Supiak Banun (bagian 4)

Sajak patamuan terakhir Yuang Kalek manakok pangana si Rambai, dak ado se Yuang Kalek ko basobok jo si Rambai lai. Lah bausaho Yuang Kalek nio manamui si Rambai ko, tapi tetap ado halangan. Si Rambai selalu bausaho mailak dari Yuang Kalek. Sampai suatu katiko ditanyo bana dek Yuang Kalek ko ka kawan dakek si Rambai.
“Eh Piak, batanyo den ciek lai buliah Piak?”, kecek Yuang Kalek mahambek langkah Supiak banun ko.
“Ciek jo nyolah, dak buliah labiah gai doh ha!”, jawek Supiak Banun sambia sanyun tasenggeang.
“Adih nah ciek”
“A tu?”, baleh Supiak Banun ko.
“Baa kok payah na manamui si Rambai kini tu Piak? Bantuak mailak dari den lai lo nampak. Ado nan salah dari den Piak?”, tanyo Yuang Kalek.
“ Dak tu a, tadi ang lah bajanji batanyo ciek. Rupo e jadi duo!”
“Ondeeh Piak.. Yobana barituang kau yeh!”
“Dima den barituang, co ang kana permintaan tadi liak. Kan waang nan manyabuik nio batanyo ciek mah, baa kok duo? Sia nan saek kikiro tu?”, pinteh Supiak Banun ko sambia maangkek bibia e cando baruak mancibia.
Nyo tapuak kaniang e dek Yuang Kalek ko sambia manggeleang-geleang.
“Susah den…susah!”
“Kok susah, dak usah”, salo Supiak Banun.
“Mode ko selah, baa kok dak amuah si Rambai basobok jo den lai tu Piak?”, nyo ulang tanyo ko dek Yuang Kalek liak.
Mandanga tanyo Yuang Kalek tu, tadiam Supiak Banun ko. Apokah ka dijawek jujur atau indak. Kok jujur, pasti tarumuak Yuang Kalek. Kok indak, justru maagiah harapan semu nan ujuang e pasti Yuang Kalek ko labiah tarumuak. Tabedo posisi Supiak Banun jadie. Bak cando makan buah simalokamo. Sambia bapikia apo nan ka dijawek, Yuang Kalek taruih manyasakan.
“Oi Piak, jawek lah tanyo den!”
“Eh, iyo Lek. Nyo mode ko mah Lek a. Agak rumik den manjalehan nyo mah. Kok basaba waang gak babarapo hari ko baa nyoh?”, mulai dipiliah e bahaso nan gak sajuak dek Supiak Banun ko.
“Alah, batele-tele cando ayam jantan ka kawin se kau mah. Kecek an selah si Rambai dak suko ka den, abih pakaro. Ko indak, mintak wakatu lo nio manjalehannyo. Nan rumik lah kecek kau…!”, tibo-tibo marepet Yuang Kalek mandanga bahaso Supiak Banun nan diplomatist tu.
“Dak tu a, ang murah tasingguang. Lain dek den lain lo kecek ang”
“Jadi baa, cubo lah tarangan bia nak jaleh lo!”, mulai naiak spaning Yuang Kalek dek e.
“Hmmmm baa yo…!”, mulai lo Supiak Banun mancari aka liak.
“Baa yo baa? Kan dak sarik gai manjawek tanyo den tu tu doh!”
“Sabana e den dak tau jawek tanyo ang tu doh Lek!”, tibo-tibo taloncek se kalimaik tu dari muncuang Supiak Banun.
“Baa, dak Tau? Dak mungkin kau dak tau doh. Baduto kau mah!”, jo suaro Yuang Kalek ko mulai tinggi lai.
Supiak Banun langsuang jo pai maninggaan Yuang Kalek. Nyo dak nio manaruihan manjawek tanyo Yuang Kalek tu doh. Samantaro tu, Yuang Kalek masih penasaran. Nyo kaja Supiak Banun ko.
“Jan pai sakali kau Piak. Tanyo den lun kau jawek lai ha!”, sambia nyo pacikan tangan Supiak Banun ko.
“Kan lah den jawek tadi tu. Nan ma nyo lai?”, Supiak Banun bausaho malapehan tangan e dari dari tangan Yuang Kalek.
Yuang Kalek tetap dak pueh jo jawek Supiak Banun ko doh. Nyo masih maraso Supiak Banun ko baduto. Indak jujur.
“Takana dek den, lah makan kau Piak? Cari makan wak lah, paruik den lapa ha!”
“Alun, pitih den dak ado!”, pura-pura lugu Supiak Banun sakali ko.
“Bia den bayiaan ko, dak sarik na tu doh!”, sambia nyo elo Supiak Banun ka Lapau nasi nan ado di balakang sakola dek Yuang Kalek. Jan lo dibayangan lapau nasi takah restoran. Lapau nasi ko edisi anak sakola, murah meriah kanyang. Supiak Banun dak manjawek ajakan tu tapi kama langkah Yuang Kalek nyo ikuaan juo.
Rupoe samba sadang tajarang, manunggu lo sabanta lo baru bisa ka makan. Sambia manunggu tu, tibo-tibo ado nan takileh nampak dek Supiak Banun di baliak kaleng karupuak.
“Kuwe…!”, sambia agak basorak Supiak Banun mangaluaan kato tu.
“Baa nio kau kue tu? Ambiak lah. Pokok e kau buliah makan sakanyang e hari ko. Jan ragu waden nan bayia!”, sambia agak mambusuangan dado Yuang Kalek malompekan kato tu. Sabananyo Supiak Banun iyo nio mancubo lo kue tu mah, karano kue nan dicaliaknyo tu samo jo kue nan diidam-idaman si Rambai. Sampai kini se si Rambai alun mancubo raso kue tu lai doh, sahinggo penasaran lo Supiak Banun nio mancubo. Baa bana rasonyo. Tibo-tibo kini ado se kawan nan amuah mambayian makan plus kue. Sayang rasonyo kalau dak dimanfaatkan. Tapi tapikia lo dek Supiak Banun ko, kejam lo rasoe mambangkuang kawan. Tibo raso ibo dibanak e.
“Dak, makan se lah Lek!”
“O iyo lah kalau baitu”, baleh Yuang Kalek.
“Tapi kok buliah, den ambiak kue tu ciek dih. Iko dak untuak den doh ha, tapi untuk si Rambai”, kecek Supiak Banun ko.
“Buliah…buliah”, tasirok darah Yuang Kalek mandanga kato Supiak Banun tu.
“Katuju dek si Rambai kue tu tu yo Piak?”
“Ondeeeh. Taloncek den jadi e ha. Sabana e si Rambai lah lamo nio mangicok kue tu mah. Tapi dek kue tu maha, tu mah sampai kini lun pernah dikicok e lai”, kecek Supiak Banun ko. Kok dicaliak harago kue tu, iyo maha untuak saukuran anak sakola mah.
“Oooo mantun. Dak itu doh, baoklah kue ko! Capek kau antaan ka si Rambai. Untuang-untuang alun naiak angkot si Rambai tu lai!”, nyo tundoan Supiak Banun kalua lapau dek Yuang Kalek sambia mamasuakan kue tu ka dalam tasnyo.
“Tapi awak lun makan gai lai ha. Tunggu lah santa lu!”
“Samba se lun masak lai. Batunggu lo iko, ilang lah si Rambai tu nyoh!”, tambah kuaik Yuang Kalek mandorong Supiak Banun.
“Dih nah..!”, jawek Supiak Banun, tapi disempatan nyo juo manjambo kue tu ciek lai. Alah mailang Supiak Banun di baliak gang lapau tu, Yuang Kalek baransua lo pai. Bagageh nyo maninggaan lapau tu.
“Eh..eh Lek. Pasanan waang lah siap ko ha. Baa carito e ko?”, kecek rang lapau. Rupoe ketahuan Yuang Kalek ka lari.
“Dak dih doh Mak. Bisuak jolah, den lah kanyang!”, baleh Yuang Kalek.
“Jan main pai jo ang. Kecek ang dak nampak dek den tadi tu. Cewek ang tu mambaok duo buah kue. Bayia tu lu!”, nyo pinteh langkah Yuang Kalek dek rang lapau.
“Aaa nu…anu mah Mak.. utang deng lu!”, jawek Yuang Kalek sambia manunduak.
“Utang ka utang juo. Utang ang bulan patang lun ang bayia kini lah bautang lo liak. Kok mode ko caroe den kaduan ang ka guru BP lai mah!”
“Ampun….Mak..ampun. Bisuak den bayia. Yobana, den janji!”, mahibo Yuang Kalek sakali ko.
“Yolah, sakali ko lai nyoh lah. Kok dak ang bayia bisauk, tarimo jolah hukuman dari den!”, kecek rang lapau sambia malapehan tangan Yuang Kalek.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s