Landeh nan Rusuah

Hari ko ati si Buyuang sanang bana, karano bisuak garin maajak anak-anak nan samo mangaji pai jalan-jalan ka kabun binatang nan di Bukiktinggi. Dak basiagak sanang si Buyuang ko doh, sagalo parsiapan untuak pai bisuak lah disiapannyo dari kini. Mulai dari makan nan ka dibok bisuak, baju nan ka dipakai, marakek tarompa nan lah mulai mangango tapak nyo sampai mamastian masih ado minyak kamiri untuak kaminyak rambuik. Sampai sore si Buyuang masih mangarapiak jo urusan persiapan pai bisuak.

“Alah tu Yuang, makan gai lah ang ko lu. Dari siang tadi amak paratian ang alun makan lai!”

“Santa lai mak!”, dak diacuahan nyo bana parintah amaknyo ko doh sambia taruih mangarayok antah apo nan kurang untuak bisuak ko lai.

Lah malam lo hari si Buyuang alun jo salasai jo karajo nyo doh, sampai kanai hariak dek amaknyo sakali lai,

“Kok indak juo ang makan, indak amak agiah ang pitih untuak pai jalan-jalan bisuak doh Yuang!”

Baru manggarik si Buyuang maambiak piriang untuak makan. Ruponyo iyo lah babunyi paruiknyo tu mintak diisi. Baa ka indak pulo, sajak pagi baru ciek katupek gulai jo isinyo baru. Tapi wajar sajo si Buyuang sanang alang kapalang karano sajak dari ketek lah sagadang kini ko memang iyo alun pernah si Buyuang ko pai maninggaan kampuang tangah tu lai doh. Lah patuik lo sanang bana inyo diajak pai jalan-jalan, apolai mancaliak binatang sarupo gajah, harimau, singo ataupun buayo karano salamo ko tau dari carito urang sajo dan alun pernah sakali juopun mancalaik roman binatang tu lai.

Lah laruik tangah malam, incek mato si Buyuang alun juo namuah lalok lai. Masih juo baliak suok kida jo baru cando goreang pisang nan acok dibaliak amaknyo dalam kuali. Sambia mambaliak-baliak badan sasakali kalua juo galak ketek dari muluiknyo tu. Antah apo nan takana deknyo nan jaleh lah ampia saroman urang putuih sahalai gaya si Buyuang manjalang nyo takalok.

“Oi yuang, jago lah ang lai, dak ka pai jalan-jalan gai ang ko?”, lah eboh si Romlah manjagoan anaknyo tu. Ruponyo si Buyuang takalok pagi ko, lah jaleh sajo dek kurang lalok samalam ko mah.

Walaupun si Buyuang takalok, tapi inyo lai indak talambek doh. Urang lah bakumpua di laman surau sambia manunggu oto Kawan nan manjapuik mereka ko.

Sasampai di Bukiktinggi anak-anak patuah jo parintah garin supayo jan sampai mamisah dari rombongan. Kutiko sampai di kandang gajah, yo bana takajuik si Buyuang mancaliak binatang tu.

“Yo bana gadang gajah ko yo Buya. Satinggi rumah badan nyo a. Yo dak talok dek den mangubaloan tu doh. Sadang kabau amak den nan indak sagadang tu bana badannyo, lai dak tacarian dek den makannyo doh!”, kecek si Buyuang ka garin.

“Sia nan manyuruah ang mangubaloan gajah Yuang!”, baleh garin tu singkek.

Tadiam si Buyuang mandanga jawek gurunyo tu, tapi sabanta sasudah tu lah galak lo dek ka gadangan ati baliak kutikonyo lewaik di kandang kangguru.

“Lawak lo kalinci nyo Buya. Basaku paruik nyo!”

“Itu dak kalinci doh Yuang, itu Kangguru namonyo tu. Salain di kabun binatang ko dak ado binantang tu iduik di kampuang awak ko doh!”

“Oooo!”, maangguak-angguak si Buyuang mandanga panjalasan gurunyo tu.

Sado anak-anak nan pai pueh mancaliak babagai jinih binatang nan ado di kabun ko. Ampia sado anak-anak batanyo tantang binatang nan alun pernah nyo caliak. Garin nan mambaok anak-anak coitu pulo, taliek pueh dari romannyo, karano salain manambah wawasan anak-anak tantang dunia binatang, baliau bisa pulo mananaman caro basyukur ka Tuhan ateh sagalo karunia nan alah diagiah ka umaik-Nyo salamo ko.  Sabalun istirahat makan siang, si Buyuang maegang tangan garin ka kandang nan dilaluinyo sabanta ko

“Buya..Buya.. caliak ko ha!”

“Apo tu?”, tanyo garin ka si Buyuang.

“Caliak dek Buya tu a. Gadang-gadang landeh disiko!”

“Tu kalau gadang baa?”, tambah heran garin mandanga kato si Buyuang ko.

“Indak baa doh, tapi caliak dek Buya landeh nan di ujuang tu ha!”

“Baa landeh nan di ujuang tu!”

“Buruak bana manuangnyo nampak dek den. Mungkin nyo takuik masuak narako mah Buya!”

“Indak mangarati Buya kama arah carito ang ko doh Yuang!”

“Buya kan pernah mangecek mah, bahaso landeh ko adolah haram. Tu ciek lai sagalo nan manganduang landeh haram pulo!”

“Tu apo hubungannyo jo narako?”

“Tantu iyo nan haram ko masuak narako mah Buya. Landeh nan di ujuang tu sadang manganduang nampak dek den, tantu iyo rusuah bana nyo jadi e. Alah awak landeh, manganduang lo anak landeh. Tantu duo kali haram mah Buya. Alamaik dak ka babangkik dari api narako tu doh. Makonyo landeh tu buruak manuangnyo!”, jo samangaiknyo si Buyuang manjalehan ka garin pandapeknyo tantang landeh nan rusuah tu.

“Buyuang….buyuang… Alah tu makan wak nan jaleh dulu!”, dibimbiangnyo tangan si Buyuang manuju anak-anak nan lain bakumpua.

*Landeh = babi.

3 Comments

  1. Klo mambaco carito sibuyuang takana di ambo maso ketek2 dulu,,,,kebiasaan kami di kampuang dulu tpek nyo di tujuah koto,tp dek parubahan zaman anak2 kini ndak ado nan mangaji malam tu do lai kecuali klo jadi pakiah…..

    • lai juo basobok dek ajo ram tradisi mangaji malam di surau tu lai yo… itulah jo, lah mulai punah tradisi wak ko…

  2. Ma nyo sambuangan tikam samurai 86 dan sataruih nyo ko da.


Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s