Supiak Banun (bagian 15)

Hari ko adolah hari nan istimewa dek sebagian anak kelas satu nan baru naiak ka kelas duo. Istimewa dek karano naiak kelas sesuai jo jurusan nan dikandak i. Sabagian lai, ado juo nan naiak kelas, tapi jurusan nan dapek dak sasuai jo pilihan samulo. Tapi tetap juo mereka bahagia, karano lai naiak kelas. Sabagian ketek ado nan tingga kelas. Sado nan tingga, sangenek nan namuah duduak di kelas satu di sakola ko baliak. Rato-rato bi pindah naiak ka sakola lain.
Salain ado nan pindah ka sakola lain, ado juo anak nan dari sakola lain pindah ka sakola ko. Ado babarapo urang, diantaronyo ado nan namonyo Buyuik. Buyuik ko anak pindahan dari Palembang. Ayah induak e urang awak nan lah marantau ka Jawa. Dek mada e Buyuik ko lah acok pindah-pindah sakola. Kini ko tibo nyo dikampuang ayah induak e, duduak di jurusan BIO. Ado lo surang lai anak pindahan dari Jakarta, namo e Perengki. Inyo sabanae anak tingga, pindah naiak ka sakola ko. Dak heran gai wak tu doh, karano etek e guru di sakola ko. Mako duduak lah Perengki ko di jurusan FIS. Tu ado lo surang lai, Kanua namo e. Kanua ko lai ndak pindah naiak doh, tapi pindah dek kandak keluarga e. Keluarga Kanua ko umpamo urang sukses sadoe, jadi Pak Etek e nio Kanua ko isuak e jadi urang sukses lo. Mako dipindahan lah Kanua ko dari esem a Payakumbuah ka Padang ko. Dalam ati ketek e Kanua ko bahagia sakola di Payakumbuah, tapi dek kandak keluarga ko sangaik kuaik, mako nyo pasoan juo namuah pindah ka Padang.
Dak tangguang-tangguang lo Kanua ko dipindahan dek Pak Etek e doh, dapek nyo duduak di jurusan FIS. Padohal Kanua ko nio bana duduak di jurusan BIO mah. Mungkin dek abak e angku dotor mah, mako e nio bana lo nyo jo jurusan BIO ko. Tapi baa lah, takdir e bakandak lain, tadampa e di jurusan FIS.
Dek saparo ati nio pindah, di hari partamo sakola ko Kanua langsuang cabut. Sabanae dak ado gai niaik e cabut doh, tapi dek nampak urang bagaduru lari ka balakang sakola, inyo lah sato lo. Ujuang-ujuang e saharian nyo duduak di lapau dak di kelas doh.
“Kenalan, namo den Kanua!”, keceknyo ka kawan baru e.
“Oooh, aden Imek”
“Manga urang lari-lari tu Mek?”, tanyo Kanua ka urang partamo nan nyo kenal di sakola ko.
“Ikuik jolah, pado kanai tagak di tanah lapang bapaneh-paneh ko!”. Rupoe Imek ko talambek tibo di sakola. Kebetulan urang upacara bendera lo. Jadilah larinyo ka balakang sakola untuak mandok. Samantaro Kanua nan lun kenal jo sakola ko, tabaok rendong lo lari. Padohal inyo dak talambek gai tu doh.
Salapeh tibo di balakang sakola, Kanua ko lah bantuak urang ele jo lai. Kawan-kawan e nan lari tadi ilang sadoe tamasuak Imek tadi tu. Dak tantu a nan ka dikarajoan e doh. Lamo nyo tamanuang surang jo lai. Sadang tamanuang tu, tadanga suaro urang galak-galak di lapau nan dak jauah dari tampek nyo tagak tu doh. Ujuang-ujuang e, sampai lonceang pulang babunyi Kanua ko duduak jo di lapau tu.
Samantaro tu si Atai, Idaih, Sutaik jo Perengki anak baru tu sakelas nyo sadoe. Yuang Kalek ko sakelas jo Imek. Kanua ko sakelas lo jo Yuang Kalek jo Imek gai mah, tapi dek inyo lun masuak kelas lai, jadi lun tau Yuang Kalek jo Imek tu bahaso ado anak baru nan masuak ka kelas e lai. Si Rambai sakelas jo Piak Epe. Piak Epe ko sabana pandiam, kalau lun kenal bana nyo jo urang lai, dak ka diajak e gai mangecek doh. Jadi dek si Rambai Piak Epe ko tamasuak baru dikenal e lo komah. Karano katiko kelas satu dulu mereka ko umpamo lun ado batagua sapo lai.
“Rambai!”, kecek si Rambai sambia manjuluaan tangan e ka Piak Epe ko.
“Piak Epe!”, baleh e singkek.
Sudah tu lah hantok se urang baduo tu lai. Karano lun ado lo topik carito nan manyambuang lai.
Iyuih nan duduak di jurusan BIO sakelas jo Buyuik anak baru dari Palembang tu. Sabalun masuak kelas, Iyuih ko manamui Yuang Kalek.
“Lek, baa manuruik Kalek hubungan awak ko ko?”
“Ddddaaak baa doh!”, jawek Yuang Kalek agak tagagok.
“Kok jalan surang-surang se wak kini ko baa nyoh?”, tagang muko Yuang Kalek mandanga kalimaik tu dari muncuang Iyuih. Iko bana nan jadi kandak Yuang Kalek salamo ko. Tapi kini baa kok Iyuih nan mamintak putuih. Mungkin lah habih pangaruah pelet e tu mah karano kecek rang gaek-gaek dulu kalau lah manyubarang lawuik abih sakalian pangaruah ilimu tu. Pas lo katiko libur naiak kelas patang ko Iyuih di ajak dek mandeh e pai raun paniang ka Jawa.
“Mukasuik kau awak putuih Yuih?”, nyo pastian bana dek Yuang Kalek ko. Jan-jan nyo salah danga tadi tu.
“Iyo! Jadi Kalek dak nio doh?”
“Baa yo Yuih. Sabananyo hubungan awak kan dak baa-baa doh mah. Baa kok tibo-tibo kau mintak putuih?”, di ateh angin Yuang Kalek sakali ko. Yobana tanang aia muko e sakali ko.
“Dak mungkin rasonyo hubungan awak dilanjuik an doh Lek. Partamo awak beda jurusan, pasti jarang basobok. Kaduo Iyuih nio serius baraja, takuik dak naiak kelas ko!”
“Kok mode tu kecek kau Yuih, jadih molah. Dak dapek lo dek den manahan e tu doh!”, icak-icak barek lo ati Yuang Kalek ko.
Samantaro tu, Buyuik nan anak baru ko langsuang masuak kelas dan duduak di muko. Tiko pelajaran jam partamo ka dimulai, diambiak lah absen dek guru Biologi. Lah salasai sado murik di absen, manunjuak Buyuik ko.
“Namo awak alun tapanggian lai Pak. Awak anak baru!”, kecek Buyuik ka guru tu.
“Ooh, sia namo ananda? Kamarilah tagak dimuko kelas sambia mamperkenalkan diri ka kawan-kawan nan lain!”
Iyolah bajalan Buyuik ka muko kelas.
“Perkenalkan, namo denai Buyuik. Pindahan dari Palembang. Disiko denai tingga jo bako karano kaduo urang tuo bakureh di Jawa. O iyo, ampia talupo. Di sakola ko denai ditarimo di jurusan BIO sasuai jo pilihan denai….”, lun sempat si Buyuik ko malanjuik an perkenalan diri e lai, tibo-tibo eboh saisi kelas ko.
“Huahahahahahahah……!”, tagalak sado isi kelas.
“Alah….alah…hantok sadonyo. Hantooook!”, kecek guru Biologi tu sambia manokok meja tigo kali.
“Buyuik, iko jurusan FIS. Jadi Ananda sasek masuak ko mah. Malaporlah kaguru piket di muko lah!”, kecek guru ko maluruihan. Rupoe itu molah nan jadi biang ribuik tu. Buyuik ko sasek masuak kelas.
Tapi diantaro isi kelas tu, ado surang nan indak galak, Piak Epe. Tamanuang nyo mancaliak Buyuik ko.
“Epe, ado apo? Kok Epe diam se?”, sasek si Rambai nan kebetulan mereka ko sabangku sambia bausaho mahantian galak e.
“Sabana ganteng Buyuik ko dak Mbai!”
“Haaaaaa….”, tangango si Rambai mandanga kecek Piak Epe ko. Lain pulo nan diparatian e.
Itulah sabagian carito hari partamo kelas duo di sakola tu. Baragam kisah nan timbua, baragam pulo parangai nan muncua.

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s