tabik sumangaik si Buyuang. Bagageh nyo maanta kaduo induak-induak tu ka rumah dukun Piri. Dak taraso gai jauah bajalan dek nyo doh. Salapeh maanta urang nan mintak tolong tadi tu, si Buyuang mangalai-ngalai di bandua surau malapeh panek.

“Baa dek gadang-gadang tu bana paluah ang Yuang? Dari ma ang tadi?”, tanyo garin ka si Buyuang.

“Baliak maanta urang dari rumah dukun Piri Buya?”, jawek si Buyuang.

“Manga urang tu ang anta kasinan?”

“Manga juo lai kalau dak pai barubek!”

“Itu ciek nan alun namuah abih dek urang awak ko. Pai barubek ka dukun tu lah mandarah dagiang bana, sahinggo dak tau bagai lai bahaso itu pabuatan nan paliang dibanci dek Tuhan!”

“Baa kok banci Tuhan Buya?”

“Baa mangko dak ka banci pulo, badukun tu samo jo mampasakutuan Tuhan dan itu adolah pabuatan siriak. Narako jahanam tahanan nyo nantik tu!”

“Oo mantun, untuang den dak sato-sato!”

“Dak sato baa pulo kecek ang ko Yuang. Waang kan tukang antaan nyo mah, itu tamasuak lo manunjuak an urang ka jalan nan salah. Sato lo badoso tu mah!”

Tadiam si Buyuang mandanga panjalasan garin tu. Dak lamo sudah tu ditutuahnyo maraung sakareh-kareh antah, paniang lo garin ko mahantok an.

“Alah tu Yuang. Kalau ang lai manyasa, mudah-mudahan diampuni Tuhan doso ang. Antok lah ang, pakak talingo den mandanga nyo a!”, garin bausaho mambujuak si Buyuang supayo baranti manangih.

Nan tangih ko batambah kareh tadanga. Tapi tibo-tibo tadiam si Buyuang ko.

“Kan rancak mode ko tu a. Buliah wak manyasali pabuatan, tapi dak harus maraung-rauang tu doh!”, dikusuak-kusuaknyo kapalo si Buyuang dek garin ko.

“Iyo mah Buya. Lai dak sadiah bana den lai doh. Dak takuik den masuak narako doh, lai ado kawan den kironyo!”, baleh si Buyuang sambia masih ado taisak sasakali.

“Ado kawan baa kecek ang ko Yuang?” tanyo garin penasaran.

“Buya kawan den mah. Kalau lai ado Buya di narako lai dak takuik bana den doh, ado nan ka manjalehan ka malaikaik isuak!”

“Baa lo kok waden nan ka jadi kawan ang di narako Yuang?”

“Awak kan samo-samo lahia jo dukun mah Buya!”….

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s