Mamanciang

“Du, den hari ko off. Pai manciang wak beko sore lah!”, ajak si Andi ka si Badu.

“Jadih, dak baa doh. Dima wak mamanciang?”

“Di muaro, dak jauah gai dari siko doh. Sabalunnyo mancari umpan wak di banda dakek kampus di balakang  ko lu lah!”

Bajalan lah duo urang kawan ko mancari umpan untuak mamanciang beko sore. Sabananyo jo udang nan bisa dibali di Pasa sajo lah cukuik umpannyo mah. Tapi kalau jo caciang nan bacari dalam banda dakek kampus tu, labiah rancak lo lai. Caciang ko dak samo jo caciang biaso doh. Caciang ko bakaki sahinggo ikan muaro ko labiah capek dapek dan labiah baragam pulo jinihnyo nan bisa naiak. Salapeh sumbayang ashar, baru lah mereka ko barangkek ka muaro.

“Aden alun pernah mamanciang di muaro ko lai doh Ndi!”, kecek si Badu sambia mamasang umpan di mato kaia nyo.

“Samo sajo jo mamanciang di tabek nyoh. Lauaknyo sajo nan babeda nyoh!”

Mamanciang ko iyo butuah kasabaran nan labiah, karano kalau indak saba amuah tacampak an joran tu. Lah ampia sajam duduak di muaro ko, si Andi alun juo dapek ikan lai. Tapi si Badu lai agak mujua lai naiak sikua deknyo.

“Iko lauak a namo e ko Ndi? Bantuak maco nampak dek den!”, tanyo si Badu sambia malapehan mato kaia dari muncuang ikan nan di dapeknyo.

“Itu saridiang namo e tu. Tulang se nan banyak tu nyoh. Ancak ang ambuang an ka muaro ko liak, sagan wak jo urang. Kanai galak an wak beko kok manjinjiang saridiang ko pulang!”

Lamo kalamoan kasabaran si Andi yo lai tabayia jadinyo. Mulai baansua-ansua naiak pinang-pinang, gabua, patai-patai salaweh tapak tangan dan terakhir naiak mudin. Ikan mudin ko tamasuak ikan nan paliang dicari, karano salain dagiang nyo lamak mandapek an nyo memang agak payah lo. Kalau jo umpan udang dijamin mudin ko indak ka naiak doh. Badu nan dari tadi saridiang ka saridiang jo nan naiak dek nyo mulai hilang kasabaran.

“Alah mah Ndi. Panek den dek nyo ko mah.!” Kecek si Badu sambia malatakan joran di tapi muaro.

“Jan patah sumangaik tu ang Du. Pindah ang kamari lah, antah disiko lai barasaki ang!”, bujuak si Andi supayo si Badu masih namuah mamanciang.

Iyolah dituruik i nyo nasihaik kawannyo ko dek si Badu. Lai dak lamo sajak nyo pindah tu doh, mulai mancatuih joran ko. Malawua joran si Badu di bueknyo, bantuaknyo iyo lai gadang ikan nan ka naiak ko mah.

“Mpak dek ang Du, beda catuih e disabalah siko ndak!”, si Andi bausaho manggadangan hati si Badu.

“Iyo deang Ndi. Iko iyo sero ko mah, lai ndak saridiang nan ka naiak lai ko doh!”, basumangaik lo si Badu jadinyo.

Urang nan lah mulai rami mamanciang di muaro ko, mancaliak ka arah si Badu manaiak an ikan. Arok-arok cameh urang mancaliak gaya si Badu ko, bantuak pamanciang profesional nan acok kalua di tipi tu lo. Baitu naiak ikan panciangan si Badu ko, tabasuik galak urang sabalik.

“Baa dek galak urang tu Ndi?”, tanyo si Badu jo herannyo ka si Andi.

“Itu lauak bunta namo e tu kawan. Dak dimakan urang lauak tu tu doh!”

“Lah panek-panek den manaiak an lauak sagadang bola beten, kiro e dak lo bisa dimakan doh. Alah mah den pai ka lakang santa lu!”, mulai baganyi si Badu ko bantuak nyo.

“Kama ang Du? Jan pai se ang lu, iko lauak baru mulai namuah a!”, kecek si Andi manahan si Badu supayo masih namuah mamanciang.

Si Badu indak manjawek tanyo kawannyo tu doh. Inyo taruih jo bajalan ka baliak batu gadang nan banyak tasusun di muaro ko. Dak lamo sudah tu, mancogok si Badu ko liak. Lah duduak lo nyo di sampiang si Andi maresek joran nyo cako liak.

“Tu iyo tu Du, malakik dapek slahnyo se mamanciang ko nyoh. Kalau lah dapek mancandu ang mah!”

Walaupun dak dijaweknyo komentar kawan nyo tu, tapi aia muko si Badu lai dak sapaneh wakatu kanai galak an tadi doh. Dak lamo sudah diloncekan kaianyo, naiak gabua dek si Badu ko. Baitu sataruihnyo lah banyak sajo jinih ikan nan naiak dek nyo. Mancaliak perubahan nan capek bana tu, heran lo si Andi mancaliak si Badu ko.

“Apo lo ilimu nan ang pakai kini ko Du? Lah bakatutuih an jo lauak naiak dek ang kini mah”, tanyo si Andi.

“Dak main umpan ang tadi doh Ndi. Kini ko lah den tuka jo umpan baru, baa nio mancubo lo ang dak?” baleh si Badu sambia manawaran umpan baru nyo tu.

“Jadih dak baa doh, den cubo lo lah lakek tangan umpan baru ang tu!”

Baitu dipaciknyo umpan nan ditawaran dek si Badu, bacaruik bungkang si Andi ka kawan nyo ko.

“Kanciang ang mah Du. Ang tubo den yo, patuik lah banyak lauak naiak dek ang, pakai umpan tuo ang kironyo!”

Kikiak-kikiak si Badu mancaliak reaksi si Andi sambia mancuci tangannyo nan lah tapacik cirik si Badu nan lah barubah jadi umpan tu.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s