Indak Bagigi

Kabiasoan anak-anak di Kampuang Tangah ko satiok bulan puaso adolah main badia batuang,  kambang api, sipak bola api dan lain sabagainyo salapeh tadaruih. Tapi malam ko dak ado diantaro anak-anak ko nan bamain salapeh tadaruih tu doh, karano ado apak-apak gaek nan biaso diimbau Inyiak Gaek bakaba tantang kapandaian nan diagiahan dek nan Kuaso untuak umaik manusia ko.

“Kecek Buya, Nyiak, dak ado manusia nan dapek mukjizat sasudah nabi terakhir Muhammad SAW doh!” kecek si Buyuang ka Inyiak Gaek ko.

“Batua kecek Buya ang tu tu Yuang, tapi masih ado manusia nan kiramaik. Biasonyo kepandaian mereka ko disabuik karomah, karano mukjizat hanyo diturunan untuak nabi jo rasul sajo!”, jawek Inyiak Gaek mayakinan anak-anak ko.

“Lai ado contohnyo di nogari awak ko ko Nyiak?” tanyo si Bigau.

“Ado!”

“Sia tu Nyiak!”, pinteh si Bigau liak.

“Tanang lah dulu, bia Inyiak caritoan!”

Anak-anak ko langsuang tadiam sambia arok-arok cameh manunggu kalanjutan carito Inyiak Gaek ko.

“Dahulu kutiko jaman bagolak sasudah kemerdekaan negara kito ko, ado di daerah piaman iduik surang tuanku nan banamo Tuanku Saliah. Baliau ko yobana kiramaik. Samaso baliau iduik banyak kaanehan nan baliau caliakan ka urang rami. Salah satunyo adolah kutiko inyo ditangkok dek urang Bulando karano malubangan pitih menggo. Saaik hari jumaik, urang di kampuang Tuanku Saliah ko mangecek an baliau jadi Imam di musajik kampuangnyo, padohal baliau saaik nan samo mandakam dalam pinjaro tu mah.!”

“Tu a contoh e lai Nyiak!”, pinteh anak-anak ko.

“Ado ciek lai nan masih takana dek Inyiak. Iko Inyiak bana nan maalami. Kutiko tu Inyiak manggaleh karupuak ubi. Pagi-pagi alun pacah talua gai Inyiak lai doh, Tuanku Saliah ko lah maago karupuak Inyiak. Dek karano ago Tuanku ko padiah bana, indak Inyiak jua karupuak ko ka baliau doh. Akibaiknyo, sampai sore dak laku-laku karupuak Inyiak ko saincek alah juo doh!”

Sambia mangana-ngana kisah nan lamo Inyiak ko maambiak angok sabanta untuak malanjuik an carito ko.

“Saminggu sasudah tu, karupuak Inyiak di ago lo dek Tuanku Saliah ko baliak. Agonyo saroman bana jo saminggu nan talapeh tu, tapi kini ko Inyiak satuju malapehnyo ka baliau. Dak lamo sudah tu, abih tandeh galeh Inyiak. Indak cukuik sampai tangah hari gai doh, galeh ko lah lipek duo labo e!”

“Yo lasuah lo kalau punyo kapandaian mode tu mah dak Nyiak!”, salo si To’o.

“Indak sumbarang urang lo nan ka diagiahan Tuhan kapandaian mode tu doh To’o!”, jawek Inyiak Gaek.

“Mode awak-awak ko lai bisa lo punyo kapandaian takah tu tu Nyiak?” tanyo si Buyuang.

“Kalau kalian sadonyo lai taaik baibadah, tantu bisa lo. Sado nan diparintahan dek Tuhan dikarajoan dan sado nan dilarang-Nyo ditinggaan. Pasti dapek lo karomah takah Tuanku Saliah tu tumah, tapi tantu dak ka saroman tu bana doh!” jawek Inyiak Gaek.

“Aden nio lo takah Tuanku Saliah ko!”

“Aden iyo lo!”

Tibo-tibo lah mode bunyi labah jo suaro anak-anak ko nio mandapek kapandaian takah Tuanku Saliah nan dicariton dek Inyiak Gaek ko.

“Tanang…tanang..lah kalian sadonyo lu. Kalian nio mancaliak lo kabasaran Tuhan nan ditompangan-Nyo ka Inyiak dak?”, tibo-tibo suaro Inyiak ko mambuek sado anak-anak nan maeboh tu tadiam. Sudah lu sarentak manjawek,

“Iyo…”

Langsuang muncuang Inyiak Gaek ko manggarik-garik mambaco sasuatu saroman mantra. Sasudah salasai mambaco doa, dikaruaknyo muluiknyo nan alah agak karipuik tu. Sasaaik tagalencek sado anak-anak nan mancaliak tu, karano sado gigi ateh Inyiak Gaek ko lah lapeh dari ngunguahnyo. Talatak elok gigi tu ditalapak tangannyo. Dak lamo sudah tu dipasangannyo gigi tu baliak. Anak-anak nan mancaliak kajadian tu, tangango dek mancaliak kejadian tu. Indak surangpun nan basuaro sabalun kahaniangan tu dipacahkan dek suaro si Buyuang.

“Baa caro nyo tu Nyiak?”

“Rajin-rajin sajo lah kalian sumbayang dih, InsyaAllah masiang-masiang kalian dapek lo kapandaian nan lain pado iko ko mah!”, langsuang Inyiak Gaek ko tangak maninggaan anak-anak nan masih tapungarah dek atraksi baliau tu.

Bisuak paginyo, katiko mandi di batang aia, nampak lah dek si Buyuang Inyiak Gaek mandi agak di baruah. Dituruiknyo lah Inyiak tu nan sadang manggosok gigi sambia basiua-siau lambok.

“Baa gigi Inyiak tu? Bakawek nampak di den?”, sapo si Buyuang ka Inyiak ko.

“Antok jo lah ang Yuang!”, jawek Inyiak ko sambia galak tasenggeang mancaliakan muluiknyo nan indak bagigi.

1 Comment

  1. hahahahaahahahaha..lawak mah da….😆


Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s