Basobok Kawan Lamo

Sajak kajadian si Buyuang mananyo sia apak nan sabananyo, si Badu dak talok tingga di kampuang lai doh. Inyo maraso malu bana, sahinggo ditinggaannyo si Romlah baduo jo si Buyuang tanpa ado kajalasan. Dari kampuang marantau ka kota mancari karajo apo sajo nan dapek nan pantiang indak ka balakang suok ko. Lah salambek a lo kolah maninggaan kampuang, tibo-tibo si Badu mancaliak ado urang nan raso-raso nyo kenal.

“Andi yo?”, tanyo si Badu ka urang nan ado dimukonyo tu.

“Angku sia, kok tau namo den Andi?”, balehnyo ka si Badu.

“Tantu iyo tau den, tatulih di dado kawan namo Andi mah. Dak takana dek kawan sia waden doh?”, si Andi dak sadar bahaso inyo sadang mamakai baju seragam keamanan.

“Iyo lupo den. Sia yo?”

“Lai takana dek kawan waktu kito SMA dulu, nan maagiah bangku guru jo kacang miang. Sahinggo perai wak baraja wakatu tu mah!”

“Ondeeeeh, waang Badu. Iyo lupo bana den tadi tu mah. Ciek lai bantuak ang lah barubah bana kini ko, alah kuruih lusuah lo lai!”

“Itulah kawan, parasaian iduik namonyo ko mah!”

“Dak itu doh, den kamehan karajo den senek lai lu dih. Sangah jam lai den pulang mah, duduak lah disiko dulu beko bacarito lamak wak di rumah den!”, si Andi bagageh manyalasaian karajonyo.

Sasampai di rumah si Andi, bacarito lamak lah kawan lamo nan alah lamo indak basobok ko. Sado parasaian si Badu tatumpah ka kawan nyo ko, tamasuak parangai si Atai nan lah mahancuakan harapannyo.

“Mode tulah caritonyo Ndi, paniang den. Kawan nan lah den anggap mode dunsanak surang, malah maampai bini den. Lamo den batahan, karano ibo jo anak nan indak tau apo-apo. Tapi kutiko anak den ko batanyo sia apak nan sabananyo, iyo abih kasabaran den!”

“Alah tu mah Du, tanang se lah ang di siko lu. Tingga lah di tampek den bara takana dek ang!”

Rumah si Andi ko sabananyo indak rumah doh, labiah tapek di sabuik kadai. Salain jadi satpam, si Andi manyewoan VCD di kadai ko. Ruangan di bagi jadi duo, bagian muko tampek etalase VCD nan bagian balakang jadi tampek lalok. Ikolah nan disabuik dek si Andi ko rumahnyo.

“Lai laris rental VCD ang ko Ndi?”

“Lumayan lah. Pelanggan den banyak mahasiswa nan tingga disekitar siko. O iyo, den cari lah makan ancak lu dak. Ang tunggu i kadai ko sabanta dih. Beko kok ado pangunjuang nan nio marental pilem, sewonyo tigo ribu motuih ciek, tigo pilem sapuluah ribu. Jan lupo mintak tinggaan KTP atau kartu mahasiswa sabagai jaminannyo yo!”

“Aman tu!”

“Apo samba ang Du?” tanyo si Andi nan lah siap barangkek mancari makan malam.

“Samo jolah jo samba wang Ndi!”

Si Andi dek lah lamo dak basobok jo si Badu, diusahoannyo manyerpis kawan nyo ko. Dicari makan nan paliang lamak sahinggo iyo agak lamo maninggaan si Badu di kadai jadinyo. Maraso alah cukuik makanan nan dibali, bagageh lah si Andi baliak ka kadai.

“Baa Du, lai ado pelanggan nan tibo?”, sasek si Andi ka si Badu nan sadang asik manulih di buku daftar pinjaman.

“Ado ampek urang Ndi. Iko pitihnyo a!”, diagiahan lah pitih sewo ko ka si Andi.

“Kecek ang ampek urang, baa kok tigo ibu motuih pitih e nyoh?”

“Iko lai den catat namonyo a. Nan partamo namonyo si Jon. Badan e tinggi gadang, batato lo. Keceknyo lah biaso maminjam jo waang dan dak pernah ang mamintak pitih sewo doh. Nan kaduo ado duo anak gadih kamek. Yo bana kamek deang  Ndi, pakai baju katebe, sarawa pendek lo. Mulus bana paho e nampak di den. Wakatu den mintak pitih sewo, di kijok nyo den, tu keceknyo bisuak pas mamulangan pitihnyo yo da. Nak tantu nan ka den jawek doh, sampai lah ilang nyo dari kadai baru sadar den!”

“Ondeh Du, mode ko tekor den komah. Tu nan katigo pilem a nan disalangnyo, baa kok dak ado catatannyo doh?”

“Namonyo Desi, tapi nyo mananyo pilem urang bansaik. Aden onyok an sado daftar pilem nan ado ko ha, dak iko keceknyo doh. Paniang den dek e, tu den tanyo pilem apo tu, merah muko e. Tu den suruah jo nyo mancari surang lai. Jadi dak tantu dek den pilem a nan diambiaknyo doh!”

“Badu…badu…!” sambia geleang-geleang kapalo dibukaknyo bungkuih makanan nan dibalinyo cako.

2 Comments

  1. udo….cunooooop….ma sambuangan carito sibungsu ko…….

    • itulah nan lah paniang lo kito.. dak basobok sumbernyo lai doh….


Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s