Buliah Pulang?

Malam ko garin maagiah pelajaran tantang kisah-kisah nabi jo rasul. Salapeh sumbayang isya sado anak-anak nan mangaji disurau lah asik mandanga garin bakaba tantang babagai mukjizat nan diturunan Tuhan ka nabi jo rasul-Nyo.  Katiko lah salasai maagiah kaba, sabalun pulang garin maagiah saketek permainan.

“Sia nan bisa batua manjawek tanyo Buya, buliah pulang labiah dulu!”, kecek Buya ka sado anak-anak.

“Horeee…. jadih Buya kami setuju!, jawek anak-anak ampia kasadonyo. Si Buyuang nan agak taakuak dak sato manjawek doh, karano nyo ragu bisa manjawek tanyo garin ko.

“Partanyaan nan partamo, sia nan tau mukjizat nabi Isa?”

Dak lamo sasudah tanyo diagiah garin, tadanga mode suaro labah mandanguang, tapi dak jaleh apo bunyi nyo doh. Dak surang pun diantaro anak-anak tu nan manjawek doh.

“Kok dak ado nan tau jaweknyo, Buya ganti partanyaan nyo dih!”

“Yo Buya, jan nan sarik-sarik bana Buya!”, kecek anak-anak ko rami-rami.

“Iko lai dak sarik partanyaannyo doh. Apo mukjizat nabi Muhammad SAW nan paliang gadang?”

Manunjuak si Bigau, sambia manjawek

“Mambalah bulan Buya!”

“Alun tapek lai Gau!”

“Tu a jaweknyo Buya?”, baleh si Bigau ko.

“Ado nan tau dak?”, kecek garin mamastian siapo tau ado diantaro anak-anak ko nan lai tau. Tapi indak surangpun manjawek tanyo garin ko doh.

“Jaweknyo adolah Al Quran nul Karim. Baa kalian ko, dak ciek juo nan tantu tanyo Buya doh!”

Lah bi aniang sado anak-anak ko. Dak surang pun nan manyimak kaba garin kironyo doh. Tibo-tibo tadanga bunyi kantuik dari bagian balakang.

“Tuuuuut….”

“Sia nan kantuik tu?”, tanyo Buya ka anak-anak ko sadonyo.

“Waden Buya!”, jawek si Buyuang jo pedenyo.

Langsuang si Buyuang tagak dari duduaknyo sambia tagalak manih.

“Baa dek galak ang Yuang? Dak maraso basalah gai ang doh yo?”, agak maninggi suaro garin ka si Buyuang.

“Tantu iyo sanang den Buya. Den bisa manjawek tanyo Buya mah. Tu pulang den lai!”