Taakuak

Mamparingati hari Isra’ dan Mi’raj, salapeh sumbayang magrib beko ado siraman rohani dari garin surau ka panduduak kampuang tangah. Di kampuang si Buyuang ko sabananyo dak banyak urang mudo nan tingga lai doh, lah bi pai marantau sadonyo. Nan tingga labiah banyak nan gaek-gaek se lai.

Salapeh sumbayang magrib, lah bakumpua panduduak kampuang untuak mandanga siraman rohani dari garin. Sangajo dipiliah wakatu salapeh magrib supayo lai ado nan namuah mandanga ceramah ko sabab kalau sasudah sumbayang isya umpamo dak ado nan talok batahan lamo lai doh, maklum faktor umua. Dek karano mamparingari hari Isra’ dan Mi’raj, mako tema nan diangkek dek garin ko dak jauah-jauah dari sumbayang. Alun sakitar sapuluah minik garin baceramah, lah banyak jamaah nan taakuak. Maklum sajolah urang gaek, dak baitu manangkok bana carito kutubah garin lai doh. Lah payah malawan kantuak ko. Mancaliak jamaah lah banyak maakuak, jo basanda sambia mangango di suduik surau, dialiah lah carito ko ka topik nan mambatalan wuduak, salah satunyo adolah lalok.

“Salah satu nan bisa mambatalan wuduak kito apak-apak jo ibuk-ibuk adolah lalok. Karano kutiko lalok tu kito indak sapanuahnyo sadar lai doh….!”, baitu garin ko mampajaleh ceramah jo suaro nan dikarehan supayo jamaan nan taakuak ko tajago.

Si Buyuang mandanga garin maagiah ceramah mode tu, tabik isengnyo. Nyo culiak lah surang apak gaek nan lah taakuak-akuak sambia maangguak-angguak takah urang mangarati bana lo jo isi kutubah.

“Bata wuduak apak beko pak! Kecek buya kalau wak lalok ulang bauduak baliak, samantaro di lua dingin, beko panek-panek lo tulang apak ko!”, kecek si Buyuang ka urang gaek ko.

Tagalenjek dek diculiak si Buyuang, manjawek gaek tu,

“Ma den lalok deang, waden mandanga ceramah dari Buya nampak deang ko!”

“Indak, awak kan maingekan apak sajo nyoh, kok nyampang takalok beko!”, masih jo dipaulahan dek si Buyuang gaek ko.

Mandanga kecek si Buyuang takah tu, iyo lai agak nyalang mato gaek tu. Nyo pasoan mandanga ceramah dari garin, tapi dak lamo lo batahan doh, lah taakuak lo baliau baliak. Kini ko agak parah pado tadi, lah batambah jo aia salero nan mulai kalua dari muncuangnyo nan agak mangango saketek. Mulo-mulo kalua aia salero ko agak saketek, tu naiak lo sairiang nyo maambiak angok, takah salemo anak ketek nan diiruik ka dalam iduang. Lamo ka lamoan, aia salero ko makin panjang kalua, dari jauah bantuak ado banang nan naiak turun dari muluik gaek ko. Katiko aia salero tu lah ampia taacah ka lantai, nyo tapuak bahu suok gaek tu dek si Buyuang.

“Pak, kan iyo tu a takalok juo apak jadinyo!”

“Slruuuuuuuuuut..!”, tagalenjek gadang gaek tu sambia maapuih jajak aia salero nan baleak di muluiknyo.

Aia salero gaek tu kancang naiaknyo takah mainan yoyo. Urang nan mancaliak kejadian tu langsuang tabasuik galaknyo.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s