Ilimu dari Puyuah

Si Buyuang jo kawan-kawannyo asik main parang-parangan di palak dakek batang aia tampek biaso mereka ko mandi-mandi. Sanjatonyo mereka buek dari palapah pisang nan di buek cikunek tigo atau ampek buah, sahinggo katiko disosoh jo tangan mangaluaan bunyi manyarupoi badia. Kutiko sadang asik-asik main, tibo-tibo si Buyuang manampak ado nan manggarik-garik di baliak samak tampek inyo mandok. Si Buyuang maagiah kode ka kawan-kawan nan lain supayo indak mambuek suaro jo malatak an jari tunjuak di muluiknyo.

“Sttttt…!”

“Ado apo Yuang?”, tanyo si Bigau sambia babisiak.

Si Buyuang manunjuak ka arah samak nan manggarik tadi tanpa maagiah jawek. Lambek-lambek nyo bajalan mandakek i bunyi tadi. Lah dakek ka sumber bunyi, tibo-tibo ado gerakan dari samak tu, tabang saikua buruang dari sinan.

“Puyuah kironyo mah Yuang!”, kecek si Bigau.

“Wak kaja Gau, jan sampai lapeh!”

Main parang-parangan nan sadang asik tadi langsuang barubah manjadi baburu puyuah di salo-salo samak. Bakaja-kaja anak-anak ko bausaho mandapek an puyuah tu. Sadang lamak mangaja puyuah tu , ado se apak-apak nan maagiah patunjuak ka anak-anak ko,

“Dak usah kalian kaja bana! Kalau kalian buru takah iko dak ka dapek gai puyuah tu tudoh. Tungguan sajo puyuah tu mandarat, sudah tu impok jo kain!”

“Baa dek bitu pak?”, tanyo si Buyuang antusias.

“Ang caliak se beko dih, bia apak tunjuak an caronyo!”

Sajak apak tu maagiah parintah mode tu, puyuah tu di silau dari jarak nan indak dakek bana lai doh. Apak tu dak mangaja talampau dakek doh, cuma mancaliak jauah sambia maintai puyuah tu mandarat. Katiko puyuah nan diintai tadi mandarat di samak-samak, apak tu lah manyiapan kain saruang untuak manyungkuik puyuah tu.

“Oooo mode tu caro manangkoknyo pak?”, tanyo si Buyuang ka apak tadi.

“Iyo. Dak panek gai wak mangajanyo doh dak!”

“Baa kok bisa baguliang-guliang tu puyuah tu tu pak?”, tanyo si Buyuang samakin panasaran.

“Dek karano puyuah ko dak punyo ikua, jadi inyo dak pandai mandarat doh. Ikua tu lah nan manjadi kasaimbangan buruang katiko mandarat di tanah. Jadi puyuah ko mandarat sambia baguliang-guliang. Saaik  baguliang-guliang tu lah wak songkok puyuah tu jo kain saruang. Nyo kan masih agak paniang tu!”

Sado anak-anak nan mangaja puyuah tadi tu maangguak-angguak tando paham jo panjalasan nan diagiahan dek apak tu.

Salapeh main parang-parangan jo manangkok puyuah, anak-anak nan rami tadi tu pulang ka rumah masiang-masiang tamasuak si Buyuang. Si Buyuang maraso dapek ilimu nan sangaik bamanfaaik, sambia senyum-senyum ketek nyo pulang ka rumah rang gaeknyo pai maisi paruik nan alah mulai mintak diisi. Di rumah dak ado sia-sia doh. Kecek tetangga tampek mandeh si Buyuang manitipan kunci rumah, mandeh nyo ko pai manuka ka balai sambia manjua hasia parak. Tapi walaupun baitu di bawah sungkuik lai ado nasi jo samba sacukuiknyo. Langsuang apo nan ado di bawah sungkuik tu dilantuang si Buyuang untuak pangganja paruik nan lah mamintak dari cako.

Manjalang sore si Romlah pulang dari balai. Sabalun masuak rumah, nyo caliak kandang ayam tabukak. Mulai lah si Romlah curiga, jan-jan ado urang nan mancilok ayam nyo ko,

“Ondeh, kama pai ayam den ko? baa kok dak ado dikandang lai, sia nan mancilok?”, si Romlah basorak sambia mancari-cari kiro-kiro apo nan tajadi.

“Tanang se lah amak, ayam amak den lapeh an ka palak tu ha!”, tibo-tibo mancogok si Buyuang mananangan amaknyo tu.

“Baa lo bisa den tanang Yuang, ang lapehan ayam sakandangannyo!”, mulai tabik rabo si Romlah ka si Buyuang.

“Caliak lah dek amak tu ha!”

Takajuik gadang si Romlah mancaliak sado ayamnyo lah kompong ikua nyo.

“Ang pangaan ayam amak tu Yuaaaang? Bakompongan panga ikua ayam sado e ko, sampai ka putiak-putiak ayam dak baikua lai doh!”, tambah marabo si Romlah ka si Buyuang ko.

“Jo ikua kompong takah itu, ayam tu dak bisa ilang doh mak. Tabang bananyo, katikonyo mandarat, ayam tu pasti baguliang-guliang paniang karano ilang kasaimbangannyo!”

Tanpa ado komentar apo-apo, langsuang kanai jinjiang talingo si Buyuang dek amak nyo ko….

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s