Supiak Banun (bagian 9)

Kejadian upacara bendera kolah nan manjadi tonggak kagalauan hati si Atai. Antah apo namonyo, sajak kajian tu, pangana si Atai dak bisa jauah dari Idaih. Ado-ado sajo nan dipikiaan si Atai ko tantang Idaih. Ditambah pulo sajak kejadian tempo hari tu, si Atai dak pernah bisa batamu muko langsuang jo Idaih ko lai. Antah disangajo atau indak, nan jaleh si Atai jo Idaih ko memang dak ado batamu muko lai. Samakin hari pangana si Atai dak bisa baraliah dari Idaih ko doh. Mungkin iko nan disabuik urang tu dimabuak cinto.
Mulai lah si Atai ko mancari aka, baa supayo basobok jo Idaih ko. Karano nan dari pandangan si Atai, seakan-akan Idaih ko manjarak dari nyo. Kalaupun dak batamu muko, sakurang-kurangnyo mandanga suaro nyo sajo jadih jolah dulu.
“Apo nan ang manuangan Tai”, nyo saasek dek Yuang Kalek sambia manapuak bahu si Atai dari balakang.
“Waang Lek, takajuik den. Indak ado doh!”, bausaho si Atai manyuruakan perasaannyo nan sabanae.
“Duto ang mah. Waang se dak biaso bamanuang doh, pasti ado sesuatu!”, nyo cubo manakok-nakok uwok dek Yuang Kalek ko.
“Sabanae waden mamikiaan nasib ang mah Lek!”, kecek Si Atai mancari alasan.
“Mamikiaan nasib den? Dak mangarati den doh Tai!”, mulai binguang Yuang Kalek mandanga kecek si Atai tu.
“Ang masih suko ka si Rambai kan?”
“Aden dak nio ang jebak sakali lai doh Tai. Cukuik Iyuih ko sajo nan manjadi mimpi buruak den!”. Ruponyo pangaruah capak-capak baruak nan ditunjuakan si Atai nan dulu tu baujuang jo bajadiannyo Yuang Kalek jo Iyuih. Iyuih ko sabana gigiah maintaian langkah Yuang Kalek. Mau tak mau, tapaso juo pacaran mereka baduo ko. Sajak tu Yuang Kalek dak namuah lai mancubo-cubo ilimu nan diajaan si Atai.
“Eee yayai yo. Aden tau bana ang masih suko ka si Rambai. Dak capak-capak baruak gai den suruah ang untuak mandakek i si Rambai tu doh. Tapi selingkuh!”. Tadiam Yuang Kalek mandanga kato-kato selingkuh ko. Dak pernah tabayang dek nyo sabalumnyo ide ko doh.
“Yo santiang ide ang yo Tai. Tau den… tau..!”, badarah muko Yuang Kalek sakali ko.
“Kan lai paham ang kama arah cito den ko kan?”, pinteh si Atai.
“Paham, paham bana. Mungkin jo caro iko, Iyuih bisa berang ka den. Batua..batua Tai, waden harus mancari ilik-ilik jo Iyuih ko!”, nyo paluak kawan e ko arek-arek. Karano kini mulai nyo marasoan hiduik baliak.
“Jadi apo nan alah tapikia dek waang Tai?”, tanyo Yuang Kalek ko manyasakan kawan nyo ko.
“Partamo-tamo, ang harus manjalehan ka si Rambai bahaso waang alah putuih jo Iyuih. Kok ka baa-baa ka caro lah!”
Tadiam Yuang Kalek sasaaik. Pangananyo baputa kancang, dari ma harus dimulai. Samakin dipikiaannyo samakin dak nampak jalan ko doh.
“Baa, lah sobok caro e Lek? Atau masih binguang ang?”, kecek si Atai.
“Yo lun tabayang dikapalo den baa caro e doh Tai!”, mulai suram aia muko Yuang Kalek ko liak.
“Kok lai namuah ang maikuikan saran den, den tunjuakan!”
“Kalau pelet ka pelet den indak doh Tai a, tobat den!”
“Indak, wak main cantik!”, bausaho si Atai mayakinan kawan e ko.
“Jadi mode ko mah Lek. Waang jan langsuang mangarah ka si Rambai, ketahuan dek nyo ko. Partamo ang dakek i kawan dakek e. Misal Supiak Banun atau Idaih!”, mulai lah si Atai maatur strategi.
Iyo lah dikarajoan dek Yuang Kalek ko saran si Atai. Sapulang sakola, nampak dek Yuang Kalek ko Supiak Banun dak sairiang pulang jo si Rambai doh. Nyo pinteh lah langkah Supiak Banun ko.
“Piak, tunggu Piak!”, sorak Yuang Kalek. Supiak Banun dak manjawek sorak Yuang Kalek ko doh, tapi nyo lai baranti. Nyo tungguan Yuang Kalek mandakek.
“Manga?”, kecek Supiak Banun.
“Nonton festival band wak sabtu bisauak lah!”, mulai lah strategi ko dimainan Yuang Kalek. Kebetulan lo ado festival band antar esem a sabtu bisuak tu.
“Den dak bapitih doh!”, katuih se jawek Supiak Banun ko.
“Den balian tiket ko!”
“Baduo se wak pai?”, agak malunak Supiak Banun ko stek.
“Dak mungkin gai kau namuah kalau wak baduo pai doh. Ajak gai si Rambai jo Idaih. Beko den ajak lo si Atai. Jadi pai rami-rami wak!”
“Tu tiket si Rambai jo Idaih?”
“Tingga pai se kau lai Piak. Dak kalua biaya gai doh!”. Supiak Banun dak basuaro gai sudah tu doh. Tapi nampak nyo maangguak-angguak.
“Den tanyo ka si Rambai jo Idaih lu dih!”, baleh Supiak Banun tibo-tibo.
“Jadih… eh iyo kau ado nomor telpon si Rambai dak? Bia beko dek yakinan lo nyo ko!”, maraso dapek angin Yuang Kalek ko.
Dikusai e lah isi tas e dek Supiak Banun ko mancari buku ketek e. Di buku tu cukuik nomor telpon kawan-kawan e.
“Ondeeeh, buku telepon den tatingga Lek. Baa caro lai tu?”, kecek Supiak Banun.
“Ooo yolah, dak baa doh. Bisuak baok dih!”, baleh Yuang Kalek.
“O iyo Lek, takana dek den Iyuih dak ang ajak?”
“Kami lah putuih!” singkek jo padek Yuang Kalek manjawek tanyo Supiak Banun tu.
“Sajak bilo se tu?”, mulai penasaran Supiak Banun.
“Bisuak lah den caritoaan!”
“O iyo, kok paralu capek ang nomor telepon si Ramba tu, tanyo ka Idaih dih. Nomor telepon Idaih den lai ingek!”, sambia mancatat dikarateh ketek, nyo agiahan catatan tu ka Yuang Kalek dek Supiak Banun.
Malenggang sambia basiua-siua lambok Yuang Kalek ko pulang jadi e. Hati e dak basiagak sanang e doh. Lah tabayang sakali sabtu bisuak tu nyo maolah si Rambai. Tibo-tibo kanai tapuak bahu Yuang Kalek ko dari balakang.
“Sanang ati ang yo!”, ruponyo si Atai nan mancogok.
“Sanang bana tu indak, tapi jadih jo lah!”
“Jadi baa cito e Lek?”
“Den ajak tigo sakawan tu nonton festival band. Mujua Supiak Banun lai namuah!”
“Mantap tu Lek, mainkan lah lai tu!”
“Tapi ado ciek nan lun dapek lai, nomor telpon si Rambai ko!”
“Tu a rencana ang untuak mandapekan nomor tu?”
“Tadi Supiak Banun maagiah nomor telepon Idaih. Bia beko den telepon Idaih tu mananyoan nomor si Rambai!”
Mandanga Yuang Kalek dapek nomor telepon Idaih, barubah aia muko si Atai. Payahnyo manyuruakan baa perasaan e sabana e.
“Caliak den nomor telepon Idaih tu Lek!”, nyo cubo mailangan grogi dek si Atai supayo dak ketahuan dek Yuang Kalek.
“Untuak a dek ang nomor telepon Idaih?”
Tadiam si Atai dek e. Makin merah mukonyo. Dak tantu a nan kadisabuik e lai.
“Aaaaa….jan-jan waang…..!”, tibo-tibo si Atai bausaho marabuik karateh ketek nan barisi nomor telepon Idaih tu. Mancaliak gelagat si Atai takah tu, Yuang Kalek bausaho mampatahanan karateh tu. Si Atai tau bana kelemahan Yuang Kalek ko, nyo galitik Yuang Kalek ko sambia baharok karateh nan diganggam e tu talapeh.
Payah Yuang Kalek manahan galitik si Atai ko, ampia talapeh karateh tu lai. Tapi tanpa diduga dek si Atai, tibo-tibo karateh nan lah mulai lusuah tu nyo masuakan ka muluik e dek Yuang Kalek. Dikunyah-kunyah e sabanta, tu nyo lulua.
“Aaaaa, lah abih dak ado lai!”, sambia nyo ngangoan muluik e dek Yuang Kalek.
Tadiam si Atai sakali. Langsuangnyo jadi patuang. Aso nan mulai tumbuah tadi tu, kini tabang tinggi dibaok awan.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s