Supiak Banun (bagian 12)

Tanpa taraso, persahabatan Supiak Banun dan kawan-kawan ko lah bajalan ampia satahun. Dak lamo lai mereka ko lah ka manarimo rapor untuak kenaikan kelas. Saminggu lai urang tarimo rapor. Manjalang tu, biaso e sakola maadoan acara kelas meeting. Acara ko sabana e adolah semacam kegiatan nan dibuek dek sakola untuak maagiah wakatu para guru untuak manilai kamampuan masiang-masing murik e. Kondisi nan nampak dilapangan, acara ko ajang masiang-masiang kelas untuak unjuak kemampuan dari berbagai bidang. Sabuik sajolah bidang kesenian, olahraga, sain dan lain sebagainyo. Tapi nan paliang meriah iyo acara olah raga. Ado pertandingan sepakbola, bola voli, bola basket, pimpong jo tarik tambang.
Kebetulan untuak pertandingan sepakbola, basarobok kelas Yuang Kalek jo kelas Supiak Banun. Iko adolah pertandingan partamo pambuka acara kelas meeting. Yuang Kalek mamimpin kawan-kawan e untuak batandiang jo kelas Supiak Banun. Sabalun pertandingan dimulai tibo Supiak Banun mandakek i Yuang Kalek ko.
“Jan kareh-kareh na main dak Lek!”
“Aman tu!”, jawek Yuang Kalek singkek sambia balalu masuak ka lapangan bola nan talatak pas disabalah kelas tampek baraja. Kebetulan sakola mereka ko tamasuak satu-satunyo esem a nan punyo lapangan bola surang.
Pertandingan balansuang sengit, kaduo kelas samo-samo main tabukak. Maklum pertandingan ko mamakai sistem gugur, karano banyak kelas nan batandiang samantaro wakatu singkek. Dek main tabukak tu, tantu dak bisa dielakan main kareh. Ditapi lapangan, penonton maagiah samangek untuak kaduo kesebelasan. Dak terkecuali Supiak Banun dan kawan-kawan. Nampak Supiak Banun mete-mete, apolai kalau Yuang Kalek nan mambaok bola. Rupoe itu caro Supiak Banun ko maruntuahan mental Yuang Kalek. Sakileh taparatian dek Yuang Kalek Supiak Banun ko, nyo tunjuak-tunjuak ka arah si Rambai. Yuang Kalek dak mangarati apo mukasuik Supiak Banun ko doh. Pado manggaduah konsentrasi e, nyo palapeh se Supiak Banun tu.
Sakitar tingga sapuluah minik lai permainan salasai, kelas Yuang Kalek mancetak gol. Ketinggalan 1-0 kelas Supiak Banun. Sabalun bola disipak baliak patando permainan dimulai baliak salapeh mancetak gol, Yuang Kalek pai minum ka tapi lapangan. Rupo e lah tabaco arah e tu dek Supiak Banun.
“Ingek Lek, si Rambai kecewa bana kalau kami kalah ko mah!”, mulai Supiak Banun manebar ancaman.
“Dak mangarati den mukasuik kau doh Piak!”, kecek Yuang Kalek sambia maabihan minum e.
“Kok sampai kami kalah, jan diarok si Rambai bisa ang dakek i lai Lek!”
Tadiam Yuang Kalek mandanga kalimaik Supiak Banun tu. Spontan mulai gamangnyo. Di hati ketek e nio bana, maluluahan hati si Rambai. Tapi iko pertandingan antar kelas, dak nio lo nyo gengsi kelas e dibawah kelas lain doh. Banyak saketek e, iyo tapangaruah main Yuang Kalek ko. Dak konsentrasi nyo main lai. Banyak bola-balo rancak jadi tabuang sio-sio. Pado baakibaik buruak ka kelas e, nyo bae mintak tuka. Pura-pura latiah lah Yuang Kalek ko kiro-kiro.
Sampai akhia patandiangan skor 1-0 ko iyo dak barubah doh. Supiak Banun dan kawan sakelas e tantu kecewa. Tigo sakawan Supiak Banun, si Rambai jo Idaih langsuang maninggaan lapangan. Tanpa sangajo taparatian dek Yuang Kalek gelagat mereka tu. Nyo iriangan lah kama mereka tu pai.
“Tai, ikuik jo den lah!”, nyo egangan tangan si Atai dek Yuang Kalek untuak maikuik i langkah e.
“Kama?”
“Ikuik jo lah, beko tau surang jo ang mah!”
Dari jauh nampak rupoe tigo sakawan tu pai ka kelas e. Urang dak ado di kelas doh, karano sibuk manonton bola. Katiko Yuang Kalek ampia tibo di muko kelas Supiak Banun tu, tibo-tibo tadanga pakiak si Rambai dak basiagak kareh e doh. Bantuak urang dipiciak antu.
“Ado apo….ado apo?”, tanyo Yuang Kalek sambia diiriangan si Atai. Kaduo kawan tu lah tibo lo dalam kelas.
“Huuush…hush…hush…!”, si Rambai taruih mamakiak sambia naiak kateh meja.
“Apo tu?”, bagageh Yuang Kalek mandakek i si Rambai.
Si Rambai ko dak acuah jo tanyo Yuang Kalek ko doh. Antah iyo berang dek kelas e kalah main bola atau dek mati katakuik an. Indak jaleh lo doh. Samantaro tu Supiak Banun jo Idaih sibuk mangaja sesuatu ka ujuan kelas. Supiak Banun mamacik sapu sambia malambuik-lambuik an ka lantai. Nan Idaih maminteh supayo mancik ko dak lari jauah.
“Apo tu Piak?”, tanyo si Atai.
“Mancik!”, jawek Supiak Banun singkek.
Tagalenjek lo si Atai jo Yuang Kalek mandanga e.
“Waden jago pintu, bia jan lapeh e”, tibo-tibo si Atai ko lah tagak se dakek pintu. Sabanae nio lari e mah, tapi iko harago diri lo. Nyo bagak-bagak an mahadok i mancik tu dakek pintu. Samantaro tu Yuang Kalek balari mancari kayu. Dapek dek nyo rol panjang kuniang dakek papan tulih. Pas Yuang Kalek nio mambaliak badan ka arah Supiak Banun, mancik nan diburu tadi mahadok ka Yuang Kalek ko. Spontan Yuang Kalek maloncek ka kursi guru.
“Jan macam-macam ang ncik, den bunuah ang ko!”, nyo tunjuak-tunjuak mancik tu dek Yuang Kalek jo rol panjang tadi dari ateh kursi. Sambia manunjuak mancik tu, tibo Supiak Banun malakak mancik tadi. Indak lo tapek kanai kapalo mancik tu doh, tapi jadih lah lai paniang mancik tu dibuek e. Bantuak urang mabuak mancik tu lari ka ujuang ruangan kelas jadi e. Mancaliak keadaan takah tu, tabik bagak Yuang Kalek sakali. Tanpa bapikia panjang lai, nyo santuang mancik tadi. Dan iyo, balapoh kapalo mancik tu dek e. malancin darah mancik tu ka dindiang kelas dibuek e.
“Mujua den bunuah mancik tu tu ha. Kok indak antahlah tadi tu!”, kecek Yuang Kalek jo bangga e sambia mancaliak ka arah si Rambai. Panik si Rambai lah bakurang, lai dak pucek takah tadi lai doh.
“Jan mangecek jo ang Lek!”, baleh Supiak Banun.
“Kan iyo waden mambunuah e mah!”, mambela diri lo Yuang Kalek ko.
“Tasarah ang lah Lek, nan jaleh kami masih berang samo waang jo kawan sakelas ang!”, kecek Supiak Banun sambia mangode si Rambai jo Idaih untuak maninggaan kelas.
“Eh, jan pai se lu!”, si Atai mahadang langkah tigo sakawan tu.
“Ang kamehan selah darah mancik tu jo Yuang Kalek Tai, kami cari minum ciek lu!”, kecek Supiak Banun.
Dak lamo sudah tu, lah tibo se tigo sakawan tu di lua kelas. Si Atai jo Yuang Kalek masih pandang-pandangan pakaro mambarasiahan darah mancik tu.
“Waden cari aia di wc lu yo Lek!”, lun sempat Yuang Kalek manjawek lai, si Atai lah tibo di lua antah kama pai e.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s