Supiak Banun (bagian 8)

Tiok hari sinayan, sabalun masuak pelajaran jam partamo selalu ado upacara bendera. Salamo ko Idaih dak pernah talambek doh. Tapi hari ko, yo agak talambek nyo tibo di sakola. Sababnyo masih dek kakinyo nan malatua akibaik sipatu baru tu. Biasonyo bajalan dari rumah sampai naiak angkot hanyo limo minik, kini duo kali lipeknyo mahabihan wakatu. Alun barabuaik naiak angkot lai, alhasil Idaih tibo di muko sakola pas gerbang baru ditutuik bana dek panjago sakola. Untuak sasaaik tamanuang Idaih mamandang gerbang nan lah kanai batutuik tu. Bakacamuak isi kapalo e. Lah tabayang bahaso sahari ko inyo dak bisa masuak sakola. Dak tantu ka manga nyo lai doh.
“Eh Daih, baa dek bamanuang? Peklah ka lakang!”, nyo elo tangan Idaih dek si Atai. Ruponyo si Atai talambek lo. Antah baa sakali ko si Atai lewaik gerbang muko, padohal salamo ko si Atai selalu masuak lewaik gerbang balakang. Jo binguangnyo Idaih manuruik sajo jo si Atai ko. Ruponyo pintu gerbang balakang sakola indak ado doh.
“Bisa masuak dari balakang mah Tai!” heran sakaligus sanang ati Idaih karano bencana nan dibayangannyo tadi langsuang hilang.
“Tapi elok-elok masuak barisan. Jan sampai nampak awak masuak kudian. Paratian bana ibuk nan di ujuang lapangan tu!”, kecek si Atai maagiah arahan ka Idaih.
“Jadih!”, baleh Idaih sambai maongkok-ongkok maintaian wakatu nan pas untuak masuak barisan. Ruponyo dak Idaih jo si Atai ko jo nan talambek doh. Ado limo urang lai lo nan maikua. Jadi memang harus hati-hati bana mancilok masuak barisan. Kok sakali bagaduru tantu ketahuan. Basimalang basimujua lah si Atai jo Idaih ko.
Sabananyo Idaih jo si Atai ko alun talambek bana gai doh. Karano masiang-masiang kelas masih sibuk maatur barisan. Ikolah kesempatan nan paliang pas untuak manyusup. Dan batua, Idaih jo si Atai dak manamui kasulitan nan bararti untuak bagabuang jo kawan-kawannyo. Guru nan biaso bagerilya mancari urang nan talambek alun pulo sempat mancek lai doh.
“Untuang bana Tai, untuang bana awak indak ketahuan!”, jo sanang ati nyo Idaih bagabuang jo barisan.
“Iyo Daih. Untuang dak ketahuan awak. Kini pai lah kau masuak barisan nan padusi”. Barisan anak padusi memang bapisahan jo anak laki-laki, tapi dak talampau jauah gai jaraknyo doh. Katiko Idaih jo si Atai lah tanang masuak barisan, baru upacara bendera dimulai.
“Adu..duu..duu…duah”, tadanga si Atai mamakiak.
“Capek babaris waang di barisan anak-anak nan talambek!”, tadanga guru kimia nan setreng tu manjinjiang talingo si Atai.
“Awak dak talambek doh buk!”, jawek si Atai.
“Jan aden lo nan ang ota lai. Lah gaek den komah!”, baleh guru tu.
“A bukti e awak talambek Buk?”, si Atai masih mambela diri, karano nyo yakin bana bahaso tadi tu inyo dak nampak gai manyusup doh.
“Co ang caliak elok-elok kawan ang sakuliliang. Dima ang tagak ko?”, batanyo baliak guru kimia ko ka si Atai. Ruponyo si Atai masih tagak dibarisan kawan-kawan sakelas Idaih. Luponyo bahaso inyo dak sakelas jo Idaih ko doh.
Idaih nan mandanga si Atai mamakiak dek kasakikan mulai lo cameh. Jan-jan inyo ketahuan lo. Sempat guru ko bajalan disampiang Idaih. Idaih batambah cameh, mukonyo mulai tampak pucek.
“Dek a kau Daih? Pucek na mukai kau nampak dek Ibuk?”, disasek e Idaih dek guru ko. Karano dari kajauahan lah nampak Idaih ko gelisah. Maklum inyo baru sakali ko talambek.
“Eh, dak baa doh buk!”, jawek Idaih agak cameh.
“Kok sakik, rancak dak usah sato upacara. Duduak sajolah di kelas!”
“Dak baa doh buk. Idaih lai sehat nyoh buk!”
“Yolah, tapi jan dipasoan bana. Beko rabah lo dilapangan ko. Kok memang dak talok langsuang sajo masuak kelas yo!”
“Yo Buk!”, baleh Idaih. Sudah tu guru kimia tu pai mamareso barisan nan lain. Mulai badarah muko Idaih baliak. Tapi ado juo nan takilan-kilan di ati Idaih ko. Masih dak lamak pangana Idaih ko doh, sabab inyo jo si Atai samo-samo talambek. Tapi inyo salamaik samantaro si Atai kanai tangkok. Biasonyo nan kanai tangkok ko barisan e dipisahan sudah tu urang salasai upacara, mereka tu baulang lo upacara baliak sampai jam kalua main.
“Baa kok talambek kau Daih?”, tanyo Supiak Banun.
“Itulah, kaki Idaih masih sakik. Jadi talambek dapek angkot tadi!”
“Tapi, kau sairiang jo si Atai nampak dek den tadi. Kok bisa?”, mangkatutuih tanyo Supiak Banun ko.
“Itulah Piak. Rusuah lo Idaih maagakan e. Kok dak dek si Atai ko, dak katibo gai Idaih dibarisan ko ko doh!”
“Mukasuik e Daih?”, yo dak putuih-putuih tanyo Supiak Banun ko nampak e doh.
“Si Atai nan manunjuakan ka Idaih bahaso bisa masuak lewaik gerbang balakang. Ruponyo gerbang balakang pintunyo dak ado doh!”
“Oooo mantun. Sttt, ibuk tadi tibo ibuk tibo!”, tibo-tibo jadi patuang Supiak Banun dek nyo.
Salasai upacara Idaih bisa malenggang masuak kelas, samantaro si Atai dapek hukuman lanjutan. Ado babarapo urang nan sato jo si Atai tu. Lamo Idaih tamanuang di muko kelas sambia mancaliak kawan-kawannyo kanai hukuman.
“Daih, masuak lah. Manga kau tangak di pintu tu!”, kecek Supiak Banun sambia maegang tangan Idaih masuak kelas.
“Dak lamak perasaan Idaih doh Piak!”, baleh Idaih.
“Jadi……?”
Dak dijaweknyo gai tanyo Supiak Banun tu doh, Idaih langsuang sajo bajalan ka arah kawan-kawan nyo nan dihukum tu.
“Ado apo Daih?”, kecek guru kimia tadi.
“Idaih nio sato dihukum lo Buk!”, jawek Idaih padek.
“Kok baitu. Jan sok jadi pahlawan lo Daih. Tadi Idaih pucek nampak dek Ibuk, kini mintak dihukum lo. Jan mancari ilik-ilik jo Ibuk Daih!”
“Sabananyo Idaih talambek lo tadi mah Buk!”
“Oooo, jadi kau pucek tadi tu dek talambek tu yo!”. Manakua se Idaih ko nyoh. Dak talok nyo manjawek lai doh.
Bagabuang lah Idaih jo kawan-kawan nyo nan lain kanai hukuman. Walaupun Idaih lah mangaku talambek, tetap dak dapek keringanan dari guru tu doh.
“Manga kau mangaku lo Daih?”, tanyo si Atai.
“Dak lamak Idaih ka Atai doh. Awak samo-samo talambek!”
“Atai….Idaih… diam. Jan mahiruak. Nampak jo sakali lai mahiruak Ibuk tambah hukumannyo!”, tadanga guru kimia tadi manyasek si Atai jo Idaih ko. Sampai hukuman salasai, Idaih jo si Atai antok sajo lai tanpa suaro. Bahkan untuak saliang pandang gai indak doh.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s