Maaja Baruak

Antah angin apo nan mambuek hati si Buyuang gadang bana hari ko, nyo bajalan santai sambia basiua-siau lambok bakuliliang kampuang. Kutiko tibo di balakang rumah Mak Usuih, tatagun langkahnyo sabanta. Baruak gadang punyo Mak Usuih ko sadang heboh dek karano dipisahan jo anaknyo dek Mak Usuih. Raso ingin tahu si Buyuang tibo-tibo mancogok, didakek i nyo lah baruak ko. Kiro-kiro sadapo baru malangkah mandakek i baruak tu, takajuik gadang si Buyuang karano tibo-tibo induak baruak ko mandakek sambia mancibia ka si Buyuang. Mancaliak baruak nan mancibia sambia manjambo takah urang berang  spontan si Buyuang mamakiak sahinggo Mak Usuih nan sadang manyiapan makan untuak anak baruak tadi langsuang mancogok dari dalam rumah.

“Hoi, jan ang gaduah baruak den tu Yuang. Nyo sadan baranak mah. Digigiknyo ang beko!”, dipaciakannyo tangan si Buyuang ko dek Mak Usuih sambia disuruah agak manjauah dari baruak nyo tu.

“Den mancaliak-caliak jo nyoh Mak, dak bamukasuik manggaduah gai doh!”, jawek si Buyuang nan masih agak cameh.

“A nan ang caliak, den ka maaja anak baruak tu tumah. Bia lakeh pandai mamanjek karambia! Antah kok kasato lo ang baraja samo anak baruak ko”, nyo pagarahan si Buyuang ko dek Mak Usuih bia agak santai suasana senek.

Mandanga garah Mak Usuih mode tu, yo lai agak ilang cameh si Buyuang tadi tapi ado ciek nan masih maukia di hatinyo yaitu nio mambaleh garah Mak Usuih ko. Sasaiak masih jo diam si Buyuang ko sambia mancaliak Mak Usuih maagiah makan anak baruaknyo.

“Sayang Mak ka anak baruak ko yo Mak, takah sayang ka anak surang lo nampak di den! Basuak an bana makannyo” mulai dapek baleh si Buyuang.

“Nyo babeda dek ang ko mah Yuang. Ma namuah disamoan sayang ka anak jo ka baruak. Iko dek sayang ka anak ko mah, mako diasuah baruak bia lakeh pandai.”, jawek Mak Usuih.

“Takah tu lo tu mah yo Mak!”

“Takah tu baa lo mukasuik ang ko Yuang. Baujuang kecek ang mah!”, mulai tapanciang Mak Usuih ko.

“Mukasuik den, iyo maasuah baruak lakeh pandai ko. Takah anak sikola lo nampak di den!”

“Tantu iyo diaja bia lakeh pandai. Kecek ang anak sikola jo nan buliah baraja!”

“Kalau Mak Usuih maaja, tantu anak baruak ko maimbau guru ka Mak tu mah dak!”, mulai di ateh angin si Buyuang mampaulahan Mak Usuih ko.

“Maimbau guru baa lo kecek ang ko Yuang. Baruak ko jo dak pandai mangecek doh, maimbau guru a nan ka pandai nyo tu!”

“Mukasuik den, kalau Mak Usuih maaja anak baruak bia pandai, tantu Mak Usuih lah samo jo guru baruak namo e tu. A tu ciek lai, baa caro Mak mangecek jo baruak ko. Samantaro baruak ko kecek Mak dak pandai mangecek doh?”

“Nyo ado lo bahaso isaraik e tu mah Yuang. Nan mangarati tantu iyo aden jo baruak ko jo nyoh!”

“Oooo takah itu lo tu mah yo Mak. Kalau Cuma Mak Usuih jo baruak jo nan mangarati tantu lah samo lo Mak jo baruak tu?”, tanyo si Buyuang sambia galak senggeang.

“Baa kecek ang!!!!!”, langsuang tarabo Mak Usuih mandanga inyo dikecekan si Buyuang lah samo jo Baruak.

Tanpa baso basi nyo tabeh lari sakancang-kancangnyo dek si Buyuang manjauah dari rumah Mak Usuih. Samantaro dari kajauhaan Mak Usuih masih mancak-mancak sambia maumbanan sabuik karambia ka arah si Buyuang.

2 Comments

  1. tanyo ciek mak”:lah bado lamoe mak ba baghuak ko ko..

    • iyo alun pernah punyo lai doh nakan….


Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s