Labiah Barago Baju Lai

Hari ko si Buyuang diajak dek Garin pai baralek. Gadang bana hati si Buyuang dek diajak guru mangaji nyo ko, karano lah lamo lo dak makan lamak.

“Kama wak pai baralek Buya?”

“Ka kampuang sabalah. Beko tibo disinan jan buek malu dak Yuang!”, nasihat Garin ka Si Buyuang.

“Aman tu Buya!” jo gadang hatinyo si Buyuang manyetujui saran gurunyo tu.

Katiko lah ka pai, si Buyuang agak heran jo penampilan gurunyo ko karano dak samo jo nan taralah.

“Baa dek babukak kupiah Buya kini ko? Patang ko kecek Buya, kupiah ko lambang awak sabagai muslim nan taaik ka agamo. Kalau dak salah kecek Buya, kalau awak dak bakupiah ko ibaraik surau dak bakubah. Saroman surau sompong!” tanyo si Buyuang.

“Caliak jo lah Yuang, beko mangarati surang jo ang tu nyoh!”

“Tu Kupiah den ko baa Buya? Den bukak lo?”, mangkatutuih tanyo si Buyuang ko

“Tasarah dek waang, nio ang pakai atau indak, dak masalah!”, jawek Garin singkek.

Si Buyuang tetap jo keyakinannyo mamakai kupiah. Barangkek lah murik jo guru tu pai katampek urang nan maundang tu. Satibo di tampek baralek, si Buyuang mulai dak sanang jo sambutan tuan rumah ko.

“Baa kok dibedaan tampek makan awak ko ko Buya?”, tanyo si Buyuang.

“Iko lah jawek dari tanyo ang di surau tadi tu tu Yuang. Baa dek Buya tanggaan kupiah tadi tu, iko lah jawek nyo!”

“Kalau mode ko yo patah salero den makan Buya!”, si Buyuang langsuang pai maninggaan guru nyo tu surang di tampek baralek.

Tanyato tuan rumah mamisahan tampek makan Garin jo Si Buyuang. Garin nan bapakaian labiah rapi dipersilahkan tuan rumah untuak makan di tampek khusus, samantaro si Buyuang dianggap urang pakiah kabanyakan sahinggo tampek makan jo sambanyo biaso sajo nyoh, dak lapeh dari goreang maco jo gulai cubadak.

Sasampai di surau, buruak manuang si Buyuang ko, dak jadi nyo makan lamak doh. Tibo-tibo bagageh nyo ganti baju. Dak lamo sudah tu, lah tibo lo nyo di tampek urang baralek tu liak.

Batua bana kecek gurunyo ko, si Buyuang langsuang dipersilahkan dek tuan rumah duduak dakek jo Garin.

“Baa kok lah batuka baju ang ko Yuang? Kecek Garin sambia makan jo lahapnyo.

“Kan itulah Buya. Tapikia dek den, jo pakaian nan kini buliah den duduak samo jo Buya. Samantaro pakaian nan tadi tu, disangkonyo urang pai mamakiah den dek tuan rumah ko!”

“Kan lah tau ang bedanyo tu dak Yuang. Dak paralu Buya manjalehan panjang leba jadinyo tanyo ang tadi lai doh a. Kini ko makan lah lai! A nan katuju makan sajo lah!”

Si Buyuang masih bamanuang, dak juo nyo makan doh.

“A jo nan ang pikian lai Yuang? Ambiak piriang tu ha?”

“Dak jadi den makan doh Buya, patah juo salero den jadinyo!”

“Baa tu, dak lamak sambanyo dek ang Yuang?”

“Den pikia-pikia, ruponyo waden ko yo dak barago doh Buya!”

“Mukasuik apo ko Yuang!”, langsuang tahanti Buya makan mandanga panjalasan si Buyuang.

“Nan diharagoi dek tuan rumah ko yo Pakaian den ko ruponyo. Labiah barago baju ko lai, jadi nan patuik makan tantu baju den ko!”

Dikumpuan nyo lah sado samba nan lamak-lamak dek si Buyang ko, tu nyo masuakan ka saku bajunyo sampai panuah.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s