Tabukak Coki

Pagi bana lah si Atai lah tajago dari laloknyo. Hari ko adolah hari spesial untuak nyo karano baliau ulang tahun hari ko. Tapi saumua iduik, yo alun pernah nyo marayoan ulang tahun nyo ko doh. Takana dek e si Badu, kawan akrabnyo di kampuang ko. Tibo-tibo barubah aia muko si Atai ko, “dak mungkin den marayoan ulang tahun den jo si Badu ko doh. Paja tu sadang berang ka den”.
Lamo tamanuang si Atai jadinyo. Rencana ka balanjuang marayoan ulang tahun, tapi dak tau sia nan ka diajak. Sadang bapikia kareh tu, takana lah deknyo si Romlah. Salapeh minum pagi nyo jalang lah rumah si Romlah jo gadang hati. Sapanjang parjalanan raso ado nan aneh nampak dek si Atai. Katiko lewaik dimuko lapau nan biaso nyo duduak, dak sorang jo urang di lapau tu nan manjawek sasek si Atai ko doh. Hantok se saisi lapau, seakan-akan dak mandanga sasek si Atai ko. Kutiko lah ampia tibo di rumah si Romlah basobok lah si Atai ko jo si Buyuang.
“Kama ang Yuang?” sasek si Atai.
Si Buyuang dak manjawek sangenek juo doh. Malah tambah dipakancang nyo jalan manjauah dari si Atai.
Tabik ragu di kapalo si Atai untuak manamui si Romlah. Jan-jan si Romlah dak pulo maacuahannyo. Kutiko tibo di muko rumah si Romlah, suasana sabana tanang bantuak dak baurang. Batambah gadang ragu si Atai ko. Nyo bae babaliak untuak ka pulang.
“Baa kok baliak Uda?”, tadanga ado suaro nan manyasek si Atai. Ruponyo si Romlah dari dalam rumah.
“Naiak lah Da!”
Sabana sanang hati si Atai di bueknyo, lai ado juo urang nan mamparatiannyo.
“Sabana binguang Uda hari ko Romlah!”
“Baa kok baitu Da?”
“Malakik sampai di rumah ko, sado urang nan Uda sapo dak ado nan majawek surang juo doh. Antah apo nan tajadi!”
“Parasoan Uda sajo tu ndak?”
“Indak, sabananyo tu!” tambah tinggi suaro si Atai.
“Duduak lah uda dulu, Romlah buek an minum sabanta. Apo minum Uda ko, teh talua atau kopi talua?”, Nyo kijok si Atai sangenek.
Tasirok darah si Atai mancaliak parangai si Romlah sakali ko. Takana parangai lamo, tapi baa lah dak mungkin manggabainyo lai.
“Si Badu kama Romlah?”, tibo-tibo sajo tanyo tu taloncek dari muncuang si Atai.
“Lah pai ka sawah sajak tadi Da!”
Sasaiak tadiam si Atai. Pangananyo jauah manarawang antah kama.
“Jadi apo ko Da? Teh talua atau kopi talua ko?”
Bamacam pangana nan tabik di kapalonyo,”baa kok tibo-tibo teh talua atau kopi talua nan dionyok an si Romlah ka den tu. Jan-jan si Romlah ko taragak bagaluik cando dulu lo jo den ko mah!”, sambia senyum tasenggeang manjawek lah si Atai ko,
“Teh talua sajo lah!”
“Di langkan ko Uda minum atau di biliak?”
Batambah kuaik dugaan si Atai jadinyo,”yobana taragak si Romlah ko komah. Dak buliah den lewaik an ko doh”.
“Di biliak jo lah ancak dak!”
“Jadih Da! Tunggu lah sabanta di biliak kantua tampek biaso Da, Romlah siapan minum sabanta!”
Saraso mandapek durian runtuah si Atai mandanga jawek si Romlah tu. Bagageh nyo masuak biliak, dak saba mananti si Romlah tibo. Agak lamo juo si Romlah ko tibo, ampia satangah jam. Kutiko si Atai ampia takalok mananti si Romlah, tibo-tibo suaru pintu badariak di bukak urang.
“Salamaaaaaaaaaaaik..!!!”, tadanga suaro urang rami di baliak pintu maagiah salamaik ka si Atai.
Ruponyo si Romlah mambaok kue ulang tahun basamo-samo jo si Badu, Buyuang jo saisi urang lapau. Tangango gadang si Atai, lah mancogok sajo urang rami di mukonyo. Samantaro dak sahalai banang juo nan hinggok di badan si Atai lai.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s