Supiak Banun (bagian 11)

Sabalun mugarik rombongan Idaih, Rambai, Supiak Banun, Atai lah pulang labiah dulu. Sahinggo putaran final mereka ko ndak mancaliak doh, karano acara final e salapeh mugarik. Samantaro pasangan Yuang Kalek jo Iyuih lai sampai salasai manonton festival tu.
“Sia nan manang kapatang Lek?”, sasek si Rambai ka Yuang Kalek di salo-salo persiapan upacara bendera.
“Nan juara e dak band sakola awak doh. Tapi gitaris terbaik lai dapek dek kawan awak!”
“Sia tu?”, penasaran lo si Rambai dek e.
“Si Sanjay Dhut tu ha!”
“Sanjay Dhut sia lo ko Lek? Ma ado kawan awak nan namo e Sanjay Dhut!”
“Anggap jo lah itu namoe lu. Kan cocok jo roman e tu!”
“Oooo nan India tu yo!”
“Aaa tuah, iyo paja tu!”
Antah baa lo, barubah aia muko si Rambai ko. Nampak labiah bacahayo muko e tu. Tabaok sanang lo e. Lah raso inyo lo nan manang. Antah dek kawan sa almamater antah dek nan lain kolah.
“Dek a kau senyum-senyum surang se Mbai?”, sasek Supiak Banun.
“Eeeh, indak…!”, merah muko si Rambai dek dikajuikan Supiak Banun tu.
“Suko kau jo si Sutaik tu yo?”
“Sutaik?”, manggarinyik kaniang si Rambai mandanga namo tu.
“Iyo. Sanjay Dhut kecek Kalek tadi tu, Sutaik namoe!”
Sabana sanang hati si Rambai sapanjang hari ko. Mandanga Sutaik dapek penghargaan gitaris terbaik ko, tabaok rendong lo perasaan si Rambai dek e. Di kelaspun nampak pangaruah e. Nampak sumangaik baraja si Rambai ko. Sado nan ditanyo guru dapek jo dek e sadoe. Ikolah rupoe pangaruah positif e kalau hati sadang babungo ko.
“Eh, Piak. Takana dek Rambai, Supiak kan hobi bamusik lo dak. Buek gai lah band ciek!”, kato si Rambai ka Supiak Banun sambia bajalan ka katin tiko jam istirahat tibo.
“Iyo, tapi lun ado kawan nan cocok basirobok lai!”
“Sutaik tu mungkin cocok tu mah Piak. Cubolah silau-silau jo lu!”
“Kecekan jo lah kau nio sobok jo Sutaik!”, pinteh Supiak Banun ko.
“Supiak salah sangko sakali ka Rambai. Iko kan demi sakola wak juo. Sia tau festival taun muko sakola awak bisa manang!”, lah mulai lo pandai si Rambai ko bakieh.
Supiak Banun tau bana baa kawan dakeknyo ko. Dak jadi mereka ko bakelok ka kantin doh. Nyo paluruih se ka kelas nan disabalah kantin tu nan kebetulan disinan kelas Sutaik ko. Pas lo Sutaik ko sadang surang di kelas, antah a nan dikarajoan e.
“Salamaik yo Taik!”, kecek Supiak Banun sambia maonyokan tangan e ka Sutaik ko.
“Eh, iyo mokasi Piak!”, baleh Sutaik singkek.
“Taik, iko ado kawan den nio kenalan ha. Nyo suko bana jo main gitar ang patang tu!”, nyo egang si Rambai dek Supiak Banun supayo sajajar tagak e, nan sabalun e tagak jo dilakang Supiak Banun.
“Apo lah Supiak ko a..!”, tasipu-sipu malu si Rambai jadie.
“Sutaik!”, kecek Sutaik ka si Rambai sambia maonyokan tangan e.
Lamo tamanuang si Rambai mancaliak Sutaik maonyokan tangan tu. Raso bamimpi lai lo. Indak picayo nyo jo apo nan sadang tajadi saaik ko doh. Dicubik e pinggang si Rambai ko dek Supiak Banun, baru tasintak e.
“Ehhh, Rambai!”, kecek si Rambai manjawek tangan Sutaik tu.
Bacampua aduik paresaan si Rambai tiko tu. Tangan ko lah raso kanai sentrum, aliran e manjala sampai ka kapalo sahinggo dak bisa bapikia si Rambai ko dek e doh. Tadiam sambia tangango lai lo si Rambai dek e. Dunia ko saraso lapang selai. Tingga inyo baduo se nan malayang diudaro. Udaro sakuliliang putiah saputiah kapeh. Baun e pun dak basiagak harum e doh, cando baun bungo malati manyambuik pagi.
“Eh, jan lamo bana!”, nyo tapuak tangan si Rambai nan sadang basalaman jo Sutaik tu dek Supiak Banun. Merah padam muko si Rambai sakali. Dak tantu jo a nan kadisabuik jadie lai doh. Lah salah tingkah jo jadie lai.
“Taik, sabanae Supiak ko nio lo main band mah. Tapi lun ado dapek kawan nan cocok lai!”, tibo-tibo jo talompek kalimaik tu dari muluik si Rambai.
“Yobana tu Piak? Kami sadang butuh personil lo kini mah!”, sumangek sakali Sutaik mandanga kaba tu.
Salanjuiknyo dak putuih-putih ota Supiak Banun jo Sutaik ko tantang band ko doh. Tanyato mereka ko samo-samo maidolaan Bon Jovi. Basobok kalorok ko, salero musik samo. Dari sejarah grup band tanamo, aliran musik, gaya bamain dan sagalo ruponyo ota preman baduo tu lapuak lapak jadie. Samantaro tu si Rambai lah tamanuang se lai. Ka sato baalah, awak dak punyo bahan. Apo nan diotaan mereka baduo tu dak tantu senek alah juo dek si Rambai ko doh. Salinteh tabik sasa dihatie. Mangalo lah disabuik Supiak Banun ko nio main band tadi tu. Sabalun lonceang masuak babunyi si Rambai lah tibo di kelas nyo liak. Nyo tinggaan se Supiak Banun maota lamak jo Sutaik.