Tatangkok Tangan Dek Baruak

Dari jauah nampak Kale mambaok satandan pisang sarai ka rumah Abuik.
Abuik :”Untuak den ko Le?”
Kale :”Lamak je ang mangecek untuak waang. Iko lah ado nan punyo ko!”
Abuik :”Tu manga ang baok kamai?”
Kale :”Waden ka mintak tolong ka waang ko mah. Kawanan den ka rumah pak RT lah!”
Abuik :”Dak ajan den doh!”
Kale :”Tanang je lah waang, dumah den ado duo sikek lai pisang sarai ko mah. Sangajo den tinggaan untuak waang!”
Si Abuik ko memang cumih jo pisang sarai sajak ketek e lai. Kok dapek dek e pisang tu ha, duo sikek tu sakali duduak jo dek e mahabihan tu nyoh.
Abuik :”Tu lai ang tu Le. Oyo, takana dek den manga waang mintak kawanan bana ka rumah pak RT?”
Kale :”Waden ado paralu, bekolah den caritoan!”
Abuik :”Lah barasio lo ang jo den kini?”
Kale :”Indak barasio doh, pisang ko barek dek ang ha. Payah den bacarito. Amuah ndak ko ang mangawanan den?
Yo lamo Abuik bapikia, manga kolah kawan e ko pai ka rumah pak RT. Tapi dek arok ka dapek pisang sarai, dijadihan e juo permintaan kawan e ko walau wee masih ragu.
Abuik :”Adih nah, tapi…”
Kale :”Dak tapi tapi doh, tolong ang angkek pisang ko ha. Baduo wak sandang pisang ko!”
Abuik :”Ayoik, waang suruah jadi tukang angkek den kiroe yeh!”
Kale :”Indak mode tu gai doh Buik. Iko dek indak talok dek den maangkek lai ha, mako e den mintak tolong jo waang!”
Abuik :”Kecek ang tadi mintak kawanan ka rumah pak RT. Kiroe manyandang pisang satandan lo nan ang suruah den. Baa sabanae ko?”
Kale :”Pisang ko wak baok ka rumah pak RT!”
Abuik :”Bali pisang wee jo waang?”
Kale :”Sambia jalan den citoan ka waang ko!”
Iyolah sambia barek hati si Abuik manolongan Kale mambaok pisang ka rumah pak RT.
Abuik :”Kana dek ang pisang sabanyak ko ang antaan ka rumah pak RT ko?”
Kale :”Iko hadiah untuak pak RT mah!”
Abuik :”Hadiah apo?”
Kale :”Baa lah den bacarito ko yeh!”
Abuik :”Cito jelah lambak-lambek, rumah pak RT jauah lai mah!”
Kale :”Dari ma lah ka den mulai koyeh!”
Abuik :”Tasarah dek waang, dari muko jadih dari lancirik jadih juo!”, mulai tabik suga Abuik dek e. bantuak mancari ilik-ilik lai lo nampak dek e.
Kale :”Mode ko mah Buik a. Patang ko waden manggaleh tarompa di musajik komplek sabalah salapeh urang sumbayang jumaik. Alun sempat galeh den takaka lai, kanai tagahan den dek pengurus musajik. Kecek e, dak buliah manggaleh di lingkungan musajik doh. Tu kecek den, dima lo undang-undang e tu, managah urang manggaleh. Musajik ko dak punyo waang doh mah, kecek den ka pengurus tu. Pokok e dak buliah, kecek e!”
Abuik :”Tu?”
Kale :”Mulo e waden lah picayo lo, tapi dak lamo sudah tu ado urang mangaka galeh disabalah den. Wee manggaleh kauih kaki. Tu protes den ka pengurus tadi, baa kok inyo buliah samantaro waden indak. Tu kecek pengurus tu, paja tu lah dapek ijin dari RT!”
Abuik :”Ooooo pantiak yeh. Manyogok waang ka RT upoe komah yeh!”
Kale :”Indak manyogok doh Buik, tapi maurus surek ijin. Tu awak sebagai warga ko, kan dak do lo salah e mambaok buah tangan doh mah. Kok maagiah pitih gai den, yo manyogok namoe tu!”
Hantok jo Abuik ko lai sampai tibo di rumah RT.
Sasampai di rumah RT, langsuang urang baduo ko ditarimo pak RT.
Kale :”Assalamualaikum pak!”
Pak RT :”Waalaikumsalam. Apo nan bisa ambo bantu? Masuak lah!”
Kale :”Mokasi pak. Ambo ka maurus ijin manggaleh di laman musajik pak!”
Pak RT :”Dak buliah manggaleh di laman musajik doh sanak. Tagaduah urang baibadah!”
Kale :”Tapi patang ko nampak dek ambo ado nan manggaleh kauih kaki!”
Pak RT :”Ooo itu. Inyo kan manggaleh sasudah urang sumbayang jumaik mah, dak tagaduah gai urang baibadah tu doh!”
Kale :”Iyo mode tu lo nio nyo ambo pak RT. Manggaleh tarompa sasudah urang sumbayang jumaik!”
Pak RT :”Nyo mode ko mah sanak, ciek duo dak baa manggaleh doh. tapi kok rami lo dak rancak dicaliak urang doh!”
Abuik :”Le, pisang ko baa carito e ko?”
Kale :”Oiyo camiah talupo. Iko pak RT, kebetulan ambo tadi panen pisang. Nan sakali ko yo lai banyak hasia palak, jadi ambo baok iko saketek sekedar untuak ka parabuang sudah makan jo!”
Pak RT :”Eh, mokasi banyak yo sanak, sia namo sanak lupo ambo!”
Kale :”Ambo Kale pak, nan kawan ambo ko Abuik!”
Pak RT :”Oh iyo, tolong baok jo lah kalakang pisang tu Buik!”
Sajak manarimo pisang sarai satandan ko lanca je urusan Kale maurus ijin manggaleh di laman musajik.
Pak RT :”Iko surek nan Kale butuahan. Beko kok batanyo pengurus caliakan jo la surek ko ka baliau, mangarati nyo tu mah!”
Kale :”Mokasi banyak pak RT. Kok baitu ambo mohon paa….!”, lun sudah kecek Kale ko tadanga eboh-eboh dilakang umah pak RT.
Anak Pak RT :”Ayaaahhh…ayahhhhh… baa ko yaaah!”
Pak RT :”Dek a waang Muih?”
Anak Pak RT :”Caliak dek ayah ko a!”
Takajuik gadang pak RT satibo di dapua. Lah mancibia je baruak gadang ka arah pak RT ko.
Pak RT :”Baruak kalapia ko mah, abih dek e pisang satandan!”
Abuik :”Op pompom, tatangkok tangan awak dek baruak jadi e!”

Advertisements

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s