Mancigok Buya

Lah duo hari ko anak-anak dak ado mangaji dibimbiang dek Garin, karano baliau sakik. Sahinggo mangaji bakuati anak-anak ko selai. Si Buyuang nan takana jo pasan gurunyo tu pai mancigok keadaan baliau hari ko.

“Assalamualaikum”, kato si Buyuang sambia manokok pintu.

“Waalaikumsalam, masuak lah”, tadanga suaro dari dalam nan indak lain adolah guru mangaji si Buyuang ko.

“Baa keadaan Buya kini?”, sasek si Buyuang sabagai pambukak kato.

“Lah agak bakao mah Yuang. Kini lah talok makan nan agak kareh mah. Kapatang masih batulak jo bubua jo baru!”

“Apo namo sakik Buya ko ko?” mangkatutuih tanyo si Buyuang ko.

“Kecek bidan sakik mag. Panyababnyo makan indak teratur. Jadi iko pelajaran buek kito sadonyo bahaso jan sampai talaik makan”.

“O iyo baru takana dek den pangajian Buya, nabi pernah maumanaikan bahaso makan sabalun lapa baranti sabalun kanyang. Kan iyo dak Buya?”

“Iyo..”, jawek Buya sambia barubah aia mukonyo.

“Eh iyo, ampia den lupo lai. Iko ado den baok an ubi jala untuak Buya. Den dak tau apo nan ka dibaok tadi doh. Nampak dek den urang mancabuik ubi, tu den tolongan. Diupahnyo lo den jo ubi tu. Iko barangnyo ha”.

“Alah manga pulo ang sibuk-sibuk mancari nan ka dibaok. Lah ang cigok jo Buya, lah sanang ati Buya mah.”

“Dak baa gai doh Buya. Kan Buya lo nan maajaan mah. Kalau mancaliak urang sakik ko awak harus babuah tangan.”

“Jadih melah kalau baitu. Buya tarimo pambarian ang Yuang. O iyo, sabagai balehnyo apo yo?”, tadiam sasaaik baliau ko sambia mancaliak kasinan kamari mancari sasuatu untuak si Buyuang ko.

“Haaa kambiang nan di balakang pondok Buya ko selah untuak ang Yuang. Ang baok selah kambiang tu. Itu tando tarimo kasih Buya lo ka waang.”

“Baa kok baitu lo Buya?”

“Dek pambarian ang lah Buya tarimo, mako tarimo pulo lah pambarian Buya ko.”

Iyolah diirik kambiang jantan pambarian gurunyo tu dek si Buyuang pulang ka rumah amaknyo. Dak tangguang gadang hatinyo dapek sikua kambiang tu. Di tangah jalan basobok lah si Buyuang ko jo si To’o.

“Kambiang sia nan ang elo tu Yuang?” sasek si To’o ka kawan dakek nyo tu.

“Kambiang den komah. Diagiah dek Buya.”

“Baa kok diagiah Buya ang kambiang?” mulai penasaran si To’o ko.

“Kan ang tau Buya sadang sakik mah. Tu den cigok baliau sambia mambaok buah tangan. Eee dibalehnyo niaik baiak den tu jo kambiang ko!”

“Oooo mode tu lo mah yo!” langsuang bagageh si To’o ko pai manjauh dari si Buyuang.

Si To’o masih bapikia apo nan ka dibaok untuak mancigok Buya. “Si Buyuang sajo nan baok ubi di baleh jo kambiang dek Buya. Berarti den baok nan labiah rancak pado tu, bia bisa dibaleh nan labiah gadang pulo pado si Buyuang”, gumam si To’o dalam hati sambia mamikia apo nan ka di baok. Dapek lah pangana dek si To’o dan langsuang nyo pai mancigok gurunyo tu.

“Assalamualaikum… Iyo sakik Buya?” jo sumangaiknyo si To’o manyasek gurunyo tu.

“Waalaikumsalam. Iyo. Tapi kini lah bakao, dak baa lai doh. Masuah lah, ang tu To’o?”

“Iyo Buya. O iyo, iko ado saketek buah tangan untuak Buya.!”, si To’o langsuang penasaran apo kiro-kiro nan ka dibaleh dek gurunyo ko.

“Ondeeeh..  Repot pulo ang dek Buya sakik yo To’o. Jo a lah ka dibaleh jaso ang ko yo?”, Garin mancari-cari pulo ka sakuliliang mancaliak apo nan pantas untuak mambaleh buah tangan anak murik nyo ko.

“Alaaah, apo lo babaleh ko Buya. Den ikhlas mambaok ko tadi ko mah!” babaso basi lah si To’o ko sambia di latakkannyo cimangko nan gadang pado kapalonyo tu.

“O iyo, iko ado ubi jala ha. Ang baok lah saungguak tu To’o tando tarimo kasih Buya.!”

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s