Ganjia Ganok

Sajak tanggal 30 agustus 2016, pamarintah DKI Jakarta mambalakuan aturan ganjia ganok untuak oto pribadi nan malalui babarapo jalan utamo. Untuak tanggal ganok, oto nan ujuang nomor polisi e ganok lo nan buliah lewaik nyeh, mode tu lo untuak tanggal ganjia.
Abuik :”Le, lai tau ang kini ko lewaik jalan protokol di Jakarta ko ado aturan baru?”
Kale :”Aturan baru a pulo tu?”
Abuik :”Aturan ganjia ganok!”
Kale :”Asoe ado den mandanga tu dulu mah, tapi yo dak paham bana den baa aturan e tu tudoh!”
Abuik :”Jadi Le, oto nan buliah lewaik di jalan tu BA e harus sesuai jo tanggal!”
Kale :”Dalang ang Buik, ma ado BA di Jakarta ko!”
Abuik :”Mukasuik den palaik nomor polisi e Le. Incek labiah lo ang mah Le!”
Kale :”Jadi kalau tanggal ganjia, palaik ganjia lo nan buliah lewaik?”
Abuik :”Iyo. Kan lai tantu dek ang tu mah. Baa manuruik ang aturan tu tu Le?”
Tadiam sasaiak si Kale ko. Takah bapikia karehnyo mancari jawek tanyo kawan e tu.
Kale :”Tujuan e apo dibuek aturan tu tu Buik?”
Abuik :”Kecek urang-urang lo untuak maatasi kemacetan!”
Kale :”Dima lo bisa macet bakurang dek aturan tu tu. Batele je tu nyeh!”
Abuik :”Baa mako batele kecek ang Le?”
Kale :”Cubo lah pikia dek ang Buik. Memang batua jalan nan dibalakuan aturan tu bakurang oto nan lewaik sinan, tapi kan jalan nan dak kanai aturan tu, tambah malimpah jadie!”
Abuik :”Mukasuik ang baa ko Le?”
Kale :”Mode koa. Misal e ado jalan nan dulu e dak talampau rami urang lewaik, tapi jalan tu basubalahan jo jalan utamo nan dibalakuan aturan ganok ganjia tu. Kini tantu jadi tambah rami jalan tu, dan mungkin macet bana dek gagara urang maaliahan jalan kasinan lai!”
Abuik :”Baa kok mode tu lo Le. Nek e urang nan punyo palaik nomor ganjia, dak baok oto tiko tanggal ganok doh. Kan bakurang jumlah oto di jalanan tu!”
Kale :”Dima lo bisa wak managah urang baok oto. Wee jo oto e ka diagak-agakan lo dek awak!”
Abuik :”Iyo lo yeh..!”
Samo-samo tadiam kaduo e.
Abuik :”Apolai dando e gadang lo kabae Le, 500 ibu!”
Kale :”Tambah lo dando gadang, tambah karuah dek e tu mah!”
Abuik :”Dima Karuah e?”
Kale :”Kok tibo dek den ko Buik a, waden tabeh dak masuak karajo!”
Abuik :”Waang je manggaleh tarompa, dima lo tibo e tu?”
Kale :”Iko kan umpamo e mah Buik. Misal waden jadi pegawai kantoran di seputaran jalan protokol tu. Tiok ari ko waden pai jo oto ancak ka kantua. Tu kini dibalakuan aturan ganjia ganok ko. Kok den tabeh jo lewaik sinan tadando den 500 ibu. Jadi kok palaik oto den ganok, tiok tanggal ganjia den dak masuak doh!”
Abuik :”Eeeh, baa lo tu Le?”, binguang si Abuik mandanga panjalasan kawan e tu.
Kale :”Iyo lah, kalau den paso masuak kantua, kanai dando den 500 ibu. Hari karajo dalam sabulan 22 hari. 11 hari den kanai dando, kan 5,5 juta pitih den ilang tu Buik!”
Abuik :”Tu, kalau ang dak masuak bangih nah bos ang nyeh!”
Kale :”Asa karajo den salasai dak bangih gai e doh, tapi iyo gaji den dipotong 150 ibu sahari kok dak tibo. 11 hari kali 150 ibu samo jo 1,650 juta sabulan gaji den dipotong. Cubo lah pikia dek ang, ma ancak kahilangan pitih 5,5 juta atau 1,650 juta?
Abuik :”Iyo lo yeh. Baa dek santiang kini lo ang tu Le!”, galak senggeang jo Abuik ko dek e.
Kale :”Lah sajak dulu e den santiang ko mah!”
Abuk :”Cito ambuih-ambuih je dek ang tu nyeh. Kok yo santiang ang, baa kok masih galeh tarompa jo ang kini baru!”
Kale :”Kanciang ang Buik, iko nan namo e nasib diang!”, mulai tabik suga Kale dek pariuak bareh e disingguang-singguang.
Abuik :”Yo waden serius batanyo, waang nan indak-indak je nan ang bayangan!”
Kale :”Kan serius lo den manjawek tu nyeh. Pokok e aturan takah tu, dak mangkuih gai tu doh. bisa diakai urang tu mah!”
Abuik :”Diakai baa mukasuik ang ko Le?”
Kale :”Yo salain takah nan den sabuik tadi tu, bisa lo urang ko punyo palaik palsu jadi e. Kok ganok palaik oto e, tiok tanggal ganjia dipasang e palaik palsu nan angko ujuang e ganjia lo. Kan salamaik e dari aturan tu tu. Jadi aturan ko maaja urang baduto jadi e!”
Abuik :”Iyo lo tu dak Le?”
Kale :”Baa indak deang tu. Sabane tu mah!”
Abuik :”Tu baa ka ancak untuak maatasi macet ko lai Le?”
Kale :”Kok iyo nio serius pamarintah Jakarta ko, tangguang aturan ganok ganjia ko ko mah. Ancak indak usah bana oto palaik itam lewaik jalan utamo tu lai. Abih pakaro!”
Abuik :”Tambah paniang den Le, ancak diisi paruik ko lai!”
Kale :”Tu iyo ang tu!”

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s