Supiak Banun (bagian 5)

Dek karano ka mamperingati hari ulang tahun kemerdekaan Indonesia, mako sakola maadoan gotong royong di hari sabtu. Kegiatan baraja dituka jo mambarasiahan sakola. Kapado seluruh murik mulai dari kelas satu sampai kelas tigo dapek jatah mambarasiahan kelas masiang-masiang sarato jo halamannyo. Seluruh murik diwajiban mambaok peralatan gotong royong tu.
Yuang Kalek lah barencana ka manembak si Rambai di hari sabtu tu. Lah nyo buek rencana, salapeh gotong royong diajak si Rambai ko makan pangsit di jalan Ujuang Gurun. Malakik hari H tibo, perasaan Yuang Kalek sabana ndak manantu. Sadoe jadi dak jaleh. Salero makan patah, mato dak amuah lalok, pokok e kanai damam malarindu lah.
Sahari manjalang hari H, Yuang Kalek nio mantes perasaannyo surang kapado si Rambai ko. Tapikia deknyo untuak maikuaan si Rambai. Kok dapek disapo si Rambai ko sangenek bia jaleh lo raso di dado ko sajauah ma. Iyolah dak lamo sasudah lonceng jam kalua main babunyi, tibo-tibo malinteh si Rambai di muko kelas Yuang Kalek. Darah Yuang Kalek tasirok, mukoe pucek. Ikua e bantuak kanai rakek di kursi. Dak namuah diangkek lai. Lah nyo usahoan sakuaik tanago, tapi Yuang Kalek cando patuang duduak di bangku. Dak ciek juo kato nan kalua dari muluik e doh. Nan manandoan Yuang Kalek ko lai urang adolah, paluah e sagadang jaguang manitiak cando aia kran.
Wakatu raso baranti, datak jantuang tambah kancang. Dak siagak lamo raso wakatu nan dirasoan Yuang Kalek ko doh. Kok indak ditokok si Atai bahu Yuang Kalek ko, mungkin sampai lonceng masuak babunyi nyo jadi patuang jo mah.
“Dek a waang Lek, lah basah badan ang dek paluah a?”, tanyo si Atai agak takajuik.
Dak ado suaro nan kalua dari muluik Yuang Kalek ko doh. Mukoe lai mancaliak ka si Atai, tapi muluik e tangango. Dak tantu a nan ka disabuik.
“Tasapo ang ko?”, nyo tapuak agak kareh pipi Yuang Kalek ko dek si Atai.
“Aduah…!”
“Dek a ang, nampak antu?”, penasaran lo si Atai jadie.
“Bekolah pulang sakola den caritoan Tai. Lun dibadan aruah den lai doh ha!”
Sampai lonceng pulang babunyi, yo dak ujuik pangana Yuang Kalek baraja doh. banyak bamanuang e. Untuang se dak taparatian dek guru doh. Kok tau guru, mungkin yo dak siagak cobaan Yuang Kalek hari ko doh.
Sambia jalan pulang, disasakan nyo Yuang Kalek dek si Atai pakaro tadi tu.
“Mode tu carito e Tai. Yobana dak badayo den doh!”, panjang leba Yuang Kalek manjalehan ka si Atai. Tibo-tibo si Atai galak takakah-kakah. Indak ibo nyo mancaliak kawan e doh, malah kanai galakan.
“Lamah ang mah Lek. Masak takah tu se lah kuncun ang!”
“Mande ang Tai. Indak den buek-buek gai tu doh. Otomatis jo tibo e. Yo sabana takuik den kiroe. Baa lah caroe lai koha. Bisa bubar rencana den bisuak ko!”, aia muko Yuang Kalek mulai panik nampak e.
“Gampang tu nyoh, den ado ubek e!”
“Sabana e tu Tai?”, mulai cerah roman Yuang Kalek ko liak.
Duo urang sahabat tu, dak langsuang pulang doh. Nyo bae singgah ka dangau di tapi sawah lu untuak mamatangan rencana bisuak.
“Lai namuah ang pakai pamanih Lek? Bagak ang dek e mah. Tu ciek lai, dak ka talok gai dek si Rambai manulak ang tu doh!”, mulai lah si Atai mancarian jalan kalua e. Untuak sasaaik tadiam Yuang Kalek ko. Bapikia karehnyo. Diindakan tawaran si Atai ko, antah. Kok diiyoan, antaro picayo jo indak.
“Lai ka mangkuih pamanih ang tu? Dak yakin den doh Tai!”, tabik ragu Yuang Kalek.
“Kok dak yakin yo sudah. Dak usah dipakai. Dak sarik na tu doh!”, nyo bae tagak dek si Atai baragak ka maninggaan Yuang Kalek di dangau tu.
“Tunggu, tunggu lu Tai. Ang pamanggok mah!”
“Waang nan panakuik, aden lo nan pamanggok ang sabuik!”
“Yolah, den cubo pamanih ang tu. Tapi kok dak mangkuih beko baa? Apo jaminan ang?”, tanyo Yuang Kalek untuak manambah kayakinan di diri e.
“Kok indak mangkuih beko, cukuik sampai disiko se wak bakawan. Jan ang anggap ado den lai!”, mandanga jawek si Atai takah tu, yo lai tabik sumangek Yuang Kalek ko.
Sapakaiklah Yuang Kalek ko manuntuik ilmu pamanih dari si Atai. Rupoe dak lo lapeh anda jo ilimu ko doh. Ado lo rukun syaraik e. Mujua lai dak disuruah e Yuang Kalek ko dek si Atai mambaok ayam putiah sikua, pisau, kain ganiah jo bareh. Lai lapeh dek nasi goreang sapiriang se.
“Ang catat lah pamanih ko. Ang apa elok-elok. Kalau lah dikapalo ang doa ko, bacoan kutiko kabasobok jo urang nan ang tuju. Sudah tu ambiak aia langik-langik ang jo kadua ampu tangan, sudah tu lepongan dikaniang ang. Jan lupo, malepongan e basilangan ampu tu di kaniang mah!”, sambia nyo cuboan gerakan tu dek si Atai ko.
“Catat lah iko doa e:
Bismillahirahmannirrahim..
Tajali sifatullah
Aku bakato baqalamullah
Suaro aku indak tatindiah
Pintak aku indak talampau
Si manih kato, aku pintakkan
Tabikkan cahayo tampang bungo ka diri aku
Aku tau asa mulo kejadian engkau
Darah putiah dari bapak
Darah merah nan turun kapado bundo
Jiko mandanga hatinyo tasirok
Suaro Aku nan manyirokkan hati si anu…(sabuik namonyo)
Tacurahlah kasiah sayangnyo kapadoku siang jo malam
Dikatokan bulan ampek baleh nan manih, Aku nan manih
Dikatokan tangguli nan manih, Aku nan manih
Akulah nan manih di pandang si anu…
Pamanih Allah
Pamanih Muhammad
Pamanih bagindo rasulullah
Mukabua barakaik Lailaha illallah
HU….”
Salasai manuntuik dari si Atai, yo lai agak tanang pangana Yuang Kalek jadie. Lah mulai tabik picayo dirinyo liak.
Tibolah hari nan ditunggu-tunggu tu. Dari jauah lah nampak si Rambai sadang mambarasiahan kaco kelasnyo. Yuang kalek lah siap jo ilimu nan dituntuik e kapatang. Kiro-kiro lah diraso pas jarak pandang Yuang Kalek ka si Rambai ko, mulai lai dibaco mantra pambarian si Atai ko. Antah a nan tajadi, tibo-tibo kaku lidah Yuang Kalek ko. Dak ado se kalimaik nan kalua dari muluiknyo doh. Lah sakuaik tanago mancubo mambaco doa tu, tetap dak ado kalimaik nan kalua. Mulai timbua paniknyo liak. Lah tabayang rusak rencana nyo ko. Tampa diduga, kanai tapuak bahu Yuang Kalek ko.
“Eh Lek, manga Kalek maandok-andok dibaliak bungo ko ko. Bantuak main cik mancik lai lo nampak dek Iyuih?”, sasek si Yuih kawan sakelas Yuang Kalek ko.
“Aaanu Yuih. Den takuik kanai suruah-suruah dek guru ko. Mako e den mandok, tapi jan kau sabuik lo ha, mambana den!”, sambia maangkek jarinyo nan sapuluah patando mamohon.
“Dasar pamaleh!”, sudah tu pai se si Yuih ko lai. Bantuaknyo yo lai dak nyo kaduan ka guru doh. Lapang angok Yuang Kalek, untuang dak ketahuan.
Dicubolah baliak mambaco mantra ko. Dihiruiknyo angok dalam-dalam agak duo kali ulang sudah tu nyo cubo mambaco mantra ko. Mujua bana, lai dak kaku lidah nyo lai. Lancer dibacoe doa tu. Salapeh mambaco doa tu, langsuang nyo silangan kaduo ampu tangan e di kaniang.
“Yuih…!”, sorak Yuang Kalek. Tapi timbua pangana dek e,
“baa kok si Yuih nan den imbau ko”, bisiak e dalam hati. Dak lamo maengong si Yuaih ka arah Yuang Kalek ko. Dak dalam ituangan minik gai doh, balari si Yuih ko mangaja ka arah Yuang Kalek.
“Ondeeeh, Lek. Baa dek sabana gagah na Kalek nampak dek Iyuih kini ko?”, langsuang nyo paguik Yuang Kalek dimuko urang rami. Yuang Kalek tagalenjek. Apo nan tajadi sabana e ko. Dilapehan e paguik si Yuih, sudah tu ditabeh e lari sakancang-kancang e. Urang sabalik basorak. Dalam balari tu, utak Yuang Kalek taruih bapikia. Tibo diujuang lapangan ado batang pinang gadang. Nyo bae baranti disinan, sambia maandok dibaliak batang pinang tu.
“Ondeeeh….mak… Namo si Yuih nan den sabuik tadi kiroe!”, sambia nyo tapuak kaniang e.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s