Supiak Banun (bagian 2)

Hari ko si Rambai dak saceria kapatang doh. Agak banyak bamanuang e. Kutiko ditanyo gurupun tadi, dak dapek nyo manjawek doh. Pas tibo jam kalua main, si Rambai tetap bamanuang duduk di kelas.
“Dak pai balanjo kau Rambai”, sasek Supiak Banun.
“Den baimaik kini Piak!”, pendek jo jawek e.
“Mukasuik e?”, binguang lo Supiak Banun dek jawek si Rambai ko.
“Bisuak tantu jo dek kau tu mah Piak!”, katuih jo nyo kini lai.
Supiak Banun dek mancaliak takah tu, nyo pai se bagageh surang ka kantin sakola. Sabalun tibo di kantin, nampak lah Yuang Kalek dek e. Bantuak urang sadang manunggu. Kikiro lah ampai sapangalan jarak e, tu disasek e Supiak Banun ko.
“Ma si Rambai Piak?”
“Inyo di kelas. Dak amuah den ajak tadi doh”
“Dek a lo e tu?”
“Ma tantu di den tu, ang tanyo lah surang”, tu bajalan jo Supiak Banun ko lai. Di tinggaan e Yuang Kalek surang. Pado mangkatutuih tanyo Yuang Kalek tu, makoe nyo bagageh jo lai.
Mandanga panjalasan Supiak Banun tadi tu, tanpa mambuang kesempatan, iyolah ditamuinyo si Rambai di kelas.
“Eh, Rambai. A nan bamanuangan Mbai. Pasti kau sadang mamikiaan den dak!”, jo picayo diri e Yuang Kalek manyasek si Rambai. Dicaliak jo suduik mato jo Yuang Kalek ko dek si Rambai. Dak ado kato-kato nan kalua dari muluik e doh. Sudah tu nyo lengahan jo lai.
“Bangih kau ka den Rambai?”, penasaran lo Yuang Kalek dek e. Maengong si Rambai tu ka arah Yuang Kalek, tu nyo bae manggeleang.
“Kok indak, baa dak kau jawek tanyo den? Sadang sakik gigi kau yo?”, batambah penasaran Yuang Kalek dek e.
“Maaf yo Lek, Rambai dak berang ka Kalek doh. Rambai sadang ado nan dipikiaan saketek”, jawek si Rambai. Mandanga jawek takah tu jo, lah malayang raso badan Yuang Kalek dek e. Bagaduru tanyo dikapalo e untuk si Rambai ko, tapi dak ciek juo nan kalua. Paluah e mulai mancicik kalua sagadang-gadang jaguang. Muncuang e lah cando baruak sadang mancapak, antah a nan ka disabuik e.
“A…anu…anu mah Mbai!”, kalua juo sangenek tanyo ko.
“Anu a ko Lek?”, baleh si Rambai.
“Yobana Rambai ado nan dipikiaan kini tu?”
“Iyo..”
“Oooo..ondeeeh Mbai. Dak manyangko den sacapek ko doh. Aaa…anuu ko mah. Waden iyolo itu nan den pikiaan mah Mbai!”, mulai bagak Yuang Kalek ko.
“Apo Lek? Samo lo nan Kalek pikiaan jo apo nan ado dikapalo Rambai?”
“Tantu lah iyo Rambai sayang. Kaaleeek!”, mulai diateh angin Yuang Kalek.
Mulai badarah muko si Rambai ko baliak. Ilang sa ilang-ilang e rusuah si Rambai tadi tu. Saraso dapek aia ditangah gurun.
“Sajak bilo Kalek tau apo nan Rambai pikiaan?”, agak merah pipi si Rambai batanyo ka Yuang Kalek ko.
“Alaaaah, itu kecil dek den mambaco e tu nyoh Rambai. Dari garik Rambai salamo ko. Dari tatapan mato Rambai. Dari tingkah laku Rambai. Pakok e banyaklah. Sado e maarah kasinan Mbai”
“Ondeeh Kalek. Malu bana Rambai jadinyo. Padohal Rambai dak nio surang juo tau apo nan Rambai pikiaan doh. Sadang Supiak Banun jo batanyo dak Rambai jawek doh. Iko yo kejutan dek Rambai ko mah Lek. Saparo ati Rambai sanang, tapi saparo ati lai malu bana ko ha!”
“Apo lo nan ka Rambai maluan jo Kalek. Demi Rambai, apo se Kalek tampuah mah. Agak nan sarik sakalipun Rambai suruah, Kalek karajoan mah. Tapi….”, gak tasandek setek kato-kato Yuang Kalek.
“Tapi, apo Lek?”, mulai lo penasaran si Rambai ko.
“Tapi jan suruah Kalek mangarajoan PR kimia dak! Paniang kapalo den!”
“hahahahaha…..”, tabasuik galak si Rambai dek e. Yuang Kalek tasipu malu lo mancaliak si Rambai ko.
Salapeh tu tadiam kaduo e. Saliang pandang sambia mamikiaan tanyo nan masih ado dikapalo masiang-masiang.
“Jadi….”, dak sangajo sarentak lo kato tu kalua dari muluik masiang-masiang. Si Rambai batambah merah pipi e dek malu. Yuang Kalek salah tingkah lo dek e. Nyo bae malengah. Tadiam lo kaduo liak, tapi kini jo malu-malu lai.
“Teng…teng..teng..”, tagalenjek kaduo e mandanga lonceng masuak lah babunyi. Dak lamo tibo Supiak Banun dilakang Yuang Kalek.
“Woi, lah babunyi lonceang tu ha.. Mangalah Kalek ko ko ha. Kelas ang disabalah Lek”, nyo tundoan Yuang Kalek dek Supiak Banun. Ma-uok tanyo nan ado di kapalo Yuang Kalek jadie. Padohal lah saketek lai kasampaian niaik Yuang Kalek ko. Bak cando kecek urang, raso bibia lah ditapi cawan. Tapi baa lah, mungkin alun kini niaik baiak Yuang Kalek ko kasampaian lai.
“Gak badarah kau nampak dek den mah Mbai”, sasek Supiak Banun sambia duduak disabalah si Rambai sambia manunggu guru masuak.
“Iyo Piak. Antah baa lo, Yuang Kalek tau apo nan Rambai pikiaan. Takajuik lo Rambai mandangae. Sanang bacampua jo malu Rambai jadie”, sambia sanyun-sanyun si Rambai manjalehan ka kawan dakeknyo ko.
“Baagiah arok jo urang tantu iyo!”, baleh Supiak Banun.
“Baagiah arok baa kecek Supiak ko Piak?”, mulai lo taheran Si Rambai mandanga kecek Supiak Banun tu.
“Iyo, baagiah angin. Sajaleh tu paja lah mangaja-ngaja juo. Tu baagiah angin, tantu lah iyo. Kuciang baagiah dagiang, disembaa a nan ka indak!”
“Ondeeeeh Piak. Iko salah ko mah. Yobana salah. Baa lai ko?”, nyo tapuak kaniang e dek si Rambai ko samba mamikiaan antah a lah kejadian sudah ko lai.
“Salaaah. Mukasuik kau Mbai?”, mulai lo penasaran Supiak Banun dek e.
Saaik tu tibo guru nan ka maaja pelajaran Sejarah.
“Selamat siang anak-anak!”, sapo guru ka murik-murik e.
“Siang buuuk!”, jawek saisi kelas sarentak. Samantaro tu, Supiak Banun nyo culiak si Rambai sambia mangarinyikan alis matoe. Nyo baleh dek si Rambai jo maangkek bahu e tando dak tau a mukasuik Supiak Banun manculiak e.
“Kalek..Yuang Kalek”, kecek Supiak Banun satangah babisiak. Si Rambai dek takuik kanai berang dek guru, dak nyo jawek tanyo Supiak Banun ko doh. Antaro guru malengah ka arah papan tulih, nyo culiak lo Si Rambai ko dek Supiak Banun baliak. Pado tagaduah lo pangana si Rambai mandanga pelajaran sejarah ko dek ulah Supiak Banun, nyo tulih jawek e dikarateh.
“Nan Rambai pikiaan kue nan wak caliak di kantin kapatang Piak. Rambai sadang baimaik baa supayo bisa mambali kue tu!”
Tabulalang incek mato Supiak Banun mambaco jawek si Rambai ko, sambia tabasuik nyo galak.
“Piak Banun, apo nan bagalak an tu. Ado nan salah jo pelajaran Ibuk?”, pinteh guru sejarah ko.
“Iiii…iiiindaaak Buk. Dak ado bbbbuuk”, tagagok-gagok Supiak Banun dek e.
“Kok indak, cubo Supiak jalehan sejarah parang Paderi nan ibuk tarangan minggu kapatang!”, sambia agak tajam caliak guru ko ka Supiak Banun.
“Ooo…. Aaa… Mode ko mah Buk… Wakatu tu, Parang ko dipimpin dek……”, sambia tabata-bata Supiak Banun tapaso bacarito. Nyo sabuik apo nan takana di kapalo e. Lah eboh saisi kelas mandanga carito Supiak Banun ko. Guru ko nyo palapeh Supiak Banun bacarito sapueh e. Dak nyo antian gai doh. Supiak ko lah kahabisan aka, antah a nan kadisabuik. Dek lun jo ado tando guru maminteh Supiak ko, yo nyo tutuah lo sakandak ati e bacarito.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s