Lah Bisa Jadi Marapulai

Hari ko si Buyuang di ajak dek Garin pai ka kampuang sabalah untuak manikahan pasangan mudo nan ka baralek gadang.

“Yuang, pai ang jo Buya ka kampuang sabalah dak?”

“Manga tu Buya?”

“Buya disarayo dek urang kampuang tu manikahan anaknyo nan ka baralek!”

“Jadih.. Pai den ciek!”

Jo sumangeknyo si Buyuang manyanggupi tawaran dari guru mangaji nyo tu karano iko marupokan pangalaman baru deknyo. Salamo ko baru carito sajo nan didanga dek si Buyuang ko, kini ko inyo ka manyasian langsuang prosesi pernikahan ko.

Sasampai dikampuang sabalah tu, urang lah rami tibo. Langsuang Garin jo si Buyuang disambuik dek tuan rumah jo gadang hatinyo.

“Ma, marapulainyo ko Mak?”, tanyo Garin ka pihak anak daro.

“Sadang dalam pajalanan kamari Buya!” jawek tuan rumah.

Garin lah maambiak tampek nan alah dipasiapan dek tuan rumah, samantaro si Buyuang duduak dibalakang gurunyo tu. Dak lamo sudah tu, tibo lah rombongan marapulai cukuik jo urang mudonyo. Sasudah prosesi adaik babaleh pantun antaro rang mudo marapulai jo rang mudo anak daro, barulah dimulai acara pernikahan ko. Marapulai maambiak tampek pas dimuko Garin. Pihak anak daro manyarahan ka Garin untuak manikahan anak baliau, karano anak daro ko dak ado punyo wali nan berhak manikahan, sahinggo karajo ko disarahan sapanuahnyo ka Garin.

“Alah siap ananda kami nikahkan?”, tanyo Garin ka marapulai ko.

“Alah Ngku!”, jawek marapulai jo muko nan agak tagang.

“Sabalun kito nikahan anak kito ko, Ambo ingin batanyo ka marapulai talabiah dahulu. Ananda lai sumbayang limo wakatu?”

“Lai Ngku!”

“Lai pandai mangaji?”

“Lai Ngku!”

“Lai tantu rukun islam jo rukun iman?”

“Lai Ngku!”

“Iyo lah kok mode tu. Tanyato marapulai kito ko lai tamasuak pemuda nan taaik. Tapi untuak mamastian nyo tantu kito uji lu ndak?”

“Iyo!” jawek urang sadonyo.

“Sabalun ananda kito suruah mangaji, ambo nio mandanga bunyi rukun islam nan ananda ketahui labiah duhulu. Cubo lah ananda sabuikan bunyinyo, buliah dak didanga lo dek pihak anak daro ko!”, sarayo Garin ka Marapulai ko.

“eeeee, Buya kan lai tantu lo dek Buya bunyi nyo nyoh dak!”

“Jawek lah sarayo ambo tadi tu!”

“Itu samo jo jo mauji den Buya namonyo tu. Lah sajak SD wak diajaan mah, baa pulo dak katantu dek den bunyi nyo!”

“Yo, sabuikan lah bunyi nyo!” mulai maninggi suaro Garin ko.

Sasaaik suasana manjadi haniang. Urang nan mahadok pernikahan lah arok-arok cameh manunggu marapulai manjawek tanyo Garin ko. Samantaro marapulai tampak cameh jo gugup.

“ee hmmm. Rukun nan partamo babunyi,…… Ketuhanan yang Maha Esa….!”

Alun salasai marapulai malanjuikan jaweknyo tu, urang lah heboh…

“Tanang, tanang…!” kecek Garin mananangan sado urang nan hadir.

“Baa pulo caro ambo manikahan ananda ko, bunyi rukun islam se ananda dak tau doh, apolai beko disuruah lo mangaji!”

Kalua paluah dingin marapulai ko. Kini ko yobana dak tantu a nan ka disabuiknyo lai doh.

“Jadi baa acara pernikahan kito ko ko Buya?” tanyo rang mudo marapulai.

“Yo baraja lah marapulai ko dulu, kalau indak juo tantu doh, yo dak talok dek ambo manikahannyo doh!”

“ Rukun islam. Rukun islam ado limo, nan partamo mambaco duo kulimah syahadat. Nan kaduo mangarajoan sumbayang limo wakatu. Nan katigo mambayia zakat. Nan kaampek puaso pado bulan ramadhan dan nan kalimo naiak haji bagi nan mampu!” tadanga ado urang nan mambaco rukun islam ko dari balakang Garin.

“Manga ang Yuang?” tanyo Garin jo herannyo.

“Lai tantu dek den rukun islam tu nyoh Buya. Kalau mangaji kan tiok sanjo Buya mandanga mah! Aaa kan lah bisa den jadi marapulai mah dak Buya!” jawek si Buyuang jo sumangeknyo.

“hahahahahahah……” mandanga jawek si Buyuang tu sarantak tabasuik galak urang saisi rumah ko…

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s