Ubek Tasapo

Hari ko ado urang pai ka rumah dukun Piri sambia mandukuang kawannyo. Takaja-kajanyo pai bantuak e. Di sasek lah dek si Buyuang.

“Baa dek takaja na pak?”

“Iko Yuang a, adiak den tasapo. Mujua nyo sadang pingsan kini ko. Kok sadarnyo beko dak tapacik an dek den doh!”

“Tu baa dek dak ka dotor apak baok adiak apak tu?”

“eee yayai dek ang Yuang. Bantuak dak tau dukun Piri jo ang mah. Satanamo tu baliau maubek tasapo, batanyo jo ang lai!”

Si Buyuang masih binguang-binguang mandanga jawek urang tadi tu, samantaro urang tu taruih malanjuik an pajalanan ka rumah dukun Piri.

Si Buyuang nan penasaran jo jawek urang tadi tu ruponyo maikuik i dari jauah. Nyo paratian dek si Buyuang ko proses maubek urang tasapo tadi tu. Batua apo nan disabuik urang tadi tu. Adiaknyo nan badukuang tadi kini lah kalua dari rumah dukun Piri sambia bajalan surang. Dak ado bantuak urang tasapo lai doh. Sabanta sajo lah sihaik nyo dari tasapo tu. tapikia lah dek si Buyuang ko, yo bana santiang dukun Piri ko. Tapi ado ciek nan mangganjo di banaknyo, yaitu “Siriak”.

“Hoi, manga ang bamanuang disiko Yuang?” tagalenjek gadang si Buyuang ko karano tibo-tibo lah ado sajo dukun Piri nan manyaseknyo.

Tabik paluah dinginnyo. Dak tantu a nan ka dijawek. Mukonyo mulai pucek, muluiknyo dak bisa digarikan lai.

“Nio baraja caro maubek urang tasapo lo ang Yuang?” tanyo dukun Piri ka si Buyuang. Tapi si Buyuang masih tangango alun bisa manjawek tanyo dukun Piri ko.

“Pek lah naiak ka rumah. Den tunjuak an ang caronyo!”

“Indak doh mak Piri!”, kini dibagakan nyo manjawek lai.

“Jan takuik lo ang. Dak ka dimakan Hantu gai ang doh!”

“Indak doh mak. Den bukan takuik jo Hantu tapi takuik jo Allah, karano iko karajo siriak ko mah. Narako jahanam tantangannyo!”

“ckckckck…. Tantu lo diang nan siriak mah yo. Kamarilah!”, nyo elo tangan si Buyuang ko dek dukun Piri sambia mambisiak sasuatu ka talingonyo. Tibo-tibo si Buyuang ko manuruik sajo tanpa perlawanan.

Ruponyo iyo lah diturunan dek dukun Piri ko ilimu maubek tasapo ko ka si Buyuang. Lah sudah sado ilimu dari dukun Piri ko diapanyo, si Buyuang langsuang babaliak ka surau sambia galak-galak manih.

Kiro-kiro saminggu sasudah dapek ilimu dari dukun Piri, kini tibo saaiknyo mauji ilimu ko. Si To’o kawan sapamainannyo tasapo antah dek a. Dek urang gaek si To’o ko indak ka dukun Piri dibaok doh, tapi ka surau manamui Garin untuak maubek anak baliau. Karano urang gaek si To’o lai kuaik lo jo agamo, jadi nyo dak namuah ikuik caro-caro nan mampasakutuan Tuhan doh.

“Garin tolong si To’o ciek. Antah dek a tadi tu, tibo-tibo nyo lah kajang-kajang dak manantu jo!” ratok gaek si To’o mamintak patolongan dari guru mangaji anak nyo ko.

“Tanang mak, jan rusuah. Samo-samo mamintak kito ka tuhan Allah, mudah-mudahan dikabua an Baliau doa kito ko!”

Tibo-tibo si Buyuang manyalo,

“Tanang Buya, den bisa maubeknyo mah!”

Sabalun sempat Garin ko managah atau manyatujui, si Buyuang lah siap jo alaik paragaik untuak maubek kawan nyo ko. Antah a nan dibaconyo, tu dilepongan nyo sasuatu di banda-banda antaro iduang jo muluik si To’o ko. Dak lamo sudah tu iyo sadar si To’o ko. Urang taheran-heran mancaliak kapandaian si Buyuang ko, indak takacuali guru mangaji nyo ko.

“Dima ang baraja tu Yuang?” Tanyo Garin penasaran.

“Mak Piri nan maajaan den!” jawek si Buyang jo santainyo

“Apo!! Karajo siriak tu mah. Capek batobaik waang!”, langsuang berang gadang Garin ka si Buyuang.

“Indak siriak gai doh Buya. Kok dak picayo buya ko den tunjuak an rahasionyo a!”

Langsuang dilepongan nyo lo ubek nan dipakai cako ka banda-banda Buya ko.

“Puaaah… apo nan ang lepongan ka iduang dek ko ko Yuang. Dak tangguang busuak nyo doh!”

Si Buyang langsuang lari manjauh sambia manjawek tanyo guru nyo ko

“Cirik ayam buyaaaaa……!”

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s