Supiak Banun (bagian 10)

Keinginan Yuang Kalek manonton festival band rami-rami lai kesampaian juo. Yuang Kalek jo si Atai berhasil mambujuak urang gaek si Rambai supayo bisa pai manonton festival band nan paliang ditunggu-tunggu siswa esem a se propinsi tu. Samantaro Supiak Banun, lai cukuik inyo surang se mangecek jo gaeknyo untuk pai. Dan langsuang diijinan. Nah, Idaih yo agak rumik setek, karano urang gaek Idaih ko kalau kawan laki-laki nan pai karumahnyo untuk minta ijin, malah jadi masalah. Dipastian indak ka dapek ijin doh. Makonyo supayo Idaih bisa pai, Yuang Kalek, si Atai, si Rambai jo Supiak Banun barampek-rampek pai ka rumah Idaih ko. Jo sagalo dayo jo upayo akhia nyo lai dapek ijin juo. Tapi ado syaraik, indak buliah pulang malam. Harus lah tibo di rumah sabalun azan mugarik.
Limo sakawan ko barangkek lah ka taman budaya nan indak talampau jauah dari sakola. Kebetulan acara ko lai diadoan di hari libur.
“Lek, Iyuih dak jadi ang ajak?”, kecek Supiak Banun katiko urang nan balimo tu sampai di gerbang taman budaya.
“Antok selah kau Piak. Inyo den kicuah patang mah. Inyo manyasakan juo nio manonton acara ko baduo se. Den dak amuah, ancak lah rami-rami lai!”, jawek Yuang Kalek jo panjang lebanyo manjalehan.
“Tu den sabuik, waden dak minaik nonton doh. Ancak lah baraja lai, karano sabanta lai urang ujian semester!”, lanjuik Yuang Kalek baalasan. Padohal dalam ati ketek e supayo bisa jalan jo si Rambai komah.
“Kok ado nan maagiah tau Iyuih beko baa kaka tu Lek?”, sambuang Supiak Banun manyasakan Yuang Kalek ko. Dak nyo jawek gai dek Yuang Kalek tanyo Supiak Banun nan kudian tu doh. Bagageh Yuang Kalek mamisah dari rombongan. Nyo pakancang langkah kaki e, sahinggo kawan nyo nan barampek tu tamanuang sajo lai.
“Ko Piak, Daih jo Rambai, pacik lah kue ko. Den tau Rambai sabana suko jo kue ko!”, tibo-tibo se Yuang Kalek babaliak sambia mambaok tigo buah kue nan salalu diidam-idamkan dek si Rambai. Yobana dak basiagak sanang ati si Rambai dapek hadiah kue tu doh. Supiak Banun nan mangkatutuih tanyo e tadi tu lah diam selai.
“Waden baa kok dak ang balian Lek?”, protes si Atai.
“Waang kan lah den balian tiket mah! A juo lai!”, jawek Yuang Kalek singkek.
Nyo egangan tangan si Atai sambia manjauah dari rombongan induak-induak tu.
“Idaih tu se lah cukuik dek ang tumah Tai. Jan macam-macam lo ang lai!”, sambia saparo babisiak Yuang Kalek agak maancam si Atai ko.
Abih main si Atai dek Yuang Kalek ko. Dak dapek mangecek jo si Atai ko lai. Dak lamo sudah tu, masuak lah rombongan limo sakawan tu manonton acara nan ditunggu-tunggu tu. Maklum acara ko hanyo sakali satahun. Yuang Kalek mulai lah manjalanan aksinyo. Dicari tampek duduak nan bisa mambuek inyo dakek jo si Rambai. Samantaro si Atai lah mamisah jo Idaih, tapi mereka baduo ko lah bantuak urang bacakak sajo. Indak ado mangecek gai doh. Si Atai ko antah dek grogi e atau dek kasanangan ati, dak talok gai manyasek Idaih ko doh. Samantaro Idaih lah hanyuik se jo acara festival ko. Lah sato lo mairiangan lagu-lagu nan dibaokan dek peserta festival.
“Piak, gagah na cowok nan main gitar tu ha!”, tibo-tibo si Rambai mancubik Supiak Banun sambia manunjuak ka arah peserta festival nan sadang barado di ateh pangguang.
“Itu kawan awak sa esem a juo tu mah!”, baleh Supiak Banun.
“Iduang e tu dak tahan Piak a. Sanang se ati Rambai mancaliaknyo. Ditambah lo main gitar e rancak. Saraso mancabiak-cabiak jantuang Rambai!”, mulai si Rambai hanyuik jo khayalan e.
“Eeeeh, baru tabukak incek mato kau yo Mbai!”, pinteh Supiak Banun.
“Bantuak urang India dak Piak?”
“Abak Amak e keturunan India tantu iyo!”, jawek Supiak Banun singkek.
“Piak, Rambai, kalua wak lah. Wak cari gai makanan ringan untuak digatok-gatok ha!”, Yuang Kalek maminteh ota mereka baduo tu.
“Saba lu Lek, abihan ciek lagu ko lu!”, jawek si Rambai.
Yuang Kalek yo dak talok saba doh. Pado ketahuan lo cimburu e tu, nyo bae se tagak maninggaan kawan-kawan e tu. Duo langkah nyo manjauah, nyo bae maengong baharok si Rambai atau Supiak Banun batanyo manga nyo tagak. Tapi urang baduo tu jan lai maengong, malah batambah manjadi-jadi nyo mairiangan lagu nan dibaokan dek idola baru si Rambai ko.
Hati Yuang Kalek sabana tabaka. Niaik hati nio maolah si Rambai, malah paneh nan tibo. Saparo hati nio nyo tinggaan acara festival tu, tapi dak lo lamak doh. Takah anak-anak lo beko kecek kawan-kawan e tu. Kok indak pai, hati lah talanjua paneh. Tapaso lah diputuihan dek Yuang Kalek ko manunggu se kawan-kawan e tu di lua. Nyo cari tampek duduak nan agak tasuruak di lua gedung tu, bia dak nampak dek nan lain. Alun sampai di tampek nan dituju, tasirok lo darah Yuang Kalek baliak.
“Lek, kok disiko lo ang? Tapi kecek ang, waang ka baraja?”, antah dari ma tibo e, lah ado se Iyuih dimuko Yuang Kalek. Mujua indak di dalam tadi nyo basobok mah, kok indak antahlah nan katajadi.
“Aaaanu.. Waden mancari kau mah Yuih!”
“Mancari Iyuih. Sabana e tu?”
“Ondeeh Yuih… Masak dak picayo kau ka den. Tadi den karumah kau, rencana ka maajak baraja basamo. Tapi sasampai di rumah kau, kecek gaek kau, kau pai manonton festival band. Tu den turuik se kasiko lai!”, mujua dapek alasan nan tapek dek Yuang Kalek ko.
“Oooo mantun. Yolah kok baitu, nonton band wak lu, baru sudah tu baraja. Tarago lah tibo juo wak disiko mah!”, nyo egangan tangan Yuang Kalek ko dek Iyuih masuak ka dalam taman budaya ko baliak.
“Eeee ado Rambai jo Supiak Banun mah. Lai hobi lo nonton acara band mah!”, kecek Iyuih ka si Rambai jo Supiak Banun.
“Llllaaai Yuih. Jo sia kamari Yuih?”, baleh Supiak Banun.
“Tantu jo uda sayang Iyuih nyoh. Eh, buliah kami duduak disiko ko?”, tanyo Iyuih ko baliak.
“Bbbbu…bu..buliah. Duduak lah!”

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s