Supiak Banun (bagian 1)

Dak basiagak sanang e ati Supiak Banun ko doh. Inyo ditarimo di sakola tanamo di kota ko. Sakola ko cito-citoe bana. Banyak urang-urang santiang nan sakola di sakola tu. Satidak e itu nan ado dikapaloe. Supiak Banun ko dak tagolong anak santiang bana lo doh, tapi nyo tau mamaksimalan wakatu. Sahinggo katiko urang ujian, iyo basungguah lo e baraja. Padohal sabanae Supiak ko pamaleh sangaik mah. Tapi sungguah pun baitu, sakali baraja yo lai lakek dikapaloe, mungkin kapaloe dek jarang baisi mah, jadi sakali diisi langsuang malakek.
Saminggu baru manjadi anak esem a, lah dapek kawan dek Supiak Banun ko. Namoe si Rambai. Rambai ko yo bana kamek. Mungkin sajak iduang ditampuah angok, iyo iko basobok padusi Minang nan kamek dek Supiak Banun ka baru. Makoe nyo akai dek Supiak Banun ko bakawan jo si Rambai ko. Ado ciek pepatah nan masih malakek dalam kapalo Supiak Banun ko, adolah Bakawan jo tukang sate, angik e tibolo di awak. Bakawan jo tukang parpum, arum e tibo lo dek awak. Makoe Supiak Banun nio bana bakawan jo si Rambai ko. “Untuang-untuang tabaok kamek lo waden dek e”, pikia Supiak Banun ko.
Saminggu awal sikola, yolah bantuak palangkin lo urang baduo ko. Dima ado Supiak Banun ado lo si Rambai disinan. Dak manunggu lamo, duo urang ko langsuang tasabuik dek kangkawan e. Iyo dek kamek si Rambai ko juo. Lah tabaok rendong lo Supiak Banun dek e. Jadi selebritis sikola istilah keren e.
Ado sakali, si Rambai sadang duduak di bangku panjang muko kelas. Inyo manunggu Supiak Banun kalua di jam istirahat. Biasoe Supiak Banun ko, limo minik sabalun lonceng istirahat babunyi, nyo lah tibo dilua. Tapi sakali ko antah a kolah, lun jo kalua nyo lai. Lah manunggu lo si Rambai jadie. Sambia manunggu tu, lewaik anak kelas subalah, Yuang Kalek panggilan e. Katiko lewaik dimuko si Rambai, tibo-tibo senyum-senyum Yuang Kalek ko. Kulabu muko e, maklum dek inyo kaliang. Kok putiah e, tantu mamerah mukoe.
“Aduuuah..”, tibo-tibo dilantuang e tonggak basi. Sagadang tu tonggak, ampia sagadang batih e, dak Nampak dek e doh.
“Ehh… dek a Yuang…”, tagalenjek si Rambai ko katu tu juo.
“Indak..indak.. antah sia nan mamindahan tonggak ko ha, dihambek e jalan den”, jawek Yuang Kalek sambia capek-capek pai.
“Kalera paja tu mah. Den sangko iyo nyo mangamek ka den tu, kiro e wee bamanuang”, upek Yuang Kalek dalam atie.
Dak lamo sudah tu tibo Supiak Banun. Dicaliak e muko si Rambia bantuak urang binguang.
“Dek a wakau Mbai, bantuak urang binguang nampak di den?”, tanyo Supiak Banun ko.
“Iko Piak a. Waden masih bapikia. Kapatang tonggak dimuko ko, yo disiko lo rasoe. Dak babeda gai latak e jo nan kini ko doh..”, jawek si Rambai sambia manggarinyik an kaniang e.
“Apo lah nan wakau pikiaan ko Mbai. Binguang lo den mandangae”, sambia maegang tangan si Rambai, Supiak Banun bajalan ka arah kantin sikola.
“Kecek Yuang Kalek tadi, tonggak tu dipindahan urang”
“Barasian paja tu mah. Jan wakau dangaan lo”
Satibo dalam kantin, lah lupo se si Rambai jo kejadian tonggak tadi tu. Karano nampak dek e kue. Yobana tabik salero si Rambai mancaliak kue tu, karano mancaliak bantuak e jo, lah tabayang lamak e. Tapi ado ciek, harago dak sasuai jo pitih lanjo nan diagiah gaek e doh. Tapaso lah manciranguik jo mancaliak kue tu.
“Woi, ajuo nan kau manuangan lai!”, sasek Supiak Banun.
“Kue….”, itu jo nan kalua di muncuang si Rambai ko nyoh. Tadiam e sasudah tu.
“Maha sangaiiiiik..”, lun tabali dek wak lai tu doh pinteh Supiak Banun.
“Lun tabali????”, sambia agak basorak si Rambai maegang kawan e ko.
“A nan talinteh dikapalo kau Piak?”, bakatutik tanyoe.
“Antahlah, panek den ngecek jo kau mah. Nan jaleh pitih den dak cukuik mambali kue tu. Antah kok ado urang nan namuah mambalian wak kue tu”.
“Iyo itu Piak… Urang nan mambalian ko nan harus wak cari”, tabik sumangek si Rambai dek e.
“Nan kaindak-indak jo kau pikiaan mah Mbai. Alah tu mah, panek den. Santa lai babunyi lo lonceng koha. Ka balanjo ka indak ko?”, nyo egang si Rambai ko ka dakek piriang bakwan dek Supiak Banun ko. Karano iyo itu nan talok tabali dek e nyoh.
Dak lamo sudah tu babunyi lonceng tando masuak. Supiak Banun lah bagageh maajak si Rambai untuak masuak kelas. Tapi si Rambai ko bantuak baparakek ikua e dibangku loneang kantin. Lah sanyun-sanyun lo e liak.
“Dek lo kau mangamek ko Mbai? Capek lah a, lonceng lah babunyi tu ha. Masuak wak lai”
“Kue…”
Lah tabayang dek Supiak Banun ko, kok dak diegangan si Rambai ko, yo lah kabanuang sampai sore nyo dikantin tutumah. Untuang pas nyo tibo dalam kelas, pintu lun batutuik lai, sahinggo salamaik mereka ko dari ancaman guru Matematik nan terkenal setreng tu.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s