Tasapo

Sasampai di kampuang, si Atai diturunan dek supir taksi dimuko rumah urang gaeknyo sasuai jo parintah dari si Badu jo si Andi. Katiko tu hari kiro-kiro pukua tigo pagi. Salapeh sumbayang subuah mandeh si Atai bamakasuik mambarasiahan rumah, saaik mambukak pintu takajuik gadang baliau mancaliak anaknyo takalok dimuko pintu rumah.

“Ondeh Tai, dek a waang ko nak! Dari ma sajo ang salamo ko mahilang”, digoyang-goyang  badan si Atai dek mandehnyo sambia manangih marauang-rauang.

Ruponyo si Atai alah babarapo hari ko dak mancogok batang iduangnyo di kampuang tangah ko doh. Sakali mancogok takah iko lo, takalok dimuko rumah urang gaeknyo dak tantu jo urang. Lah eboh urang sakampuang mandanga kaba si Atai tibo-tibo mancogok antah dari ma. Baragam pandapek urang mangenai kondisi si Atai ko, salah satunyo iyo dibaok ka dukun Piri nan terkenal tu.

“Dek a anak ambo ko Mak Piri? Sajak tibo-tibo mancogok di muko rumah sampai kin alun juo sadar lai”, mandeh si Atai alah cameh mancaliak kondisi si Atai ko.

“Tanang sajo lah amak, kito caliak jo limua lu dih!”

Dikarek lah limau kapeh dek dukun Piri ko mananuang si Atai. Lamo tadiam dukun Piri ko mancaliak limau ko baputa-puta di dalam tenong nan barisi aia tu.

“Tasapo anak amak ko mah!”

“Tu baa lai Mak Piri? Dima tasaponyo”, bakatutuihan jo tanyo mandeh si Atai ko.

“Tanang sajo lah amak, kito tatague anak amak ko dih. Manuruik limau kapeh ko, anak amak tigo hari ko diandokan hantu awu-awu. Untuang amuah hantu tu mambaliakan anak amak mah. Tu mah buktinyo, dilatak an nyo sajo anak amak dimuko pintu lai dak!”, jo yakinnyo dukun Piri manjalehan tanuangannyo ka amak si Atai.

“Tasarah ka Mak Piri pangaan lah, nan jaleh ubek anak ambo sampai mode samulo liak!”

“Asa lai cukuik rukun jo saraiknyo, anak amak bisa bantuak samulo liak ko mah. Alun parah bana anak amak ko kanai nyo lai kodoh!”

“Jadih, ambo cukuik an rukun saraiknyo ko Mak Piri!”

Sasudah mancukuikan rukun jo saraik nan dimintak dek dukun Piri ko, dikareklah saureh kunik untuak tatague. Diambuang kunik nan lah tapotong duo ko, sambia manjalehan artinyo ka mandeh si Atai.

“Anak amak tasapo jam sabaleh siang di bawah batang jariang nan tapi batang aia!’

Kunik tadi, dikusuak-kusuak an ka sabatang tubuah si Atai ko. Mulai dari kaniang, balakang talingo, bahu, siku sampai ka mato kaki. Dak lamo sudah tu, si Atai ko mulai sadar.

“Lai babuliah pintak namo e ko mah mak. Nampak dek amak tu a, mulai sadar anak amak!”, dapek angin dukun Piri mancaliak kondisi si Atai.

“Ondeh Tai, sadar juo ang jadinyo. Lai tau ang dima ang kini ko?”, mulai sanang hati mandeh si Atai mancaliak anaknyo ko.

Sasaaik si Atai nana mancaliak sakuliliang. Masih binguang sambia mangana-ngana apo nan tajadi jo dirinyo sabananyo.

“Amak ko mak?”, tanyo si Atai.

“Iyo. Lai dak lupo ang doh yo Tai!”

“Baa kok bisa den tibo di siko ko mak?”

“Waang diandokan hantu awu-awu. Untuang ang lai bisa salamaik. Barakaik Mak Piri, sadar juo ang jadinyo!”

“Diandokan hantu awu-awu?”, tambah binguang si Atai mangana-ngana kejadian nan manimpo dirinyo.

“Nan pantiang kini waang alah salamaik liak Tai!” salo dukun Piri.

“Rasonyo terakhir waden minum kopi jo si Badu jo si Andi gai. Sabalunnyo den basobok jo mereka tu nan sadang mamanciang di muaro. Sasudah den dibaok karumah si Andi sambia minum kopi jo goreang tahu sumedang, yo dak takana dek den apo nan tajadi lai doh!”

“Si Badu apo lo kecek ang ko Tai. Inyo kan lah lamo larek dari kampuang ko mah! Tu sia lo si Andi nan ang sabuik tu tu?”, mulai binguang mandeh si Atai mandanga panjalasan anaknyo ko.

“Kini ko ancak amak baok anak amak pulang lai. Walaupun nyo alah sadar, tapi pangananyo masih alun di badan lai tu doh! Kalau masih manggigau takah iko, sambua sajo nyo jo aia limau ko tigo kali magrib. Sudah tu mode samulo anak amak ko liak mah”, kecek dukun Piri sambia mangamehan alaik paragaik nan dipakai untuak mananuang tadi.

“Iyo lah Mak Piri, mokasi banyak kami baliak pulang lai. Sakali lai mokasi banyak mak!”, di egangnyo lah tangan si Atai dek mandehnyo ko.

“Mak aden ka Padang patang ko mak, baa kok amak kecek an lo den di andok an hantu awu-awu?”, dak sanang hati si Atai mandanga bahaso dirinyo dihandokan hantu awu-awu tu doh.

“Jadi malu ang manarimo kenyataan bahaso waang ko disuruakan hantu? Sahinggo ang buek carito waang pai ka Padang?”

Tapaso si Atai diam, dak tantu a nan kadisabuik, karano memang inyo dak lo ingek apo nan tajadi sabananyo jo dirinyoko doh.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s