Kanai Pajak Lo Liak

Abuik :”Iyo eboh urang pakaro pajak ko dek ang Le!”, iko pambukak kecek katiko duo sahabaik karik ko duduak di lapau sambia manunggu sorang lai kawan untuak bakoa.
Kale :”Haaa, baa dek baru kini ang eboh Buik?”
Abuik :”Tadi katiko langganan den bali pulsa, itu je buah muncuang e. Sagalo kanai pajak. Rumah kanai pajak, gaji kanai pajak, oto kanai pajak, onda kanai pajak, harato kanai pajak, pusako kanai pajak. Pokok e sadoe kanai pajak. Panik lo den mandanga e!”
Kale :”Kan itu nan den sabuik kapatang mah Buik, waang lengah-lengah cangok je!”
Abuik :”Yo tulah, dek ang sabuik patang tu yo den paratian bana tadi. Kiroe iyo lah eboh sangaik urang dek pajak ko yeh!”
Kale :”Tapi patang ko ado penjelasan pemerintah di tipi bahaso urang nan bagaji kurang dari 4,5 juta sabulan dak kanai pengampunan pajak tu doh!”
Abuik :”Takah awak ko baa lo caro e tu Le?” Kadang sabulan kurang dari 4,5 juta, kadang labiah. Apolai dapek rasaki harimau, amuah tigo kali lipek gai dapek e!”
Kale :”Yo dak tantu lo dek den tu doh Buik. Aden binguang lo kini ko mah ha. Kaba e sado harato ka dipareso dek urang pajak!”
Abuik :”Untuang harato den dak banyak doh Le, kok utang yo banyak!”
Kale :”Kok kepeang yo dak banyak den doh Le, tapi harato den nan lain dibandiangan waang yo banyak punyo den. Baa lai tu?”
Mangarunyuik kaniang Abuik mandanga panjalasan Kale ko. Sapangatahuan e, Kale ko sabaleh duobaleh harato e jo diri e. Harato apo lo lah nan disombongan e tu yeh.
Abuik :”Banyak warisan ang yo Le, dek rusuah na ang?”
Kale :”Warisan cimporong bilau, dima lo den dapek warisan. Ayah induak bansaik. Kamanakan sambuah. Batetele je ang ko mah Buik!”
Abuik :”Tu a na nan waang camehan?”
Kale :”Taroklah dapek bana den warisan atau harato hibah, kecek pemerintah harato takah tu dak kanai pangampunan pajak tu tu doh Le!”
Abuik :”Ha kan jaleh tu nyeh!”
Kale :”Dak nampak dek ang harato den doh? Kok diharagoi jo pitih, dak taharagoi doh Buik!”
Abuik :”Apo tu harato ang?”
Kale :”Tapi janji jan bangih ang ka den dak Buik?”
Abuik :”Apo lo ka den bangihan. Kawan den banyak harato, sanang lo den mandangae tu mah!”
Kale :”Janji lah, dak berang!”
Abuik :”Iyo, den bajanji. Apo harato ang tu?”
Kale :”Bini den!”
Abuik :”Eeee kalera waba dek ang. Mantang-mantang iyo ampek bini ang, samantaro waden ka bacarai. Mampuih jelah ang!”
Kale :”Dak tua, baru santa ko ang bajanji dak bangih!”
Abuik :”Untuang-untuang ketahuan dek pemerintah harato ang nan sambuah tu!”
Kale :”Kok ketahuan ka den pangaan lai. Paliang den agiahan jo ciek untuak tax amnesty e. Lai jo tigo lai dek den!”

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s