Supiak Banun (bagian 7)

Buruak na manuang Idaih sakali ko nampak e. Biasoe sapulang sakola nyo langsuang pulang. Dak amuah duduak bamanuang manunggu urang abih doh.
“Tumben, kau lun pulang lai Daih!”, sasek Supiak Banun.
“Iyooo.!” Tu mancilebe jo Idaih ko lai. Tabik lo panik Supiak Banun ko dek e. mandanga Idaih manangih tu, mancogok si Rambai dari lua kelas.
“Mbai, kamarilah!”, dikubik e si Rambai dek Supiak Banun sambia agak babisiak.
“Dek a Idaih?”, tanyo si Rambai. Nyo caliak si Rambai dek Idaih ko. Tu nyo bae manunduak dek Idaih ko ka arah kaki e. Supiak Banun jo si Rambai masih binguang, dak mangarati mukasuik Idaih ko doh.
“Sapatu Idaih!”, jawek Idaih singkek sambia manyeka aia matoe. Nyo pana dek si Rambai jo Supiak Banun sipatu Idaih ko elok-elok. Saliang pandang kaduo e.
“Oooo sipatu baru!”, sarentak si Rambai jo Supiak Banun mamijak sipatu Idaih ko. Tambah manjadi rarau Idaih dek kalakuan urang baduo ko.
“E e e eh, batambah manjadi tangih e a!”, kecek si Rambai.
“Dari tadi urang bi mamijak sapatu Idaih juo, dak ado nan mangarati surang juo doh!”, baleh Idaih.
“Idaih..Idaih. Kau makai sipatu baru tantu iyo dipijak urang sipatu kau tu. Bantuak lun tau se kau parangai kawan-kawan mah!”, pinteh Supiak Banun ka Idaih.
“Lai tau Idaih tu Piak, tapi kaki Idaih ko ha. Sakiiiiik bana!”, sambia nyo caliakan ka kawan e tu baa bantuak kaki e tu.
“Dek a tu Daih?”, sarentak Supiak Banun jo si Rambai batanyo.
“Malaleh dek sapatu. Nan luko e ko lo nan dipijak kangkawan. Baa dak ka tabik tangih Idaih dek e!”
“Eeeeee pampam yeh…!”, ditapuak e kaniang e dek Supiak Banun mandanga panjalasan Idaih tu.
“Tu lah a, payah Idaih bajalan jadi e. Tiok dibaok malangkah, bagesoh jo luko e ko. Baa caro e lai ko?”
“Itu lo nan ka sarik tu, kau tanggaan lah sipatu tu. Abih pakaro!”, kecek Supiak Banun.
Mandanga kecek Supiak Banun ko iyolah dibukak e sipatu e dek Idaih ko. Nyo jinjiang sipatu tu sambia kalua kelas.
“Pek lah pulang wak lai, lah langang urang!”, ajak Idaih ka kawan e nan baduo tu. Supiak Banun jo si Rambai tangango se mancaliak Idaih ko. Dak manyangko lo e Idaih ko langsuang manarimo ide Supiak Banun tu doh.
“Jajajjadih!”, kecek si Rambai sambia manahan galak. Ditutuik e muluik e supayo dak ketahuan bana dek Idaih. Takuik beko tasingguang lo Idaih ko.
Sambia bajalan pulang, maota jolah kawan batigo ko. Supiak Banun jo si Rambai saliang tundo di balakang Idaih. Supiak Banun bausaho manjarak dari Idaih, tapi si Rambai bausaho mandorong Supiak Banun supayo sejajar jo Idaih ko. Rupoe malu lo kawan baduo ko bajalan jo Idaih nan manjinjiang sipatu ko. Tapi si Rambai tetap bausaho manjago perasaan kawan e tu. Bukan tanpa sabab urang baduo tu malu, karano urang di lapau muko sakola lah tabasuik dek galak. Nan Idaih ko indak jo sadar doh. Nyo sangko juo urang iseng manggaduah anak gadih lewaik.
“Piak…Piak, capek stek Piak. Angek aspal ko komah!”, nyo tungguan Supiak Banun mandakek dek Idaih ko.
“Yo..yo..”
“Eh, Piak, cubo caliak dek Supiak tu a”, kecek Idaih katiko Supiak Banun lah dakek.
“A tu Daih?”, timbua tanyo dek Supiak Banun ko.
“Lah salamo tu wak sakola ha, baru tau Idaih bahaso disampiang sakola wak ko ado urang manjua pangsit. Bali pangsit wak lu lah!”, mancaliak Idaih ka arah Supiak Banun jo si Rambai. Sabana e Supiak Banun jo si Rambai nio bana mah makan pangsit, apolai perai. Karano biasoe kalau ado kawan nan maajak makan ko, inyo nan mambayiaan.
“Antilah Daih, lah siang na lo hari a. Lambek wak tibo di rumah ko!”, jawek si Rambai.
“Ooo yolah kalau bitu. Peklah pulang waklai!”, ajak Idaih ko.
“Eh, kau naiak angkot putiah dak Daih?”, tanyo Supiak Banun.
“Iyo, baa tu Piak?”
“Taruih lah lu Daih, kami naiak bis kota”, baleh Supiak Banun.
“Tapi wak saarah mah, baa dek naiak bis kota lo?”, tanyo Idaih ko.
“Aaaado nan kami cari ka pasa Daih. Taruih lah lu”, untuang pandai Supiak Banun mancari alasan.
“Ooo yolah kok mantun. Idaih pulang lu dih”, bajalan lah Idaih ko surang pulang sambia manjinjiang sipatu e nan lah kumuah dek dipijak-pijak kawan-kawan e.
“Baa kau indak an tawaran si Daih tu Mbai? Padohal paruik den lah mamintak ko ha”, kecek Supiak Banun sambia manahan langkah si Rambai.
“Itulah manjauah jo bajalan tadi!”
“Malu den Mbai… Sabana malu ko ha. Dak kama kadisuruakan muko ko doh! memangnyo baa Mbai?” tanyo Supiak Banun.
“Dak tabaunan dek Rambai doh Piak. Kok baranti lo makan pangsit, indak kanyang nan didapek doh, malah muntah mungkin mah!”, jawek si Rambai.
“Apo nan baun Mbai?”, penasaran lo Supiak Banun jadi e.
“Sipatu baru Idaih tu!”. Mandanga jawek si Rambai tu, tabasuik galak Supiak Banun dek e.
“Pangsit raso tarasi ndak Mbai”, kecek Supiak Banun. Sambia galak-galak kaduo sahabaik tu pulang lo ka arah jalur angkot putiah.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s