Supiak Banun (bagian 6)

Hari sabtu tu, dak Yuang Kalek sajo nan mangalami nasib buruak doh, sakola tampek inyo manuntuik ilimu juo banasib malang. Salasai kegiatan gotong royong di sakola, banyak diantaro murik-murik bajalan kaki sambia basanda gurau ka arah galanggang olah raga nan indak baitu jauah dari komplek sakola tu. Untuang indak dapek diraiah malang indak dapek ditulak, tajadi saketek kesalahapahaman nan babuntuik panjang. Bamulo dari manggaduah padusi, baujuang jadi cakak banyak.
Kajadian tu dimuloi dek sakalompok anak esteem manggaduah anak esem a tampek Yuang Kalek manuntuik ilimu. Cewek nan digaduah ko maraso dak sanang, tu nyo kaduan ka kawan laki-laki e. Singkek carito ujuang-ujuang e bacakak banyak sampai mangakibaikan marusak sakola. Sakola Yuang Kalek hari sinayan e kanai sarang dek anak esteem ko. Sahinggo tagaduah kegiatan baraja. Dek karano lah pakai parang antar sakola, pado babuntuik korban jiwa lo, mako pihak sakola maliburan murik e salamo tigo hari.
Antah kebetulan atau indak, nan jaleh nasib malang Yuang Kalek diiriangan lo dek sakola e. Samantangpun baitu nan Yuang Kalek ko dari rumah tetap pai sakola. Inyo dak mangecek gai ka urang gaek e bahaso urang libur tigo hari doh. Cuma sakola e sampai taman bacaan pak Botak langganan e. Untuak jago-jago alamaik sakola nan manempel di langan bajue ditanggaan untuak samantaro. Ma tau-an basobosok jo garombolan anak esteem ko dipasa, bisa abih kanai pasamoan dek e ko. Kikiro jam pulang sakola, inyo pulang lo cando biaso e. Mode tu dilakuan e salamo urang libur. Alasan e sederhana sabananyo nyoh, kalau libur biaso e Yuang Kalek libur lo balanjo dari gaek e.
Cukuik di hari katigo, katiko bajalan nio ka pulang, basalisiah jo anak ketek,
“Baa kok mirip ang jo den?”, tibo-tibo Yuang Kalek tabik suga e. Nyo angkek krah baju anak tu. Anak ko paliang kareh kelas anam esde baru.
“Apo salah wak da?”, jawek anak ko mati kacamehan.
“Baa kok ang tiru lo roman den?”, tambah dikuaikan e pacik krah baju tu dek Yuang Kalek ko.
“Ampuuuun da….”, langsuang manangih anak ko. Mandanga tangih ko langsuang lo dilapehan e dek Yuang Kalek krah baju anak tu. Urang sapanjang jalan mulai mancaliak ka arah Yuang Kalek ko. Tanpa maraso basalah, Yuang Kalek malanjuikan jalan e. Anak tadi dibiaan e manangih. Mungkin dek anak tu lah manangih mah, mulai lo anggau Yuang Kalek ko. Jan-jan beko tibo urang mangaroyok e karano nan digertak e ko anak esde.
“Hoi, baa kok patangih anak urang”, kanai tapuak bahu Yuang Kalek dari balakang. Tagalenjek Yuang Kalek dek e.
“Wakau Piak. Kanciang kau mah, takajuik den!”, rupo e katiko Yuang Kalek manggertak anak esde tadi kebetulan Supiak Banun lewat lo disinan. Dek maraso penasaran, baa kok nyo gertak anak ketek tu mako e dituruik e Yuang Kalek dek Supiak Banun.
“Baa kok ang gertak anak ketek tadi tu? A salah paja?”, tanyo Supiak Banun.
“Dak do doh. Den iseng se nyoh!”, ringan se jawek Yuang Kalek ko.
“Iseng baa kecek ang ko. Tabik tangih anak urang dek ulah ang, iseng kecek ang!”, baleh Supiak Banun.
“Biaso nyoh tu. Buliah bagak lo anak tu!”, tambah binguang Supiak Banun mandanga jawek Yuang Kalek ko.
“Bagak baa mukasuik ang ko?”
“Iyo bagak. Dak takah den doh!”
“Dak mangarati den doh Lek. Dak itu doh, baranti lah wak santa lu. Itu ado urang manggaleh minuman a!”, nyo ajak lah Yuang Kalek maronggoh dikadai kaki limo dek Supiak Banun ko.
“Kini co cubo ang jalehan ka den, a mukasuik ang tadi tu Lek?”, nyo ulang tanyo ko dek Supiak Banun liak.
“Dak kau paratian anak tadi tu Piak?”
“Ma nampak dek den tu. Den dari jauah se mancaliak tadi nyoh. Dek onggak jalan ang mako den turuik tadi tadi. Raso den kenal, rupoe iyo waang!”
“Anak tadi tu mirip bana mukonyo jo den. Takajuik lo den mancaliak kok ado urang nan mirip muko e jo den. Tibo-tibo jo talinteh dikapalo den nasib anak ko ka samo lo jo den. Tu den gertaknyo, supayo inyo bagak indak panakuik takah den!”
“Panakuik?” pinteh Supiak Banun.
“Iyo, panakuik!”, tu tadiam kaduonyo. Saliang pandang. Supiak Banun jo binguang e bapikia kareh maaratian kecek Yuang Kalek. Samantaro Yuang Kalek lah maraso salasai nyo manjawek tanyo kawan e ko.
“Ooooo den tau lai. Iko nan ang mukasuik carito hari sabtu ka patang yo?”. Jo angguak se nyo jawek tanyo Supiak Banun ko dek Yuang Kalek.
“Jadi ang pangaan si Yuih? Kawan-kawan banyak lo batanyo-tanyo mah. Baa dek tibo-tibo si Yuih mamaguik ang!”, mulai tau Supiak Banun arah carito Yuang Kalek ko.
“Malu den mancaritoan e mah. Cukuik den jo Tuhan jo nan tau! Eh, si Atai ciek lai!”, lai takana juo dek Yuang Kalek ko paragiah kawan e tu kiro e.
“Si Atai?”
“Ah lupoan selah. Sakik kapalo den mikiaan e mah!”, mangguak-angguak ketek se Supiak Banun mandanga jawek Yuang Kalek ko.
“Tu si Rambai ang pangaan?”, nyo cari jalan lain dek Supiak Banun mambongka misteri ko.
Dak dapek jawek Yuang Kalek dek tanyo Supiak Banun ko doh. Raso ka salasai dunia ko bisuak. Baa lah manjalehannyo, kamari senjang.
“Lai namuah kau manyimpan rasio Piak?”, dicubo lah badiplomasi dek Yuang Kalek saketek, dengan harapan masih ado peluang mandapekan si Rambai.
“Jo den jan ragu lo ang lai Lek. Den baok mati rasio tu mah!”, mulai dapek angin Supiak Banun ko.
“Nyo mode ko mah. Hari sabtu tu, waden barencana manembak si Rambai. Sahari sabalun e den cubo mandakek i si Rambai ko tapi tabik cameh den. Antah dek a lo badabok kancang jantuang ko. Tu den caritoan ka si Atai. Sudah tu diagiah e den pamanih, salain bia tambah pede den, bia ditarimo lo cinta den dek si Rambai ko!”
“Jadi ka waang pelet si Rambai?”, nyo pinteh carito Yuang Kalek dek Supiak Banun.
“Danga lah dulu. Lun sudah den bacarito lai!”
“Sabagai padusi tasingguang den mandanga ang pakai pamanih ko Lek. Apolai ka waang cuboan lo ka kawan dakek dek!”, tabik rabo Supiak Banun ko.
“Kan dak ado den pelet si Rambai tu doh. Jan marepet jo sakali!”
“Oyo ndak. Si Rambai se sambai kini dak baa-baa doh!”, mulai malunak suaro Supiak Banun ko.
“Aaa tu baa lo hubungannyo jo si Yuih ko? Lun nyambuang den lai doh ha!”, baliak batanyo Supiak Banun ko.
“Itulah nan jadi masalah e!”
“Mukasuik e jadi masalah?”
“Jadi kutiko hari sabtu tu. Waden lan siap jo pamanih ko. Tapi katiko mancaliak si Rambai jantuang den badabok kancang lo liak. Tu den bae maandok dibaliak bungo sambia mananangan jantuang ko. Eee, antah dari ma tibo e mancogok jo si Yuih ko dakek den. Disaseknyo den. Tu antah baa kejadian e, ka si Yuih ko selai tabacoan pamanih tu!”
“Yo kurang aja waang mah Lek. Kok ka sia bana lah waang tujuan pamanih tu, nan waden tetap dak suko. Cubolah ang bayangan kok tajadi lo ka adiak atau kakak padusi ang takah tu. Baa kikiro?”
Dak dapek jawek Yuang Kalek dek e doh. Abih main Yuang Kalek sakali ko.
“Sudah lah Lek, den dak kawan jo waang lai doh. Waang lah malukoi hati den sebagai saurang padusi!”, nyo bae se pai dek Supiak Banun ko.
“Oi Piak tunggu lu. Dangalah setek lai ha!”, Nyo kaja Supiak Banun ko capek dek Yuang Kalek. Tibo-tibo ado nan mamacikan krah baju Yuang Kalek dari balakang.
“Buliah ang bacakak jo cewek ang Yuang, tapi minuman yang ang minum bayia lu!”, kecek rang kadai.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s