Ba Buni jo lah, kanai tahan kasudahan e!!!

Kale :”Baa dek capek na tutuik kadai ang ko Buik?”
Abuik :”Den ka pai santa, ado paralu!”
Kale :”Pai kama ang Buik?”
Lamo dicaliak e kawan karik e ko. Kateh kabawah cando urang indak bakatauan je.
Kale :”Ado nan salah Buik?”
Abuik :”Pek lah, kok iyo ka samo lo ang pai jo den. Tapi syaraik e jan banyak tanyo!”
Kale :”Dak doh, kanai karuangan den ko!”
Abuik :”Dak dih dak anti, den bisa pai sorang!”
Mandudu jo Abuik maninggaan Kale surang jo lai.
Kale :”Buuuuik, tunggu den. Ikuik ciek!”
Yolah bajalan duo sahabaik ko ka suatu tampek. Disinan lah rami urang tibo. Rupoe tampek tu adolah rumah Walinagari. Urang rami mandemo Walinagari ko supayo mamintak polisi untuak malapehan si Buni.
Kale :”Ooo pai demo kiroe yeh. Manyasa lo den ikuik tadi mah!”
Abuik :”Kok manyasa pulang lah ang Le!”
Kale :”Nggu lu, apo nan di demo urang ko Buik?”
Abuik :”Patang tu si Buni ditangkok dek polisi karano kasus pelecehan agamo. Si Buni malaporan Walinagari nan lah dianggap malecehan agamo”
Kale :”Tu baa sanae ko? Baa dek si Buni nan kanai tangkok?”
Abuik :”Sinan masyarakaik eboh e Le. Katiko si Buni malaporan Walinagari ko, polisi dak manahan Walinagari doh, padohal statuih e lah tersangka tu mah!”
Kale :”Tu baa kok si Buni nan kanai tangkok?”
Abuik :”Kawan Walinagari ko dak tarimo doh. Dilaporan e baliak si Buni ko, ateh namo kasus mahasuik urang mambuek SARA!”
Kale :”Paniang den mandanga e mah Buik!”
Abuik :”Apolai waden. Binguang den antah sia nan salah sia nan bana!”
Kale :”Tunggu lu Buik, tanyo den ciek. Statuih Walinagari ko lah tersangka yeh?”
Abuik :”Alah, minggu patang lai!”
Kale :”Satau den, kalau lah tersangka ko berarti lah sah iyo nyo disangkoan malecehan agamo tu!”
Abuik :”Ha tuah. Ditahan nek e!”
Kale :”Dak harus doh Buik, buliah juo indak!”
Abuik :”Jadih lah kok dak ditahan, tapi baa kok si Buni nan malaporan paja tu kanai tahan? Kan nek e dilapehan lo mah!”
Kale :”Disinan den nan paniang e Buik. Kalau lah sah Walinagari ko tersangka, tantu batua laporan si Buni tu. Jadi kok malapor baliak kawan Walinagari ko untuak manahan si Buni, ma bisa lai. Bebas si Buni nek e tu mah. Batua laporan e mah. Pi kok laporan palsu nan di buek e, patuik wee ditahan!”
Abuik :”Kan itulah, mako e warga eboh bana kini. Nyo demo rumah Walinagari ko!”
Kale :”Kok mode tu, yo sato lo den demo tu mah!”
Abuik :”Tu makoe mangango lu sabalun mangoek!”
Kale :”Pi ang tagah tadi mah!”
Abuik :”Oyo yeh!”
Kale :”Kok dak sato den demo kini ko, bisa tabedo wak bisuak ko Buik!”
Abuik :”Tabedo baa Le?”
Kale :”Nyampang ado nantik di kampuang ko ado urang maliang ayam. Tu ado warga basorak, maliiiiiiang….maliiiiang…. Yakin den warga nan basorak ko kanai tangkok, nan maliang tetap malenggok sambia mambaka ayam hasia maliang e tu!”
Abuik :”Batua juo kecek ang tu Le. Yo bana tabedo tu! Urang nan basorak maliang tu dikaduan jo tuduhan melecehan namo baiak”
Kale :”Kan lai cadiak ang tu Buik a!”
Tibo-tibo nampak Tek Miah babaliak arah ka pulang dari rumah Walinagari tu.
Abuik :”Kama Etek ko? Dak sato demo?”
Tek Miah :”Indak takao dek Etek doh Buik. Beko dikaduan lo Etek beko!”
Kale :”Batea jadi e komah Tek!”
Tek Miah :”Baa dak batea e, dak bisa asa babuni kini ko doh. Babuni jolah, kanai tahan kasudahan e! Etek takuik, dak sikola anak-anak Etek ko!”

Leave a comment

No comments yet.

Comments RSS TrackBack Identifier URI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s