Galodo Garuik

Abuik :”Le, gagara pendaftaran calon gubernur ibukota patang ko, lah talupo je bencana galodoo nan siagak gadang nan di Garuik tu doh a!”
Kale :”Lai ado berita e, tapi talampok dek berita pilkada ko!”
Abuik :”Yo itu mukasuik den Le. Baa manuruik ang kejadian galodo tu tu Le?”
Kale :”Nan namoe galodo lah kajaleh itu bencana alam. Paragiah dari Tuhan Nan Kuaso!”
Abuik :”Paragiah baa lo kecek ang ko ko Le? Takah kado ulang taun je tadanga jadie!”
Kale :”Waang je nan lupo nyoh Buik. Sagalo sesuatu nan wak tarimo salagi iduang masih ditampuah angok, itu adolah paragiah dek Nan Kuaso!”
Abih main abuik mandanga kecek nan saketek tu. Tapaso hantok jo e lai.
Kale :”Baa kok haniang je ang lai Buik? Lanjuik nah ota wak ko koa!”
Abuik :”Waang main patah je salah e!”
Kale :”Indak main patah doh Buik. Cubo lah wak runuik elok-elok dih!”
Abuik :”Dih nah, den danga elok-elok!”
Kale :”Manuruik den galodo nan patang tu yo sabana gadang. Mancaliak gambar e di tipi, lah bantuak tsunami nan di aceh dulu tu ha!”
Abuik :”Nah, iyo itu nan manjadi heran den Le. Baa dek bisa sagadang tu aia mahondoh kampuang tu. Takah ado nan manyerakan aia!”
Kale :”Itu nan den mukasuik paragiah Tuhan tu tu Buik. Dak mungkin rasoe aia tibo sagadang tu doh, samantaro ujan manuruik saksi mato dak labek bana doh. Memang iyo lamo durasi ujan ko, tapi dulu-dulu baa tu, dak do nan jadi galodo doh!”
Abuik :”Batua iko kandak Tuhan Le, tapi kalau dicaliak-caliak iko dek parangai awak-awak juo tu mah. Takok-takok den galodo ko dek gagara hutan nan batabang habih je ko. Bahambiak je sado kayu di rimbo, kasudahane dak ado nan bisa Manahan aia tiko ujan labek lai doh! Jadi manuruik den jatuah e dak paragiah doh Le, tapi hukuman!”
Kale :”Masuak aka juo takok-takok ang tu mah Buik, tapi manuruik den iko yo ajaib mah!”
Abuik :”Ajaib baa mukasuik ang ko Le?”
Kale :”Danga lah dek ang berita di tipi, ado korban nan basobok sajauah 70 km dari tampek kejadian. Dak ajaib dek ang tu? Bado lah ka gadang aia tu, bisa mahanyuik an urang sajauah tu!”
Abuik :”Iyo lo dak Le. Atau bisa jadi dek banyak rumah nan barado di tapi tang aia tu dak Le? Makoe katiko tibo aia gadang, nyo hondoh sadoe. Tantu sajauh aia ko mangalia lo nyo baok korban-korban tu!”
Kale :”Dak pandai lo den manjawek e doh Buik, waden dak ahli manakok-nakok takah waang ko doh!”
Abuik :”Kalera ang mah Le, tabana cimeeh ang mah!”
Kale :”Indak cimeeh doh, yobana dak tantu dek den doh! Makoe den sabuik iko paragiah Tuhan. Tarok lah memang prilaku warga Garuik ko alah keterlaluan bana. Mahabihan kayu di rimbo, mambuek rumah di tapi tang aia dan lain-lain e. Tapi tetap juo ado nan aneh manuruik den, nan lun tau den jawek e lai!”
Abuik :”Atau dek gagara urang kampuang tu banyak doso dak Le? Dak takana kisah-kisah bencana dimaso nabi dulu lai. Contoh e bencana kaum Sodom!”
Kale :”Wallahualam tu mah Buik. Mintak ampun je wak ka Nan kuaso ateh sado kasalahan nan salamo ko nan lah wak pabuek!
Abuik :”Batua Le. Tapi iko hukumam dari Nan kuaso dek gagara doso, bisa jadi sudah ko kawasan Puncak Bogor lo lai nan ka bencana salanjuik e mah Le!”
Kale :”Baa dek kasinan lo larie tu Buik?”
Abuik :”Alaaaahh bantuak dak tau lo ang mah Le. Caliak lah sapanjang jalan di Puncak Pas tu banyak padusi nan mangubik-ngubik, takah ambai-ambai nampak di den!”
Kale :”Nampak? Acok ang sinan yeh!”
Abuik :”Mande ang Le, waden serius ang bagarah juo!”
Kale :”Baliak wak ca cito galodo ko liak. Talapeh dari doso nan ang sabuik tadi, awak yo patuik manjago alam jo hutan nan ado disekitar lingkungan tampek tingga wak. Sabab lingkungan tu dijadian Tuhan untuak awak bisa iduik. Kalau wak rusak lo hutan, samo jo bunuah diri wak namo e tu!”
Abuik :”Akok dak Le.”
Kale :”Ha tuah!”

2 Comments

  1. Lamak ota mah le, kopi sangah luw


Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s